இறைவன் இருக்கும் இடம்

**சிவா** · **சிவா** Sat 19 Mar 2011 - 11:06

உலகத்தைப் படைத்த கடவுள், அதில் ஓரறிவு முதல் ஐந்தறிவு கொண்ட உயிர்களைப் படைத்து வாழ்க்கையை ஏற்படுத்தினார். கடைசியாக, ஆறறிவுடைய மனிதனைப் படைத்தார்.

மனிதனைப் படைத்த சிறிது காலத்திற்குள்ளேயே, அவனை ஏன் படைத்தோம் என்றாகி விட்டது கடவுளுக்கு. ஏனென்றால், மனிதர்கள் ஏதாவது ஒரு கோரிக்கையைக் கடவுள் முன் வைத்து, அதை நிறைவேற்றிக் கொடுக்கும்படி கேட்டு, தொல்லைப்படுத்த ஆரம்பித்தார்கள். இதனால் வெறுப்படைந்த கடவுள், தேவர்களை அழைத்து எங்கே போய் ஒளிந்து கொள்ளலாம் என்று ஆலோசனை கேட்டார்.

இமயமலையின் உச்சிக்குப் போய்விடுங்கள் என்றனர் தேவர்கள்.

கடவுள் சொன்னார், எவரெஸ்ட் சிகரத்திலேயே காலடி எடுத்து வைத்தவர்கள், அங்கே என்னை தேடிக்கொண்டு கண்டிப்பாக வந்துவிடுவார்கள்.

பசிபிக் மகா சமுத்திரத்தின் அடியில் போய் ஒளிந்து கொள்ளுங்கள்.

அதன் ஆழத்தையும் தான் அளக்க ஆரம்பித்து விட்டார்களே...

சந்திர மண்டலம், செவ்வாய் மண்டலம் என்றெல்லாம் தேவர்கள் யோசனை கூறினர். அதெல்லாம் மனிதன் வரக்கூடிய இடங்கள் என்று அச்சப்பட்டார் கடவுள்.

மனிதனின் மனதுக்குள் போய் ஒளிந்து கொள்ளுங்கள். அவன் தேடிப்பார்க்காத இடம் அது ஒன்றுதான் என்றார் ஒரு புத்திசாலித்தேவர். கடவுளும் அவ்வாறே செய்தார். தன்னுடைய மனதைத் தவிர எல்லா இடங்களிலும் கடவுளைத் தேடிக் கொண்டிருக்கிறான் மனிதன்.

மஞ்சுபாஷிணி · மஞ்சுபாஷிணி Sat 19 Mar 2011 - 13:09

ஆஹா எத்தனை அருமையான பகிர்வு....

மனிதர்களின் மனங்களில் தான் தெய்வம் குடிக்கொண்டு இருக்கிறது.....

சத்திய வார்த்தைகள்......

இன்முகம் புன்முறுவல் அன்பான வார்த்தைகள் இவை இருந்தாலே போதுமே மனிதனும் தெய்வமாகலாமே....

அருமையான பகிர்வுக்கு அன்பு நன்றிகள் சிவா...