ஸ்ட்ராங் உமன்' சூரியபிரபா !

by மஞ்சுபாஷிணி Sat Mar 19, 2011 1:03 am

ஸ்ட்ராங் உமன்' சூரியபிரபா !

வீட்டில் சுமார் 30 கிலோ எடையிருக்கும் கேஸ் சிலிண்டரை நகர்த்தி வைப்பதற்கே பெருமூச்சு விடுவார்கள் பலரும். ஆனால், வலுதூக்கும் (Powerlifting) வீராங்கனையான சூரியபிரபா... பயிற்சிக்காக 185 கிலோ எடையை சர்வசாதாரணமாக லிஃப்ட் செய்து கொண்டிருந்தார்! மூளையின் கட்டளையை, உடலின் அத்தனை தசைகளும் இணைந்து செயல்படுத்திய அந்த உழைப்பை பார்த்தபோது, பிரமிப்பாக இருந்தது நமக்கு!

''சின்ன வயசுல எனக்கும் அப்படித்தான். பாண்டிச்சேரி ஸ்போர்ட்ஸ் கவுன்சில்ல, எங்கப்பா வெயிட் லிஃப்ட்டிங் கோச். அவர் கிளாஸ் எடுக்கப் போகும்போது, கூடவே போவேன். 'இந்த அண் ணன் எல்லாம் எப்படி இவ்வ்வ்வளவு வெயிட்டைத் தூக்கறாங்க?!’னு ஆச்சர்யமா இருக்கும். இப்போ, ஏதோ தண்ணி வாளியைத் தூக்கற மாதிரி எனக்கே பழகிடுச்சு!'' என்று சுவாரஸ்யமாக ஆரம்பிக்கும் சூரியபிரபா, வலு தூக்கும் போட்டி களில் சர்வதேச அளவில் முத்திரை பதித்து வரும், புதுச்சேரியைச் சேர்ந்த இருபது வயது இளம் விளையாட்டு வீராங்கனை!

''அப்பாவோட வெயிட் லிஃப்ட்டிங் கிளாஸுக்கு போய் போய்... ஒரு கட்டத்துல எனக்கும் அதுல ஆர்வம் வந்துச்சு. ஆனா, 'நாமளும் கொஞ்சம் கத்துக்கலாம்னு பொழுதுபோக்கா நினைச்சு வரக்கூடாது. சாதிக்கணும்ங்கற எண்ணம் உறுதியா இருந்தா மட்டும் கிளாஸுக்கு வா’னு கோச்சுக்கு உண்டான கண்டிப்போட அப்பா சொல்லிட்டார். அதையே சவாலா எடுத்துக்கிட்டேன். ஆனா, வெயிட் லிஃப்ட்டிங்கல சேராம... பவர்லிஃப்ட்டிங் பக்கம் என் கவனத்தைத் திருப்பினேன். ரெண்டுமே பார்க்கறதுக்கு ஒரே மாதிரி இருந்தாலும்... தூக்கற முறைகள்ல வேறுபாடு இருக்கும். அப்பாவோட இருந்தவங்கள்லாம் பவர்லிஃப்ட்டிங் பத்தி நிறைய சொல்லி ஊக்கப்படுத்தினாங்க. அதனாலதான் நான் பவர் லிஃப்ட்டிங்கை செலெக்ட் பண்ணினேன்.

ஆறாவது படிக்கறப்பதான் பவர் லிஃப்ட்டிங்குக்காக கோச்சிங் போக ஆரம்பிச்சேன். ஏழாம் வகுப்பு படிக்கறப்ப... முதல் முறையா போட்டியில கலந்துக்கிட்டேன். ஒன்பதாம் வகுப்பு படிக்கறப்ப... நேஷனல் லெவல் போட்டிகள்ல கலந்துக்கற அளவுக்கு முன்னேறினேன்.

ப்ளஸ் டூ வரைக்கும்தான் படிச்சேன். அப்புறம் முழு நேரமும் பயிற்சிக்கே செலவழிச்சேன். 2008-ம் வருஷம் உஸ்பெக்கிஸ்தான் தலைநகர் டாஷ்கன்ட்ல நடந்த ஆசிய சாம்பியன்ஷிஃப் போட்டிகள்ல நாலு தங்கப் பதக்கத்தோட 'சாம்பியன்ஷிப்’ ஜெயிச்சேன். அதே வருஷம் ராஜஸ்தான் மாநிலம், 'மவுண்ட் அபு’ல நேஷனல் லெவல் சேம்பியன்ஷிப் போட்டியில, 162.6 கிலோ தூக்கி ரெக்கார்ட் செய்தேன். அதுக்காக 'ஸ்டிராங் உமன்’ பட்டம் கொடுத்தாங்க.

2009 வருஷம் புனேவுல நடந்த காமன்வெல்த் பவர் லிஃப்ட்டிங் சேம்பியன்ஷிப் போட்டியில, சப் ஜுனியர் பிரிவுல 155.5 கிலோ தூக்கினது மூலமா, இன்டர்நேஷனல் ரெக்கார்டான 150 கிலோவை முறியடிச்சேன்!'' என்று சொல்லும் சூரியபிரபா, உலக பவர் லிஃப்ட்டிங் வரிசையில் ஒன்பதாவது இடத்தில் இருக்கிறார்!

''இடையில... பவர் லிஃப்ட்டரான பாக்கியராஜ்கூட திருமணம் ஆனதும், 'இனி விளையாட்டை மூட்டை கட்டிடு’னு பலரும் சொன்னாங்க. ஆனா... கணவர், மாமனார், மாமியார்னு ஒட்டுமொத்த குடும்பத்தோட புரிதலால... எப்பவும் போல பயிற்சிகள் தொடருது'' என்ற சூரியபிரபா, தற்போது... மதியழகன், மாசிலாமணி என்று இருவரிடம் பயிற்சி பெற்று வருகிறார்.

''இந்திய அளவுல முதல் இரண்டு இடங்களைப் பிடிக்கறவங்களுக்குத்தான், ஆசிய சாம்பியன்ஷிப் போட்டிகள்ல கலந்துக்கற வாய்ப்பு கிடைக்கும். நான் முதல் இடத்தில் வந்தாலும், வெளிநாட்டுல நடக்கற அந்தப் போட்டியில கலந்துக்கறதுக்கு 50 ஆயிரம் ரூபாய் இல்லாம திணறிட்டேன். அப்போதைய புதுச்சேரி முதல்வர் ரங்கசாமி, ஐம்பதாயிரம் ரூபாய் கொடுத்து 'இந்தியாவுக்கு பெருமை சேர்க்கணும்’னு வாழ்த்தினார். பதக்கத்தை ஜெயிச்சதும், அவருக்குதான் முதல்ல போன் போட்டு நன்றி சொன்னேன்'' என்று சொல்லும் சூரியபிரபா, இப்போது கரஸ்ஸில் பி.ஏ., வரலாறு படித்துக் கொண்டிருக்கிறார்.

''பவர் லிஃப்ட்டிங்கைப் பொறுத்தவரைக்கும் ஸ்குவாட், பென்ச் பிரஸ், டெட் லிஃப்ட்னு மூன்று சுற்றுகள் உண்டு. மூணுலயும் ஜெயிச்சாதான், கடைசி சுற்றுக்கு முன்னேற முடியும். நான் இதுவரை கலந்துகிட்ட எல்லா போட்டிகள்லயும் கடைசி சுற்று வரை வந்து தங்கம் வாங்காம திரும்பினதில்ல.

இதுவரைக்கும் காமன்வெல்த், ஒலிம்பிக் ரெண்டுலேயும் பவர் லிஃப்ட்டிங் விளையாட்டை சேர்க்கவே இல்ல. அடுத்த ஒலிம்பிக் போட்டிகள்ல சேர்க்கப் போறதா அறிவிச்சிருக்காங்க. அதுல கலந்துட்டு இந்தியாவுக்கு பெருமை தேடி தரணும்கிறதுதான் என்னோட ஒரே லட்சியம்'' என்றார் துளிர்த்திருந்த வியர்வைத் துளிகளைத் துடைத்தபடி!

நன்றி விகடன்