வாக்காளர் பட்டியலுக்கு 57,745 விண்ணப்பங்கள் 2.46 லட்சம் பேருக்கு வாக்காளர் அடையாள அட்டை

திருநெல்வேலி : நெல்லை மாவட்டத்தில் வாக்காளர் பட்டியலில் பெயர் சேர்க்க 57 ஆயிரத்து 745 விண்ணப்பங்கள் பெறப்பட்டுள்ளது. மாவட்டத்தில் 2.46 லட்சம் பேருக்கு வாக்காளர் அடையாள அட்டை வழங்கப்பட்டுள்ளது. இதுகுறித்து நெல்லையில் நேற்று நிருபர்களிடம் கலெக்டர் ஜெயராமன் கூறியதாவது:நெல்லை மாவட்டத்தில் 10 சட்டசபை தொகுதிகளில் நாளை (19ம் தேதி) முதல் வேட்பு மனுத்தாக்கல் ஆரம்பமாகிறது. இதற்கான அனைத்து ஏற்பாடுகளும் செய்யப்பட்டுள்ளது. மாவட்டத்தில் நேற்று முன்தினம் வரை வாக்காளர் பட்டியலில் பெயர் சேர்த்தல், திருத்தம் செய்தல், மாற்றம் செய்தலுக்கு 57 ஆயிரத்து 745 விண்ணப்பங்கள் வந்துள்ளன. இந்த விண்ணப்பங்கள் மீதான பரிசீலனை நடத்தப்பட்டு தகுதியான விண்ணப்பங்கள் மட்டும் ஏற்றுக் கொள்ளப்படும். வரும் 1ம் தேதிக்குள் வாக்காளர் பட்டியலில் பெயர் சேர்க்கப்பட்டு தொடர்ந்து 3 நாட்களுக்குள் வாக்காளர் அடையாள அட்டை வழங்கப்படும். மாவட்டத்தில் இதுவரை 2 லட்சத்து 51 ஆயிரத்து 417 அடையாள அட்டைகள் வழங்க விண்ணப்பங்கள் பெறப்பட்டததில் 2 லட்சத்து 46 ஆயிரத்து 225 பேருக்கு அடையாள அட்டைகள் வழங்கப்பட்டுள்ளது. 5,192 பேருக்கு ஓட்டுச் சாவடி அலுவலர்கள் மூலம் வீடு, வீடாக அடையாள அட்டைகள் வழங்க நடவடிக்கை எடுக்கப்பட்டு வருகிறது.



மாவட்டத்தில் நகல் அடையாள அட்டை கேட்டு 7 ஆயிரத்து 325 பேர் விண்ணப்பம் அளித்திருந்தனர். இதில் 3,920 அடையாள அட்டைகள் வழங்க தயார் நிலையில் உள்ளது. மாவட்டத்தில் ஏற்கனவே விண்ணப்பித்தவர்களுக்கு அடையாள அட்டைகள் வழங்கும் வகையில் நாளை (19ம் தேதி) மற்றும் வரும் 20ம் தேதி அனைத்து பகுதிகளில் சிறப்பு முகாம்கள் நடத்தப்படும். சட்டசபை தேர்தல் தொடர்பாக தேர்தல் அலுவலர்கள், உதவி தேர்தல் அலுவலர்கள், டி.எஸ்.பிகள், இன்ஸ்பெக்டர்களுக்கு பயிற்சிகள் அளிக்கப்பட்டுள்ளது. நெல்லை மாவட்டத்தில் தேர்தல் பணியில் 11 ஆயிரத்து 300 பேர் ஈடுபடுத்தப்படுகின்றனர். மாவட்டத்தில் 2,252 ஓட்டுச் சாவடி அலுவலர்கள் மூலம் வீடு, வீடாக பூத் சிலிப்கள் வழங்கப்படுகிறது.



மாவட்டத்தில் வணிகம் செய்யும் வியாபாரிகள் உரிய ஆவணங்களுடன் ரொக்கப் பணம் கொண்டு செல்லலாம். இதுதொடர்பாக டி.ஐ.ஜி, போலீஸ் கமிஷனர், வருமான வரித் துறை துணை கமிஷனர்கள், வணிக வரித் துறை உதவி ஆணையர்களுடன் ஆலோசனை கூட்டம் நடத்தப்பட்டுள்ளது. தங்க நகைகள் உட்பட பல்வேறு பொருட்களை கொண்டு செல்கிறவர்கள் உரிய பில், இன்வாய்ஸ் உட்பட அனைத்து ஆவணங்களையும் வைத்திருக்க வேண்டும். ஓட்டல்களில் பணத்தை பதுக்கி வைத்திருப்பது தெரிய வந்தால் சம்பந்தப்பட்ட உரிமையாளர்கள் போலீசாருக்கு தகவல் தெரிவிக்க வேண்டும். சந்தேகப்படும்படியான நபர்கள் ஓட்டலுக்கு வந்தால் உடனடியாக தகவல் தெரிவிக்க வேண்டும். பாங்குகளில் ஒரு லட்சம் ரூபாய் எடுத்தால் இதுதொடர்பாக அதிகாரிகளுக்கு சம்பந்தப்பட்ட மேலாளர்கள் உரிய தகவல் தெரிவிக்க வேண்டும்.
மதுரை வருமான வரித் துறை துணை ஆணையர் சுந்தராஜூ, 3 வருமான வரித் துறை அலுவலர்கள், 5 இன்ஸ்பெக்டர்கள் கொண்ட குழுவினர் வேட்பாளர்களின் கணக்கு விபரங்களை ஆய்வு செய்ய வருகை தருகின்றனர். தேர்தல் புறக்கணிப்பு தொடர்பாக பொதுமக்களின் கோரிக்கைகளை நிறைவேற்ற நடவடிக்கை எடுக்கப்படும். ஆனால் புதிய திட்டங்கள் எதுவும் நிறைவேற்றப்படாது. பராமரிப்பு, பழுது நீக்கும் பணிகள் போன்றவை மட்டும் மேற்கொள்ளப்படும். இவ்வாறு கலெக்டர் கூறினார். பேட்டியின் போது எஸ்.பி விஜயேந்திர பிதரி, கலெக்டரின் நேர்முக உதவியாளர் (தேர்தல்) மங்களநாதன், கோட்ட கலால் அலுவலர் கண.முருகானந்தம், தேர்தல் தாசில்தார் ராமச்சந்திரன், தாசில்தார் தியாகராஜன் ஆகியோரும் உடனிருந்தனர்.

நன்றி தினமலர்..

எங்க மாவட்டம் சோம்பேறி அக்கா வாக்காளர் அடையாள அட்டை நகல் கேட்டோம்னா அதுக்குன்னு ஸ்பெஷல் கேம்ப் வைப்போம் அப்ப வாங்கன்னு விரட்டி விடுறாங்க