உலக கோப்பை கிரிக்கெட்: காலிறுதி வாய்ப்பை தக்கவைத்தது இங்கிலாந்து

உலக கோப்பை கிரிக்கெட்டில் சென்னையில் நேற்று நடந்த பரபரப்பான ஆட்டத்தில் இங்கிலாந்து அணி வெஸ்ட் இண்டீசை வீழ்த்தி கால்இறுதி வாய்ப்பை தக்க வைத்துக் கொண்டது.

உலக கோப்பை கிரிக்கெட்

10-வது உலக கோப்பை கிரிக்கெட் போட்டி இந்தியா, இலங்கை, வங்காளதேசம் ஆகிய நாடுகளில் நடந்து வருகிறது. இதில் பங்கேற்றுள்ள 14 அணிகள் இரு பிரிவுகளாக பிரிக்கப்பட்டன. `ஏ' பிரிவில் ஆஸ்திரேலியா, பாகிஸ்தான், நிïசிலாந்து, இலங்கை, ஜிம்பாப்வே, கனடா, கென்யா அணிகளும், `பி' பிரிவில் இந்தியா, தென் ஆப்பிரிக்கா, இங்கிலாந்து, வெஸ்ட் இண்டீஸ், வங்காளதேசம், அயர்லாந்து, நெதர்லாந்து ஆகிய அணிகளும் இடம் பெற்றுள்ளன.

ஒவ்வொரு அணியும், தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் சுற்று முடிவில் ஒவ்வொரு பிரிவிலும் முதல் 4 இடங்களை பிடிக்கும் அணிகள் கால் இறுதிக்கு தகுதி பெறும். `ஏ' பிரிவில் ஆஸ்திரேலியா, இலங்கை, நிïசிலாந்து, பாகிஸ்தான் அணிகள் அடுத்த சுற்றுக்கு தகுதி பெற்று விட்டன. ஆனால் `பி' பிரிவில் தென்ஆப்பிரிக்கா தவிர மற்ற 3 அணிகளின் கால்இறுதி இன்னும் உறுதி செய்யப்படவில்லை. இதனால் லீக் சுற்று ஆட்டங்கள் தற்போது உச்சகட்டத்தை எட்டி உள்ளன.

சென்னையில் முக்கிய ஆட்டம்

`பி' பிரிவில் நேற்று சென்னை சேப்பாக்கத்தில் நடந்த 36-வது லீக் ஆட்டத்தில் இங்கிலாந்து-வெஸ்ட் இண்டீஸ் அணிகள் மோதின. இங்கிலாந்து அணியில் அதிரடி மாற்றமாக காலிங்வுட், ஆண்டர்சன், அஜ்மல் ஷாஸாத் ஆகியோர் நீக்கப்பட்டு அவர்களுக்கு பதிலாக லுக்ரைட், டிரெட்வெல், டிரெம்லெட் ஆகியோர் சேர்க்கப்பட்டனர். வெஸ்ட் இண்டீஸ் அணியில் இரு மாற்றமாக காயமடைந்த கிறிஸ் கெய்ல் அணிக்கு திரும்பினார். அறிமுக வீரராக சுழற்பந்து வீச்சாளர் தேவேந்திர பிஷூக்கு வாய்ப்பு அளிக்கப்பட்டது. சந்தர்பால், நிகிதா மில்லர் நீக்கப்பட்டனர்.

தனது கடைசி லீக்கில் டாஸ் ஜெயித்த இங்கிலாந்து முதலில் பேட் செய்வதாக அறிவித்தது. கட்டாயம் வெற்றி பெற வேண்டிய நிர்ப்பந்தத்துடன் கேப்டன் ஆண்ட்ரூ ஸ்டிராசும், மேத் பிரையரும் இங்கிலாந்தின் இன்னிங்சை தொடங்கினார்கள். தொடக்கம் ஓரளவு நன்றாகவே அமைந்தது. ஸ்கொர் 48 ரன்களை எட்டிய போது, பிரையர் 21 ரன்களில் (21 பந்து, 3 பவுண்டரி), ஆண்ட்ரே ரஸ்செல் பந்து வீச்சில் போல்டு ஆனார். அடுத்து ஜோனதன் டிராட் இறங்கினார். ரஸ்செலின் அடுத்த ஓவரில் ஸ்டிராசும் (31 ரன், 39 பந்து, 3பவுண்டரி, ஒரு சிக்சர்) பெவிலியன் திரும்ப இங்கிலாந்துக்கு நெருக்கடி ஏற்பட்டது. ஸ்டிராஸ் ஆட்டம் இழந்த பிறகு 6 ரன்களுக்கு மேலாக இருந்த ரன்ரேட்டும் குறையத் தொடங்கியது.

243 ரன்கள் எடுத்தது

3-வது விக்கெட்டுக்கு ஜோனதன் டிராட்டும், இயான் பெல்லும் சிறிது நேரம் தாக்குப்பிடித்து ஆடினார்கள். டிராட் ரன்வேகத்தை அதிகரிப்பதில் குறியாக இருந்தார். ஆனால் அவரது அதிரடி நீண்ட நேரம் நீடிக்கவில்லை. அணியை தூக்கி நிறுத்தும் என்று எதிர்பார்க்கப்பட்ட இந்த ஜோடியை புதுமுக சுழற்பந்து வீச்சாளர் தேவேந்திர பிஷூ பிரித்ததும், மிடில் வரிசையில் இங்கிலாந்தின் பேட்டிங் சீர்குலைந்தது. ஜோனதன் டிராட் 47 ரன்களிலும் (38 பந்து, 7 பவுண்டரி), இயான் பெல் 27 ரன்களிலு (48 பந்து) ஆட்டம் இழந்தனர். அவர்களை தொடர்ந்து மோர்கன் (7 ரன்), ரவி போபரா (4 ரன்) இருவரும் சொதப்பியது, அந்த அணிக்கு மேலும் பின்னடைவாக அமைந்தது. தேவேந்திர பிஷூ, வேகப்பந்து வீச்சாளர்கள் ரஸ்செல், கெமார் ரோச் ஆகியோர் இங்கிலாந்துக்கு தொடர்ந்து `குடைச்சல்' கொடுத்தனர்.

151 ரன்னுக்குள் 6 விக்கெட்டுகள் சரிந்த நிலையில், லுக் ரைட் இங்கிலாந்துக்கு நம்பிக்கை அளிக்கும் வகையில் ஆடினார். அவரது ஆட்டத்தால் இங்கிலாந்து அணி 200 ரன்களை கடந்தது. அத்துடன் `ஸ்லோவான' இந்த ஆடுகளத்தில் சவாலான ஸ்கோரையும் எட்ட முடிந்தது. லுக் ரைட் தனது பங்குக்கு 44 ரன்களும் (57 பந்து, 5 பவுண்டரி), பிரிஸ்னன் 20 ரன்களும் விளாசினர்.

முடிவில் இங்கிலாந்து அணி 48.4 ஓவர்களில் 243 ரன்களுக்கு ஆல்-அவுட் ஆனது. இருப்பினும் அந்த அணியில் ஒரு வீரர் கூட அரைசதம் அடிக்கவில்லை என்பது கவனிக்கத்தக்கது. வெஸ்ட் இண்டீஸ் தரப்பில் ரஸ்செல் 4 விக்கெட்டுகளும், பிஷூ 3 விக்கெட்டுகளும் சாய்த்தனர்.

கெய்ல் அதிரடி

பின்னர் 244 ரன்கள் இலக்கை நோக்கி வெஸ்ட இண்டீஸ் அணியின் தொடக்க ஆட்டக்காரர்கள் கிறிஸ் கெய்லும், டேவோன் சுமித்தும் விளையாடினர். கெய்ல், தொடக்கத்திலேயே தனது தாக்குதலை தொடுத்தார். பிரிஸ்னன் ஓவரில் 4 பவுண்டரி, டிரெம்லெட் ஓவரில் 3 பவுண்டரி, ஒரு சிக்சர் என்று பின்னியெடுத்தார். 5 ஓவரில் வெஸ்ட் இண்டீஸ் 50 ரன்களை கடந்தது. நல்லவேளையாக அவரது விசுவரூபத்தை 7-வது ஓவரிலேயே இங்கிலாந்து முடிவுக்கு கொண்டு வந்தது.

கெய்ல் 43 ரன்களில் (21 பந்து, 8 பவுண்டரி, ஒரு சிக்சர்) டிரெட்வெல் பந்து வீச்சில் எல்.பி.டபிள்ï. ஆனார். இதன் பின்னரும் வெஸ்ட் இண்டீசின் ரன்விகிதம் கணிசமாக எகிறிது. இருப்பினும் மறுமுனையில் விக்கெட்டுகளும் அதே வேகத்தில் சரிந்தன. முன்னணி வீரர்கள் டேரன் பிராவோ 5 ரன்களிலும், கேப்டன் சேமி 41 ரன்களிலும் (29 பந்து, 2 பவுண்டரி, 3 சிக்சர்), அதிரடிநாயகன் பொல்லார்ட் 24 ரன்களிலும் (ஒரு பவுண்டரி, 2 சிக்சர்) ஆட்டம் இழந்தனர். 150 ரன்னுக்குள் 6 விக்கெட்டுகளை (27.4 ஓவர்) இழந்ததால் இங்கிலாந்தின் கை லேசாக ஓங்கியது.

ஆனால் 7-வது விக்கெட்டுக்கு ரஸ்செலும், சர்வானும் இணைந்து ஆட்டத்தை மீண்டும் தங்கள் பக்கம் திருப்பினர். பந்து வீச்சில் முத்திரை பதித்த ரஸ்செல், பேட்டிங்கிலும் வெளுத்து வாங்கினார். இருவரும் அணியை வெற்றி நோக்கி அழைத்து சென்றனர். நல்ல நிலைமைக்கு அணி முன்னேறி, வெஸ்ட் இண்டீசின் வெற்றி உறுதி என்று நினைத்த போது, எதிர்பாராத திருப்பங்கள் நிகழ்ந்தன.

இங்கிலாந்து திரில் வெற்றி

அணியின் ஸ்கோர் 222 ரன்களை எட்டிய போது ரஸ்செல் (49 ரன், 46 பந்து, 2 பவுண்டரி, 3 சிக்சர்) டிரெட்வெல் பந்து வீச்சில் எல்.பி.டபிள்ï. ஆனார். ஆனாலும் சர்வான் களத்தில் நின்றதால் வெஸ்ட் இண்டீசின் நம்பிக்கை தளரவில்லை. இந்த சூழலில் சர்வான் (31 ரன், 68 பந்து, 3 பவுண்டரி), ரோச் (0) ஆகியோருக்கு சுழற்பந்து வீச்சாளர் ஸ்வான் தனது ஒரே ஓவரில் இரட்டை செக் வைத்தார். தொடர்ந்து கடைசி விக்கெட்டாக பென் ரன்-அவுட் ஆக, இங்கிலாந்து திரிலிங்கான ஆட்டத்தில் 18 ரன்கள் வித்தியாசத்தில் வெற்றியை சுவைத்தது. கடைசி 3 ரன்களுக்கு 4 விக்கெட்டுகளை வெஸ்ட் இண்டீஸ் இழந்தது குறிப்பிடத்தக்கது. வெஸ்ட் இண்டீஸ் அணி 44.4 ஓவர்களில் 225 ரன்களில் ஆல்-அவுட் ஆனது.

இங்கிலாந்துக்கு சென்னை மைதானம் ராசியாக உள்ளது. தென்ஆப்பிரிக்காவுக்கு எதிராக ஆட்டத்தில் 171 ரன்கள் எடுத்த போதிலும் அதற்குள் தென்ஆப்பிரிக்காவை சுருட்டி வெற்றி பெற்றது. இப்போது மீண்டும் ஒரு திரிலிங்கான அனுபவம் கிடைத்திருக்கிறது. அதுமட்டுமின்றி இந்த உலக கோப்பையில் இங்கிலாந்து பங்கேற்ற 6 ஆட்டங்களிலும் பரபரப்பான கட்டத்துக்கு பிறகே முடிவு கிடைத்துள்ளது.

வாய்ப்பு உள்ளது

கடைசி லீக்கில் ஆடிய இங்கிலாந்துக்கு இது 3-வது வெற்றியாகும். மற்ற 3 ஆட்டங்களில் 2-ல் தோல்வியும், இந்தியாவுடன் டையும் கண்டிருந்தது. இந்த வெற்றியின் மூலம் அவர்களின் புள்ளி எண்ணிக்கை 7 ஆக உயர்ந்துள்ளது. அத்துடன் கால்இறுதி வாய்ப்பையும் தக்க வைத்துக் கொண்டுள்ளது.

`பி' பிரிவில் தென்ஆப்பிரிக்கா மட்டுமே கால்இறுதியை உறுதி செய்திருக்கிறது. இந்தியாவின் கால்இறுதி வாய்ப்பு ஏறக்குறைய உறுதி என்றாலும் முழுமையாக இறுதி செய்யப்படவில்லை. வெற்றி பெற்றாலும் கால்இறுதி வாய்ப்பு உறுதியாகுமா? என்பதை அறிய இன்னும் 2 ஆட்டங்களின் முடிவுக்காக இங்கிலாந்து காத்திருக்க வேண்டும். அதாவது நாளை நடக்கும் தென்ஆப்பிரிக்கா-வங்காளதேசம் இடையிலான ஆட்டத்தில் தென்ஆப்பிரிக்கா வென்றால் இங்கிலாந்து கால்இறுதிக்கு தகுதி பெற்று விடும். மாறாக வங்காளதேசம் வென்றால் அந்த அணி கால்இறுதிக்கு தகுதி பெறும். அதன் பிறகு இங்கிலாந்துக்கு வாய்ப்பு கிடைக்குமா? என்பது இந்தியா-வெஸ்ட் இண்டீஸ் (20-ந்தேதி) இடையிலான ஆட்டத்தின் முடிவை பொறுத்து அமையும்.

5-வது ஆட்டத்தில் ஆடி 2-வது தோல்வியை சந்தித்துள்ள வெஸ்ட் இண்டீஸ் அணி கால்இறுதிக்கு முன்னேற கடைசி லீக்கில் இந்தியாவை வென்றாக வேண்டும்.

ஸ்கோர் போர்டு

இங்கிலாந்து

ஸ்டிராஸ் (சி) கெய்ல்(பி) ரஸ்செல் 31
பிரையர் (பி) ரஸ்செல் (பி) 21
டிராட் (சி) கெய்ல் (பி) பிஷூ 47
இயான் பெல் (பி) ரோச் 27
மோர்கன் (சி) தாமஸ் (பி) பிஷூ 7
போபரா (சி) ரஸ்செல் 4
லுக் ரைட் (சி) ரஸ்செல் (பி) பிஷூ 44
டிரெட்வெல் (ரன்-அவுட்) 9
பிரிஸ்னன் (நாட்-அவுட்) 20
ஸ்வான் (பி) ரஸ்செல் 8
டிரெம்லெட் (சி) தாமஸ் (பி) ரோச் 3

எக்ஸ்டிரா 22
மொத்தம் (48.4 ஓவர்களில் ஆல்-அவுட்) 243
விக்கெட் வீழ்ச்சி: 1-48, 2-79, 3-121, 4-134, 5-134, 6-151, 7-192, 8-216, 9-238

பந்து வீச்சு விவரம்

கெமார் ரோச் 9.4-2-34-2
சுலிமான் பென் 10-0-56-0
ரஸ்செல் 8-0-49-4
டேரன் சேமி 3-0-28-0
பிஷூ 10-0-34-3
பொல்லார்ட் 8-0-37-0

வெஸ்ட் இண்டீஸ்

டேவோன் சுமித் (ஸ்டம்பிங்) பிரையர் (பி) டிரெட்வெல் 10
கெய்ல் எல்.பி.டபிள்ï (பி) டிரெட்வெல் 43
சேமி (பி) போபரா 41
டேரன் பிராவோ (சி) ஸ்டிராஸ்(பி) டிரெட்வெல் 5
தாமஸ் (பி) போபரா 10
சர்வான் (சி) பெல் (பி) ஸ்வான் 31
பொல்லார்ட் எல்.பி.டபிள்ï (பி) ஸ்வான் 24
ரஸ்செல் எல்.பி.டபிள்ï (பி) டிரெட்வெல் 49
பென் (ரன்-அவுட்) 2
ரோச் (சி) டிரெம்லெட் (பி) ஸ்வான் 0
பிஷூ (நாட்-அவுட்) 0

எக்ஸ்டிரா 10
மொத்தம் (44.4 ஓவர்களில் ஆல்-அவுட்) 225
விக்கெட் வீழ்ச்சி: 1-58, 2-67, 3-91, 4-113, 5-118, 6-150, 7-222, 8-223, 9-223

பந்து வீச்சு விவரம்

பிரிஸ்னன் 7-1-47-0
ஸ்வான் 10-1-36-3
டிரெம்லெட் 5-0-47-0
டிரெட்வெல் 10-2-48-4
போபரா 8.4-2-22-2
லுக் ரைட் 4-0-18-0