வைகோ தலைமையில் 3வது அணி உருவாகிறது-பாஜகவும் இணையலாம்!

அதிமு கூட்டணியில், மதிமுக கிட்டத்தட்ட வெளியேற்றப்பட்டு விட்டது. இதனால் தமிழக அரசியலில் மூன்றாவது அணி உருவாகும் வாய்ப்புகள் பிரகாசமாகியுள்ளன.


மதிமுக தலைமையில் பல்வேறு குட்டிக் கட்சிகள் இணைந்து இந்த கூட்டணி உருவாகவுள்ளதாக தகவல்கள் கூறுகின்றன. இக்கூட்டணியில் பாஜகவும் இணையும் என்ற எதிர்பார்ப்பும் எழுந்துள்ளது.

பேச்சுவார்த்தை, ஆலோசனை என்று கூறி கூறியே வைகோவை கழுத்தறுத்து விட்டார் ஜெயலலிதா. கொஞ்சம் கூட நாகரீகமே இல்லாமல், வைகோவை அவர் நடத்திய விதம் உலகத் தமிழர்கள் மத்தியில் பெரும் அதிர்ச்சியையும், அதிருப்தியையும் ஏற்படுத்தியுள்ளது.

இதை விட வைகோவை யாரும் மரியாதைக்குறைவாக நடத்தியதில்லை என்று கூறும் அளவுக்கு அதிமுகவால் வைகோ அவமானப்படுத்தப்பட்டுள்ளார். கடந்த சட்டசபைத் தேர்தலுக்கு முன்பு திமுக கூட்டணியில் வைகோ இருந்தபோது கூட கருணாநிதி , இப்படி நடந்து கொண்டதில்லை என்கிறார்கள். இவ்வளவு தொகுதிகள் தர முடியாது என்பதையும் கூட கருணாநிதி நேரில் அழைத்துதான் சொன்னார் என்கிறார்கள் விவரம் அறிந்தவர்கள்.

ஆனால் வைகோவை மிகக் கேவலமாக நடத்தி, ஒரு வார்த்தை கூட அவரிடம் பேசாமலேயே கூட்டணியை விட்டு மறைமுகமாக வெளியேற்றி விட்டார் ஜெயலலிதா.

புதன்கிழமை மாலை வரையிலும் வைகோவுடன் அதிமுக நிர்வாகிகள் தொடர்பில் இருந்துள்ளனர். ஆனால் தங்களுக்கு 23 தொகுதிகள் வேண்டும் என்பதில் வைகோ உறுதியாக இருந்தார் என்றும், குறைந்தபட்சம் 21 தொகுதிகளாவது வேண்டும் என வலியுறுத்தியதாகவும் தெரிகிறது.

மாலையில் ஜெயலலிதாவை சந்திக்க வருமாறு அதிமுக நிர்வாகிகள் கேட்டுக் கொண்டபோது, தொகுதிகள் எண்ணிக்கை தெரியாமல், சந்திப்பது நன்றாக இருக்காது என வைகோ மறுத்துவிட்டதாக கூறப்படுகிறது.

இந்த நிலையில்தான் நேற்று அதிரடியாக வேட்பாளர் பட்டியலையே வெளியிட்டு விட்டார் ஜெயலலிதா.

மதிமுகவுக்கு, அதிமுக கூட்டணியில் கடைசியாக கூறப்பட்ட இடங்கள் 8 மட்டுமே என்பது குறிப்பிடத்தக்கது. இந்த தகவல் வெளியானதைத் தொடர்ந்து மார்ச் 19ம் தேதி உயர் நிலைக் குழுக் கூட்டத்தை வைகோ கூட்டியிருந்தார். நேற்றைய அதிமுக வேட்பாளர் பட்டியல் மூலம் இந்தக் கூட்டத்தில் தனித்துப் போட்டி என்ற அறிவிப்பை வைகோ வெளியிடலாம் என்று எதிர்பார்க்கப்படுகிறது.

இதனால் மதிமுக இந்த தேர்தலில் தனித்துப் போட்டியிட வேண்டிய கட்டாயம் எழுந்துள்ளது. எனவே வைகோ தலைமையில் புதிய அணி உருவாகும் என்றும் கூறப்படுகிறது. இந்தக் கூட்டணியில் கார்த்திக்கின் கட்சி, இந்திய ஜனநாயகக் கட்சி, யாதவர் சமுதாயக் கட்சி என சில கட்சிகள் இணையவுள்ளதாக கூறப்படுகிறது. மேலும், பாஜகவும் இந்தக் கூட்டணிக்கு வரக் கூடும் என்ற எதிர்பார்ப்பும் உள்ளது.

ஒருவேளை சிபிஎம், சிபிஐ ஆகியவையும் அதிமுக கூட்டணியிலிருந்து வெளியேற தீர்மானித்தால், இந்த 3வது கூட்டணி பலமான கூட்டணியாக உருவாகும் வாய்ப்புள்ளது.

மேலும் காங்கிரஸ் கட்சிக்கு எதிராக கிட்டத்தட்ட ஒட்டுமொத்த தமிழர் அமைப்புகளும் வரிந்து கட்டிக் கொண்டு நிற்கின்றன. சீமானோ, காங்கிரஸ் வேட்பாளர்களை ஓட ஓட துரத்துவோம் என்று உறுதி பூண்டுள்ளார். ஈழத் தமிழர்கள் மற்றும் உலகத் தமிழர்களின் ஆதரவும் வைகோ, சீமானுக்கு உள்ளது. எனவே இவர்களின் ஆதரவை தக்க வைத்துக் கொள்ளும் வகையில் வைகோ தனது தலைமையில் சில கட்சிகளை சேர்த்துக் கொண்டு தனித்துப் போட்டியிட வாய்ப்புள்ளது.

வைகோவால் தனிப்பட்ட முறையில் எந்தத் தொகுதியிலும் ஜெயிக்க முடியாமல் போனாலும் கூட வாக்குகளை கணிசமான அளவில் பிரித்து பாதிப்பை ஏற்படுத்த முடியும் என்று அக்கட்சியினர் திடமாக கூறுகின்றனர்.

மேலும் தமிழர் அமைப்புகளின் ஆதரவு மற்றும் சில கட்சிகளின் மறைமுக ஆதரவு ஆகியவற்றின் மூலம் காங்கிரஸ் கட்சிக்குப் பாதிப்பை ஏற்படுத்துவதோடு, தங்களது அருமையை அனைவருக்கும் புரிய வைக்கவும் வைகோ முயற்சிக்க வேண்டும் என்று மதிமுக நலம் விரும்பிகள் கருதுகின்றனர்.

ஜெயலலிதாவின் வேட்பாளர் பட்டியலால் அரசியலில் பெரும் பரபரப்பு ஏற்பட்டுள்ளது என்பதில் சந்தேகமில்லை. ஆனால் இனிமேல் நடக்கப் போகும் சம்பவங்கள் யாருக்குப் பாதிப்பை ஏற்படுத்தும், யாருக்கு லாபத்தைக் கொடுக்கும் என்ற பெரும் எதிர்பார்ப்பும் எழுந்துள்ளது
தட்ஸ்தமிழ்

கலை wrote:வெகுண்டுவிட்டது பூனை.. இனி எதிரிகள் சின்னா பின்னம் தான்..!

சிறு துரும்பும் பல் குத்த உதவும் என்பதனை ஜெயலலிதா மறந்து விட்டார் போல ? இப்போ கூட்டணிக்கும் குழப்பம் வந்துடுச்சே அண்ணா ?

இன்னும் என்னப்பா விஜயகாந்தே அடுத்த சி எம் ஆனாலும் ஆச்சர்யப்படறதிக்கில்லை.