அல்கொய்தாவினருடன் சேர்ந்து விடுவேன் - அதிபர் கடாபி மிரட்டல்

கிளர்ச்சிக்காரர்களுக்கு ஆதரவாக மேற்கத்திய நாடுகள் என் நாட்டின் மீது தாக்குதல் நடத்தினால், நான் அல்கொய்தா இயக்கத்தினருடன் சேர்ந்து விடுவேன் என்று லிபியா அதிபர் கடாபி மிரட்டல் விடுத்து இருக்கிறார்.

ஒபாமா அறிவிப்பு

லிபியா நாட்டில் அதிபர் கடாபிக்கு எதிராக மக்கள் போராட்டம் நடத்தி வருகிறார்கள். அவர்களுக்கு ஆதரவாக மேற்கத்திய நாடுகள் திரண்டு உள்ளன. அமெரிக்கா தன் போர்க்கப்பலை ஆப்பிரிக்க கடல் பகுதிக்கு அனுப்பி உள்ளது. கிளர்ச்சிக்காரர்களுக்கு ஆதரவாக மனிதாபிமான உதவிகளை செய்வோம் என்று அமெரிக்க ஜனாதிபதி ஒபாமா அறிவித்து இருக்கிறார்.

அதோடு கடாபி பதவி விலக வேண்டும் என்றும் ஒபாமா அறிவித்து இருக்கிறார். அதோடு ஐரோப்பிய நாடுகளும் கடாபிக்கு எதிராக ஒன்று கூடி உள்ளன. இந்த நிலையில் இத்தாலி நாட்டில் மிலன் நகரில் இருந்து வெளிவரும் பத்திரிகை ஒன்றுக்கு அவர் பேட்டி அளித்தார்.

சதாம் உசேன் மாதிரி

அமெரிக்க படை எடுப்புக்கு பிறகு ஈராக் அதிபர் சதாம் உசேன் தூக்கிலிடப்பட்டது போன்ற முடிவு உங்களுக்கும் ஏற்படும் என்று நினைக்கிறீர்களா? என்ற கேள்விக்கு கடாபி அளித்த பதில் வருமாறு:-

இல்லை. எங்கள் யுத்தம் அல்கொய்தாவுக்கு எதிரானது. எங்கள் நாட்டில் கிளர்ச்சியில் ஈடுபட்டு இருப்பவர்கள் பின்லேடனுடன் தொடர்பில் உள்ள தீவிரவாதிகள். அவர்களுக்கு எதிராக தான் யுத்தம் நடத்தி வருகிறோம். அவர்களுடன் நாங்கள் பேச்சுவார்த்தை நடத்த மாட்டோம்.

விலகி விடுவோம்

ஈராக்கில் நடந்து கொண்டதுபோல மேற்கத்திய நாடுகள் நடந்தால், தீவிரவாதத்துக்கு எதிரான சர்வதேச கூட்டணியில் இருந்து விலகிவிடுவோம். பின்லேடனுடன் இணைந்து விடுவோம். புனிதப்போர் பிரகடனம் செய்வோம்.

இவ்வாறு கடாபி கூறினார்.

கடாபி மேலும் கூறுகையில், கிளர்ச்சிக்காரர்களுக்கு தோல்வி தான் கிடைக்கும். அவர்களுக்கு இப்போது இரண்டே வழிகள் தான் உள்ளன. ஒன்று சரண் அடைவது. அல்லது நாட்டை விட்டு ஓடிவிடுவது. இந்த இரண்டு வழிகளில் ஏதாவது ஒன்றை தான் அவர்கள் நாட வேண்டி இருக்கும் என்றும் குறிப்பிட்டார்.