கேரளாவில் முதல்-மந்திரி அச்சுதானந்தன் தேர்தலில் போட்டியிட `டிக்கெட்' கொடுக்கப்பட வில்லை

முதல்-மந்திரிக்கு டிக்கெட் இல்லை

கேரளாவில் ஆளும் இடதுசாரி அணிகளுக்கு இடையே கடந்த 14-ந் தேதியே தொகுதிப் பங்கீடு முடிவடைந்து விட்டது. அதன்படி கூட்டணிக்கு தலைமை தாங்கும் மார்க்சிஸ்ட் கம்யூனிஸ்டு கட்சி 93 இடங்களிலும், அதன் தோழமை கட்சிகள் 47 இடங்களிலும் போட்டியிடுகின்றன.

ஆனால், தற்போதைய முதல்-மந்திரியும், மார்க்சிஸ்ட் கம்யூனிஸ்டு கட்சியின் மூத்த தலைவரும், 4 முறை எம்.எல்.ஏ.வாக வெற்றி பெற்றவருமான வி.எஸ்.அச்சுதானந்தனுக்கு இந்த முறை தேர்தலில் போட்டியிட டிக்கெட் கொடுக்கப்பட வில்லை என்று அந்தக் கட்சியினர் தரப்பில் தகவல் வெளியாகி உள்ளது. நேற்று காலையில், அகில இந்திய பொதுச் செயலாளர் பிரகாஷ் கரத் முன்னிலையில் கட்சி அலுவலகத்தில் உயர் மட்டக்குழு கூட்டம் நடந்தது. இந்த கூட்டத்தில் அச்சுதானந்தனுக்கு போட்டியிட டிக்கெட் கொடுக்க செயற்குழு ஆதரவு அளிக்க வில்லை என்றும், மாநில குழுக்கூட்டத்தில் இந்த முடிவு தெரிவிக்கப்படும் என்றும், அங்கு இது தொடர்பாக முறைப்படியான அறிவிப்பு வெளியாகும் என்றும் கட்சி வட்டாரங்கள் தெரிவித்தன.

கடந்த முறையும் மறுப்பு

கடந்த 2006-ம் ஆண்டு தேர்தலிலும் அச்சுதானந்தன் போட்டியிட மாநில குழு டிக்கெட் கொடுக்க மறுத்து விட்டது. அவரது எதிர்ப்பாளரான கட்சியின் மாநில செயலாளர் பினரயி விஜயன் அவருக்கு டிக்கெட் கொடுக்கக் கூடாது என்று கடும் எதிர்ப்பு தெரிவித்து, அதன்படி முடிவும் செய்யப்பட்டது. ஆனால், அகில இந்திய தலைமை அவருக்கு டிக்கெட் கொடுக்க வேண்டும் என்று வற்புறுத்தியதன் காரணமாக, மாநில குழு தனது முடிவை மாற்றிக் கொண்டு அவருக்கு டிக்கெட் கொடுத்தது குறிப்பிடத்தக்கது.

இந்த தேர்தலில் கட்சியின் மாநில செயலாளரான பினரயி விஜயனுக்கும் தேர்தலில் போட்டியிட டிக்கெட் கொடுக்கப்பட மாட்டாது என்றும் தகவல்கள் தெரிவிக்கின்றன.

காங்கிரஸ் கூட்டணியில் உடன்பாடு

இந்த நிலையில், கேரளாவில் காங்கிரஸ் கட்சி தலைமையிலான ஐக்கிய ஜனநாயக முன்னணி கட்சிகளுக்கு இடையே நடந்து வந்த தொகுதிப் பங்கீடு பேச்சு வார்த்தையில் நேற்று முன்தினம் இரவில் ஒப்பந்தம் ஏற்பட்டது.

இதன்படி காங்கிரஸ் கட்சி 81 தொகுதிகளில் போட்டியிடுகிறது. அதன் கூட்டணி கட்சிகளான இந்திய யூனியன் முஸ்லிம் லீக் 24 தொகுதிகளிலும், கேரளா காங்கிரஸ்-எம் 15 தொகுதிகளிலும், ஜனநாயக சோசலிஸ்ட் ஜனதா 7 தொகுதிகளிலும், ஜனாதிபத்ய சம்ரக்ஷன சமிதி 4 இடங்களிலும், கேரளா காங்கிரஸ்-ஜே, சி.எம்.பி. ஆகிய கட்சிகள் தலா 3 இடங்களிலும், கேரளா காங்கிரஸ்-பி 2 இடங்களிலும், ஆர்.எஸ்.பி.-பி 1 இடத்திலும் போட்டியிடுகின்றன.