“மாட்டு தலை” ஆர்ப்பாட்டக்காரர்களுக்கு எதிராக அமெரிக்க இந்து அறவாரியத்தின் கண்டனம்

கடந்த வாரம் சிலாங்கூர் மாநில அலுவலகத்தின் முன் நடத்தப்பட்ட சினமூட்டுகின்ற, உணர்சிகளைத் தூண்டுகின்ற ஆர்ப்பாட்டத்தில் ஈடுபட்டவர்களின் தலைவர்களை அடையாளம் கண்டு தண்டிப்பதற்கு மலேசிய அரசாங்கம் விரைவாக, வலுவான விசாரணையை மேற்கொள்ள வேண்டும் என்று அமெரிக்க இந்து அறவாரியம் கோரிக்கை விடுத்துள்ளது.

இந்த மனதைப் புண்படுத்துகிற ஆர்ப்பாட்டத்தை தடுத்து நிறுத்தத் தவறிய போலீசாரின் மீதும் விசாரணை நடத்தி கடுமையான நடவடிக்கை எடுக்க வேண்டும் என்று அந்த அறவாரியம் கேட்டுக்கொண்டுள்ளது.

அமெரிக்க இந்து அறவாரியத்தின் கொள்கை இயக்குனர் இசானி சௌத்ரி அந்த ஆர்ப்பாட்டத்தை கண்டனம் செய்ததுடன், சிலாங்கூர் அரசு இந்துக் கோயிலை ஷா அலாம் செக்சன் 23 க்கு இடமாற்றம் செய்ய விடுத்துள்ள உத்தரவை ரத்து செய்ய வேண்டும் என்றும் கேட்டுக்கொண்டார்.

ஆகஸ்ட் 28 ஆம் தேதி அமெரிக்காவுக்கான மலேசிய தூதர் இளங்கோ கருப்பண்ணனுக்கு எழுதியுள்ள கடிதத்தில் இசானி அவருடையக் கண்டனத்தைத் தெரிவித்துள்ளார்.

அம்னோவின் பங்கு

இண்ட்ராப் இந்த வெறுப்பூட்டுகிற சம்பவத்தைக் கண்டித்ததோடு இதில் அம்னோவிற்கு பங்குண்டு என்றும் குற்றம் சாட்டியுள்ளது.

“மலேசிய முஸ்லிம்கள் மற்றும் இந்துக்களிடையில் இனத்துவேசத்தையும் பகமை உணர்வுகளையும் தூண்டிவிடும் நோக்கத்தில் இந்த சினமூட்டுகின்ற செயலை அம்னோவும் சில போலீசாரும் செய்திருக்க வேண்டும் என்று நான் நம்புகிறேன்”, என்று லண்டனில் இருக்கும் பி. வேதமூர்த்தி கூறியுள்ளார்.

மலேசியாஇன்று