ஸ்பெக்ட்ரம் பணம் 6 வெளிநாடுகளில் பதுக்கல், சுப்ரீம் கோர்ட்டில் அமலாக்கப்பிரிவு தகவல்

புதுடெல்லி, மார்ச்.16- ஸ்பெக்ட்ரம் அலைவரிசை ஒதுக்கீடு விவகாரத்தில் 31 நிறுவனங்களிடம் விசாரணை நடத்தி வருவதாகவும், 6 வெளிநாடுகளில் பணம் முதலீடு செய்யப்பட்டுள்ளதாகவும் சுப்ரீம் கோர்ட்டில் அமலாக்கப் பிரிவு அறிக்கை தாக்கல் செய்துள்ளது.

அமலாக்கப் பிரிவு அறிக்கை

2ஜி ஸ்பெக்ட்ரம் அலைவரிசை ஒதுக்கீட்டில் நடந்த முறைகேடு தொடர்பாக பிரபல வக்கீல் பிரசாந்த் பூஷன் மற்றும் சிலர் தாக்கல் செய்துள்ள பொதுநல மனு மீது நீதிபதிகள் கங்குலி, சிங்வி ஆகியோர் அடங்கிய சுப்ரீம் கோர்ட்டு பெஞ்சு விசாரித்து வருகிறது. இந்த விவகாரத்தில் கோடிக்கணக்கில் பணப் பரிமாற்றம் நடைபெற்றது குறித்து சி.பி.ஐ. மற்றும் அமலாக்கப் பிரிவு அதிகாரிகள் நடத்தும் விசாரணையையும் சுப்ரீம் கோர்ட்டு கண்காணிக்கிறது.

இதற்கிடையே, இதுவரை நடந்த விசாரணை தொடர்பான முழுமையான அறிக்கையை மார்ச் 15-ந் தேதிக்குள் தாக்கல் செய்யுமாறு அமலாக்கப் பிரிவினருக்கு சுப்ரீம் கோர்ட்டு உத்தரவிட்டது. அதன்படி, விசாரணை அறிக்கையை அமலாக்கப் பிரிவு சார்பாக மூத்த வக்கீல் வேணுகோபால் நேற்று தாக்கல் செய்தார்.

அந்த அறிக்கையில் கூறப்பட்டுள்ளதாவது:-

31 நிறுவனங்கள்

2ஜி ஸ்பெக்ட்ரம் அலைவரிசை ஒதுக்கீட்டால் ஆதாயம் பெற்ற பணத்தை குறைந்தது 6 நாடுகளில் முதலீடு செய்துள்ளனர். அந்த நாடுகளில் கோடிக்கணக்கான ரூபாய் முதலீடு செய்யப்பட்டிருக்கிறது. எனவே, அந்த பணத்தை பறிமுதல் செய்ய உதவுமாறு வெளிநாடுகளுக்கு கடிதம் அனுப்பப்பட்டுள்ளது. ஸ்பெக்ட்ரம் ஊழல் பணம் சென்றுள்ள சிங்கப்பூர், சைப்ரஸ், ஜெர்சி, விர்ஜின் தீவு உள்பட 6 நாடுகளுக்கு அமலாக்கப் பிரிவு கடிதம் எழுதியுள்ளது.

இந்த வழக்கில் 31 நிறுவனங்களுக்கு சம்மன் அனுப்பப்பட்டு விசாரிக்கப்பட்டது. 26 நிறுவனங்களிடம் இருந்து அறிக்கைகள் பெறப்பட்டு பதிவு செய்யப்பட்டுள்ளன. இது தவிர, இந்த ஊழலில் தொடர்புடைய ஹவாலா தரகர்கள் சிலரிடமும் விசாரணை நடந்தது. அவர்களுடைய அலுவலகம் மற்றும் வீடுகளில் சோதனை நடத்தப்பட்டது.

இரண்டு நபர்கள்

இந்த ஊழலில் தொடர்புடைய அனைவரின் தினசரி வங்கிப் பரிமாற்ற விவரங்களும் அறிக்கையில் கூறப்பட்டுள்ளது. விசாரணை வளையத்தில் உள்ள ஒரு நபரிடம் இரண்டரை கோடி ரூபாய் இருந்தது. அதற்கான விபரங்களை அளிக்குமாறு கேட்டுக்கொள்ளப்பட்டார்.

மற்றொரு நபர், ஸ்பெக்ட்ரம் உரிமம் வழங்கிய சில நாட்களில் குறிப்பிட்ட நிறுவனத்தில் இருந்த தன்னுடைய பங்கை விற்றுள்ளார். அதன் மூலமாக, ரூ.100 கோடி வரை பணம் பெற்றிருக்கிறார். அந்த பணம் மொரீசியஸ் சென்றுள்ளது. இது தவிர, இன்னும் ஏராளமானோருக்கு இந்த முறைகேட்டில் ஆதாயம் கிடைத்திருப்பது தெரிய வந்துள்ளது.

இவ்வாறு அந்த அறிக்கையில் கூறப்பட்டுள்ளது.

4 குழுவினர்

எனினும், 31 நிறுவனங்கள் மற்றும் ஹவாலா தரகர்களின் பெயர்கள் பற்றிய விவரங்களை அந்த அறிக்கையில் அமலாக்கப் பிரிவு தெரிவிக்கவில்லை.

அறிக்கையை படித்து பார்த்த சுப்ரீம் கோர்ட்டு நீதிபதிகள், `இந்த ஊழலின் பின்னணி நெட்வொர்க்கு மிகவும் பெரியதாக உள்ளது. பல்வேறு நாடுகளுடனும் தொடர்பு இருக்கிறது. முதற்கட்ட விசாரணையிலேயே நாட்டின் சட்டம் மீறப்பட்டிருப்பது தெளிவாகிறது. இந்த வழக்கு விசாரணையில், அமலாக்கப் பிரிவை சேர்ந்த எத்தனை அதிகாரிகள் ஈடுபட்டுள்ளனர்' என கேட்டனர்.

அதற்கு பதிலளித்த அமலாக்கப் பிரிவு வக்கீல் வேணுகோபால், `மொத்தம் 4 குழுவினர் விசாரணை நடத்தி வருகின்றனர்' என்றார்.

ஒரு மணி நேரம் நடந்த வக்கீல்கள் வாதத்துக்கு பிறகு, வழக்கு விசாரணையை மார்ச் 16-ந் தேதிக்கு (இன்று) சுப்ரீம் கோர்ட்டு ஒத்திவைத்தது.

தனி கோர்ட்டு

இதற்கிடையே, 2ஜி ஸ்பெக்ட்ரம் வழக்கை விசாரிப்பதற்காக தனி கோர்ட்டை அமைக்க டெல்லி ஐகோர்ட்டு முடிவு செய்துள்ளது. இந்த தனி கோர்ட்டின் நீதிபதியாக, ஸ்பெக்ட்ரம் தொடர்பான வழக்கை விசாரித்து வரும் சி.பி.ஐ. கோர்ட்டின் நீதிபதி ஓ.பி.ஷைனி நியமிக்கப்படுவார் என டெல்லி ஐகோர்ட்டு தகவல்கள் தெரிவிக்கின்றன.

முன்னதாக, ஸ்பெக்ட்ரம் வழக்கின் முக்கியத்துவம் கருதி இதை விசாரிப்பதற்காக தனி கோர்ட்டு அமைக்க வேண்டும் என சுப்ரீம் கோர்ட்டு தெரிவித்திருந்தது.

தினதந்தி