டீ கடை பெஞ்சு

தேர்தலில் களம் இறங்குகிறார் நடிகர் விஜய்... தொகுதி தேடுதல் தீவிரம்! ""தி.மு.க., சார்பா நடிகர் விஜய், தேர்தலில் போட்டியிடப் போறாரு பா...!'' என, புது தகவலுடன் விவாதத்தை ஆரம்பித்தார் அன்வர்பாய்.

""என்ன வே... கரடி விடுதீரு...'' என்று கேட்டார் பெரியசாமி அண்ணாச்சி.

""அவசரப்படாம முழுசா கேளுங்க பா... நீங்க நினைக்கறது டைரக்டர் எஸ்.ஏ.சந்திரசேகரனோட மகன்... நான் சொல்றது, சினிமா பாடல் ஆசிரியர் பா.விஜயை பத்தினது... இவர் நடிகராகி, கருணாநிதி கதை, வசனத்துல தயாராகற படங்கள்ல தொடர்ந்து நடிச்சுட்டு வர்றார்... இவரை, இந்த முறை சட்டசபைத் தேர்தல்ல, தி.மு.க., சார்பா களமிறக்கப் போறாங்க... அவருக்கு தோதான தொகுதியை தேர்ந்தெடுக்கற வேலை தீவிரமா நடந்துகிட்டு இருக்கு...'' என்றார் அன்வர்பாய்.

""சினிமாக்காரங்களை சுத்தி தான் தமிழக அரசியல் நடக்கணும்ங்கறது, தமிழகத்தோட தலைவிதி போல இருக்கு வே...'' என்றார் அண்ணாச்சி.

""பணம் கொடுக்கறதைத் தடுக்க, ரொம்பவே உறுதியா இருக்காருங்க...'' என, அடுத்த மேட்டருக்கு தாவினார் அந்தோணிசாமி.

""யாரைச் சொல்றீங்க பா...'' என, விசாரித்தார் அன்வர்பாய்.

""தலைமைத் தேர்தல் கமிஷனர் குரேஷி இருக்காரேங்க... தேர்தல்ல பணம் கொடுக்கற விஷயத்தை தடுத்தே ஆகணும்னு அவர் உறுதியா இருக்காருங்க... அதுக்கு, இந்த முறை தனி, "டீம்' அனுப்பி வைக்கறார்... தலைமைத் தேர்தல் அதிகாரியா கோபாலசாமி, நவீன் சாவ்லா இருந்தப்ப, இவர் தேர்தல் கமிஷனரா அவங்களுக்கு கீழே வேலை பார்த்தார்... அப்ப இருந்தே, அதிகாரிகள் மீட்டிங்ல இந்த விஷயத்தைச் சொல்லி வருத்தப்பட்டிருக்காருங்க...

""குறிப்பா, "திருமங்கலம் தேர்தல்ல அதிகாரிகளால எதுவுமே செய்ய முடியலை... அதுக்கு அவங்களை குறை சொல்ல முடியாது... நம்ம, சிஸ்டத்தையே மாத்தணும்'னு பேசிருக்கார்... இப்ப, அவரே தலைமைத் தேர்தல் அதிகாரியா வந்துட்டதால, இந்த முறை தமிழகத்துல நடக்கும் தேர்தல்ல, பண விவகாரத்துக்கு தனி கெடுபிடி இருக்கும்னு சொல்றாங்க...'' என்றார் அந்தோணிசாமி.

""தி.மு.க., மேல கடும் அதிருப்தியில இருக்கா ஓய்...'' என, கடைசி தகவலுக்கு மாறினார் குப்பண்ணா.

""எந்தக் கட்சி வே...'' என்றார் அண்ணாச்சி.

""தி.மு.க., கூட்டணியில இருக்கற இந்திய யூனியன் முஸ்லிம் லீக் கட்சிக்கு மூணு தொகுதிகள் ஒதுக்கினா ஓய்... கொடுத்த மூணுல ஒரு தொகுதியை காங்கிரசுக்காக திருப்பி வாங்கிட்டா... இது, முஸ்லிம் லீக் கட்சியில கடும் அதிருப்தியை ஏற்படுத்தியிருக்கு... வட சென்னை உட்பட பல இடங்கள்ல, தி.மு.க.,வை கண்டிச்சு போஸ்டர் ஒட்டியிருக்கா...

""கட்சியின் மகளிரணி மாநில தலைவி பாத்திமா முசாபர், ரொம்ப ஆவேசமா முக்கிய நிர்வாகிகளுக்கு எஸ்.எம்.எஸ்., அனுப்பிண்டு இருக்கார்... "சிறுபான்மையினருக்காக மூன்றரை சதவீத இட ஒதுக்கீடு கொடுத்த கருணாநிதி, அதை தொகுதி பங்கீட்டுல அமல்படுத்தலை... கொடுத்ததுல ஒரு தொகுதியை திருப்பி வாங்கிண்டது கொஞ்சம் கூட சரியில்லை... இதுக்கு பேசாம, தார்மீக அடிப்படையில ஆதரவு கொடுத்திருக்கலாம்'னு, விமர்சனம் நீண்டுண்டு போறது ஓய்...'' என, கூறிவிட்டு கிளம்பினார் குப்பண்ணா; மற்ற பெரியவர்கள் புறப்பட, பெஞ்சில் அமைதி திரும்பியது