தமிழகம் முழுவதும் சிறுநீரக நோய்களினால் 5 லட்சம் பேர் பாதிக்கப்பட்டுள்ளனர்

தமிழகம் முழுவதும் சுமார் 5 லட்சம் பேர் சிறுநீரக நோய்களினால் பாதிக்கப்பட்டுள்ளதாக சிறுநீரகவியல் துறை டாக்டர் கூறினார்.

விழிப்புணர்வு கருத்தரங்கம்

உலக சிறுநீரக தினம் நேற்று கடைப்பிடிக்கப்பட்டது. இதையடுத்து மதுரை மீனாட்சி மிஷன் ஆஸ்பத்திரியில் சிறுநீரக நோய் குறித்த விழிப்புணர்வு கருத்தரங்கம் நடந்தது. மருத்துவ இயக்குனர் டாக்டர் ராஜசேகரன் தலைமை தாங்கினார். தலைமை சிறுநீரகவியல் டாக்டர் சம்பத்குமார் நோய் குறித்து விளக்கி பேசும்போது கூறியதாவது:-

சிறுநீரக நோய்கள் குறித்த விழிப்புணர்வு பொதுமக்களிடம் போதிய அளவு இல்லை. சர்க்கரை நோய், இதயநோய் மற்றும் ரத்த கொதிப்பு போன்ற நோய்கள் குறித்து அறிவுரை வழங்கும் டாக்டர்கள் சிறுநீரக நோய்கள் குறித்து விளக்கம் அளிப்பதில்லை. அமெரிக்க நாட்டில் உள்ள டாக்டர்களில் சுமார் 30 சதவீதம் பேர் மட்டுமே இந்த நோய்கள் குறித்து தெரிந்துள்ளனர். நமது நாட்டில் சிறுநீரக நோய்கள் குறித்த விழிப்புணர்வினை ஏற்படுத்த அரசு முன்வர வேண்டும்.

சிறுநீர் மூலமாக வெளியேறும் புரோட்டீனின் அளவு குறைவாக இருந்தால் இந்த நோய் ஏற்பட வாய்ப்பு உள்ளது. ரத்தத்தில் உள்ள சீரம் கிரியாட்டினின் அளவு 1.4 மில்லி கிராம் இருக்க வேண்டும். சிறிதளவு இது அதிகரித்தாலும் அவர்களுக்கு 10 ஆண்டுகளுக்குள் இதய நோய் ஏற்படும் வாய்ப்பு உள்ளது. பின்னர் அது சிறுநீரக பாதிப்பினையும் ஏற்படுத்தும்.

5 லட்சம் மக்கள்

சிறுநீரக பாதிப்பினை முழுமையாக குணப்படுத்த முடியாது. தொடக்க நிலையில் கண்டுபிடித்தால் நோயின் பாதிப்பினை மருந்துகள் மூலம் தள்ளிப்போடலாம். பின்னர் டயாலசிஸ் மற்றும் மாற்று சிறுநீரகம் பொருத்துதல் போன்றவற்றின் மூலம் சிகிச்சை அளிக்கலாம். ஐரோப்பிய நாடுகளில் இந்த நோயினால் பாதிக்கப்பட்டவர்களுக்கு சிகிச்சைக்கான முழு செலவையும் அரசே ஏற்கிறது. அந்த நிலை இந்தியாவிலும் உருவாக வேண்டும்.

புகை பிடித்தல், அதிக அளவில் அசைவ உணவுகளை சாப்பிடுதல் மற்றும் பொட்டாசியம் சத்து குறைபாடு இந்த நோயை உருவாக்கும். சிறுநீரக நோயினை தடுத்தால், அதன் மூலம் இதய நோயினையும் தடுக்கலாம். பரிசோதனை மூலம் மட்டுமே இந்த நோயினை கண்டறிய முடியும். தமிழகத்தில் சுமார் 5 லட்சம் பேர் சிறுநீரக நோயினால் பாதிக்கப்பட்டுள்ளனர். ஆனால் சுமார் ஒரு லட்சம் பேர் மட்டுமே உரிய சிகிச்சை எடுத்துக்கொள்கிறார்கள். மற்றவர்களுக்கு இந்த நோயினால் பாதிக்கப்பட்டுள்ளதே தெரியாத நிலை உள்ளது.

இவ்வாறு அவர் கூறினார்.

பின்னர் ஆஸ்பத்திரியின் சார்பில் சிறுநீரக நோய்கள், பாதிக்கப்பட்டவர்களின் உணவு முறைகள், சிகிச்சை முறை, மாற்று சிறுநீரகம் பொருத்தியவர்கள் கடைப்பிடிக்க வேண்டியவை குறித்து அவர் விளக்கம் அளித்தார். பின்னர் அதுகுறித்த ஒரு சி.டி.யை டாக்டர் சம்பத்குமார் வெளியிட்டார். இந்த கருத்தரங்கில் சிறுநீரகம் பாதிக்கப்பட்ட ஏராளமானவர்கள் கலந்து கொண்டனர்.