எலியின் ஆசை

அந்தக் குட்டி எலி கூறியதைக் கேட்டு, கூடியிருந்த மற்ற எலிகளெல்லாம் பலமாய் அதிர்ந்தன.

என்ன சொல்கிறீர் நண்பரே?!'' அதிர்ச்சியும், ஆச்சரியமுமாய் கேட்டது ஒரு எலி.

சுய நினைவோடுதான் பேசுகிறாயா? இது விபரீத ஆசை'' என்று எச்சரித்தது இன்னொரு எலி.

இனம் இனத்தோடு தான் சேர வேண்டும். உன்னுடைய இந்த எண்ணம் இயற்கைக்கு முரணானது'' என்று வயதில் மூத்த எலி ஒன்று எடுத்துச் சொல்லியது.

"நீங்கள் என்ன சொன்னாலும் சரி. என்னுடைய எண்ணத்தை நான் மாற்றிக் கொள்ளப் போவதில்லை. கொசுதான் என் மனைவி என்பதில் உறுதியாக இருக்கிறேன்'' என்று அந்தக் குட்டி எலி அழுத்தமாகக் கூறவும்... தாய் எலிக்கு ஆவேசம் வந்துவிட்டது.

உனக்கு என்ன பைத்தியமா பிடித்து விட்டது? உன்னுடைய இந்த ஆசையால் உலகமே நம் இனத்தை தூற்றும். எத்தனை தலைமுறை ஆனாலும் இந்தக் களங்கம் போகாது'' என்று ஆத்திரத்துடன் பேசியது.

உலகம் என்ன வேண்டுமானாலும் பேசிவிட்டு போகட்டும். அதைப்பற்றி நான் கவலைப்பட போவதில்லை'' என்று அலட்சியமாகக் கூறிய குட்டி எலி, ``அம்மா, கொசுவை என்னால் மறக்க முடியாது. அது பாடும் ராகத்தில் என்னையே நான் தொலைத்து விட்டேன். தயவுசெய்து என் ஆசைக்கு தடை போடாதீர்கள்'' என்று கண்ணீருடன் கெஞ்சியது.


பிள்ளையின் கண்களில் நீரைக் காணவும், தாய் எலிக்கு தாங்க முடியவில்லை. எந்தத் தாயும் பிள்ளையின் ஆசையை நிறைவேற்றி வைக்கவே விரும்புவாள். ஆனால், இது இயற்கைக்கு முரணான ஆசை என்பதால் ஏற்றுக்கொள்ளவும் முடியவில்லை, புறக்கணிக்கவும் முடியவில்லை. தாய் மனம் தவித்தது. எவ்வளவோ எடுத்துக் கூறியும் குட்டி எலி கேட்காததால், ``உன் இஷ்டம் போல செய்'' என்று விரக்தியுடன் கூறிவிட்டு அங்கிருந்து போய்விட்டது தாய் எலி.

குட்டி எலி தன் விருப்பம் போல் கொசுவை மணந்து கொண்டது. நாட்கள் நகர்ந்தன. ஒருநாள் காலை குட்டி எலி இரை தேட புறப்பட்டது. வாசல் வரை வந்து வழியனுப்பி வைத்தது கொசு. காட்டுக்குச் சென்ற குட்டி எலி, அங்கிருந்த தோப்புக்குள் நுழைந்தது. ஒரு புளியமரத்தின் அடியில் நிறைய பானைகள் அடுக்கி வைக்கப்பட்டிருந்தன. அதன் அருகில் சென்ற குட்டி எலி, பானைகளை உருட்ட ஆரம்பித்தது. பானைகள் கீழே சரிந்து விழ... ஒரு பானைக்குள் வசமாக மாட்டிக் கொண்டது.

இரைதேடச் சென்ற கணவன் வெகுநேரம் ஆகியும் வீடு திரும்பாததால், கொசு கவலையடைந்தது. பகல் போய் இரவும் வந்துவிட்டது. குட்டி எலி இன்னும் வரவில்லை. கொசு அழ ஆரம்பித்தது.

மறுநாள்-

தோட்டக்காரர் கீழே விழுந்து கிடந்த பானைகளை எடுத்து அடுக்க... பானைக்குள் அகப்பட்டிருந்த குட்டி எலி தலைதெறிக்க வீட்டுக்கு ஓடியது. அங்கே கொசு அழுது கொண்டிருப்பதைப் பார்த்து, பரிவுடன் அருகே சென்று மனைவியின் கண்ணீரைத் துடைத்து விட்டது. குட்டி எலி நடந்த சம்பவத்தை விளக்கவும்... கொசுவின் முகம் தெளிவானது.

இரவு முழுக்க உங்களைக் காணாமல் அழுது கொண்டே இருந்தேன் தெரியுமா'' என்று கொசு கூறவும், என்மேல் உனக்கு இவ்வளவு பாசமா?'' என்று கேட்டபடியே கொசுவுக்கு வேகமாக முத்தம் கொடுக்க... குட்டி எலியின் மூக்கிற்குள் போய்விட்டது கொசு. தான் கொடுத்த முத்தமே தன் மனைவிக்கு எமனாக அமைந்துவிட்டதை நினைத்து அழுதது. இயற்கைக்கு முரணாக நடக்கும்போது இனியவை கூட கொடியதாக மாறிவிடும் என்பதைக் குட்டி எலி அப்போது உணர்ந்தது.



எஸ். மோகனா செல்வகணேசன்

அளவுக்கு அதிகமா ஆசை பட்டால் இப்படித்தான் நிகழும்.
நன்றி அண்ணா பகிர்விக்கு!