செக்ஸ் புகாரில் சிக்கிய சாமியாருக்கு 14 ஆண்டு ஜெயில்

செக்ஸ் புகாரில் சிக்கிய சாமியாருக்கு 14 ஆண்டு ஜெயில்: அமெரிக்க கோர்ட்டு தீர்ப்பு


வாஷிங்டன், மார்ச்.10- அமெரிக்காவில் செக்ஸ் புகாரில் சிக்கிய இந்து மத சாமியார் ஒருவருக்கு அமெரிக்க கோர்ட்டு 14 ஆண்டு ஜெயில் தண்டனை விதித்தது. ரூ.5 கோடி ஜாமீனில் இருந்த அவர் தலைமறைவாகி விட்டார். அவரை கைது செய்ய பிடிவாரண்டு உத்தரவு பிறப்பிக்கப்பட்டது.

200 ஏக்கரில் ஆசிரமம்

அமெரிக்காவில் உள்ள டெக்சாஸ் நகரில் வசிப்பவர் பிரகாஷானந்த் சரசுவதி. 82 வயதான இவர் டெக்சாஸ் மாநிலத்தில் உள்ள ஆஸ்டின் நகரில் 200 ஏக்கரில் ஆசிரமம் நடத்தி வருகிறார். இவர் ஸ்ரீ ஸ்வாமி ஜி என்று அழைக்கப்பட்டு வந்தார்.

இவரது ஆசிரமத்தில் தங்கி வளர்ந்த 2 பெண்கள் ஷியாமா ரோஸ் (30). வெஸ்லா டென்னிசன் கசிமீர்(27). இவர்களது பெற்றோர் இந்த சாமியாரின் பக்தர்கள் என்பதால் அவர்கள் அங்கேயே தங்கி இருந்தனர்.

பாலியல் பலாத்காரம்

இந்த 2 பெண்களும் சாமியாரை பற்றி போலீசில் புகார் கொடுத்து இருந்தனர். அதில் 1990-ம் ஆண்டுகளில் அவர் தங்களை தொடர்ந்து பாலியல் பலாத்காரம் செய்ததாக குற்றஞ்சாட்டப்பட்டு இருந்தது.

இது தொடர்பாக அவர் மீது ஹூஸ்டன் நகர கோர்ட்டில் வழக்கு தொடரப்பட்டது. வழக்கை விசாரித்த நீதிபதி கடந்த விசாரணையின் போது அவர் குற்றவாளி என்று தீர்ப்பு அளித்தார்.

அப்போது தண்டனை குறித்து தீர்ப்பு கூறுவதை அவர் தள்ளி வைத்தார். இதை தொடர்ந்து அவர் ஜாமீன் கேட்டார். ரூ.5 கோடி ரொக்க ஜாமீனில் அவர் விடுதலை செய்யப்பட்டார்.

14 ஆண்டு ஜெயில்

நேற்று முன்தினம் அவருக்கு என்ன தண்டனை கொடுப்பது என்பது தொடர்பாக கோர்ட்டு கூடியது. அப்போது அவர் கோர்ட்டில் ஆஜராகவில்லை. 90 நிமிடம் கோர்ட்டு அவருக்காக காத்து இருந்தது. அதன் பிறகு அவருக்கு வழங்கப்பட்ட ஜாமீனை கோர்ட்டு ரத்து செய்தது. அவரை கைது செய்ய பிடிவாரண்டு பிறப்பிக்கப்பட்டது. பிறகு அவருக்கு 14 ஆண்டு ஜெயில் தண்டனை விதிப்பதாக கோர்ட்டு தீர்ப்பு அளித்தது.

சாமியார் இந்திய பாஸ்போர்ட்டை பயன்படுத்தி நாட்டை விட்டு ஓடி இருப்பார் என்று சந்தேகிக்கப்படுகிறது. அவரது அமெரிக்க பாஸ்போர்ட்டு கோர்ட்டில் தாக்கல் செய்யப்பட்டு உள்ளது.

தினதந்தி

எங்க போனாலும் திருந்த மாட்டாணுகளே.இவனுகளையெல்லாம் பார்த்த இடத்தில் சுடனும்