இனி ஒரு பிறவி.....!

by D.SABARINATHAN Wed Mar 09, 2011 2:20 pm

இந்த எழுத்துக்கள்
இருகண்டங்களின்
வேறுபாடுகளில்லை;
ஒரு பேருந்து நிறுத்த
நிகழ்வுகளின் ஒப்பீடு!

என் உடம்பு மட்டும் பேருந்தினுள்;
கண்களில்
வெளிநிகழ்வின் பதிவுகள்!

கூட்டநெரிசலின் குறியீடு-
என் மடியில் ஒரு குழந்தை!

கால் தடுமாறி கையில்
அலுமினியத்தட்டோடு ஒரு குழந்தை!

காற்றுவர திறக்கப்பட்ட ஜன்னல்கள்
'காசு' என்றதும் மூடிக்கொண்டது!

என் பாதங்களில் படரும்
பிஞ்சு விரல்கள்.............

பார்க்கிறேன் குழந்தைகளை
ஒன்று மடியிலும்,
மற்றொன்று காலடியிலும்!
அடுத்தநொடி தராசாகும் கண்கள்!

மடிகுழந்தைக்கு மையிட்ட
பவுடர்பூச்சு முகம்;
காலடிகுழந்தைக்கு
சிக்கெடுக்கப்படாத தலைமுடி!

மடிகுழந்தைக்கு பசியில்லை
ஆனாலும் கையில் பால்புட்டி;
காலடிகுழந்தைக்கு
ஒடிசலான அலுமினியத்தட்டு!

மடிகுழந்தைக்கு
கட்டைவிரலுக்கும் தங்கம்;
காலடி குழந்தைக்கு
நறுக்கப்படாத நகஇடுக்கில் அழுக்கு!

மடிகுழந்தைக்கு
காரில் இருந்து உலகம் பார்க்க ஆசை;
காலடி குழந்தைக்கு
கார் பார்க்க!....................
கணப்பொழுதின் ஒப்பீடுகள்
கனமானது மனதிற்கு!
என் மேல்'பை' சில்லறைகளின்
மின்னல் வேக பரிமாற்றம் தட்டிற்கு!

தயங்கிச்செல்லும் பிஞ்சுபாதங்கள் முன்
பாதைகள் இல்லை?......
வறுமையை வசனங்களில் அடக்கிவிட்டோம்;
வார்த்தையின்றி ஊமையானது!

பிஞ்சுஇதழ்கள்
உச்சரிப்பின்றி ஓலமிட்டது எதை?
வடியும் கண்ணீரைத்துடைக்கிறேன்
யாருக்கும் சுமயாக்காமல்!
கண்ணீர் கறை
இங்கு படிக்கிறது;பதிகிறது!

இனி ஒரு பிறவிவேண்டாம்
இதைப்போல அனுபவிக்க!.........

by நியாஸ் அஷ்ரஃப் Wed Mar 09, 2011 6:11 pm

D.SABARINATHAN wrote:

தயங்கிச்செல்லும் பிஞ்சுபாதங்கள் முன்
பாதைகள் இல்லை?......
வறுமையை வசனங்களில் அடக்கிவிட்டோம்;
வார்த்தையின்றி ஊமையானது!

உண்மையான உருக்கமான வரிகள்..
வறுமையை வசனங்களில்தான் அடக்கி வைத்திருக்கிறோம் நாம் வெறும் வாய்பேச்சோடு.

எதன்பாடு இந்த ஏற்றத்தாழ்வுகள் என்று யோசித்து யோசித்து ஒன்றும் புரியாமல் போகிறது.
வறுமையும் ஏற்றத்தாழ்வுகளும் எடுத்துரைத்த விதம் மிகவும் அருமை நண்பரே .. மிக்க நன்றி உங்கள் வரிகளுக்கு..

by D.SABARINATHAN Wed Mar 09, 2011 6:36 pm

நியாஸ் அவர்களுக்கு என் நன்றிகள்!

by மஞ்சுபாஷிணி Wed Mar 09, 2011 10:30 pm

சபரி மனதை கனமாக்கும் வரிகள்பா....
ஒப்பீட்டு நம் மனதில் ஏன் சோகம்

வசதி உள்ள குழந்தைக்கு கேட்பதெல்லாம் கிடைத்துவிடும்
ஏழைக்குழந்தையின் கனவோ வலிக்கும் வயிற்றுப்பசி தீருவது மட்டுமே...

அதை கூட செய்ய இயலாத ஜடங்களாகி நிற்கிறோம் தலைகுனிந்து...

மனதை கனமாக்கும் வரிகளை அழகாய் அமைத்து சிந்திக்கவும் வைத்த சபரிக்கு அன்பு வாழ்த்துக்கள்.

by D.SABARINATHAN Thu Mar 10, 2011 6:28 pm

மஞ்சுபாஷிணி wrote:சபரி மனதை கனமாக்கும் வரிகள்பா....
ஒப்பீட்டு நம் மனதில் ஏன்
வசதி உள்ள குழந்தைக்கு கேட்பதெல்லாம் கிடைத்துவிடும்
ஏழைக்குழந்தையின் கனவோ வலிக்கும் வயிற்றுப்பசி தீருவது மட்டுமே...

அதை கூட செய்ய இயலாத ஜடங்களாகி நிற்கிறோம் தலைகுனிந்து...

மனதை கனமாக்கும் வரிகளை அழகாய் அமைத்து சிந்திக்கவும் வைத்த சபரிக்கு அன்பு வாழ்த்துக்கள்.