ராமேஸ்வரத்தில் அரிய வகை மீன் டன் கணக்கில் சிக்கியது : மீனவர்கள் மகிழ்ச்சி

**சிவா** · **சிவா** Mon Mar 07, 2011 6:46 pm

ராமேஸ்வரம் : ராமேஸ்வரத்திலிருந்து மீன் பிடிக்கச் சென்ற மீனவர் வலையில், அரிய வகை கூரல் மீன்கள் டன் கணக்கில் சிக்கின. மீனின் வயிற்றில் உள்ள காற்றுப்பை, மருந்துக்கு பயன்படுவதால் பல லட்சத்திற்கு விலை போனது. ராமேஸ்வரத்திலிருந்து நேற்று முன்தினம் ஏராளமான படகுகளில் மீனவர்கள் மீன் பிடிக்கச் சென்றனர். தற்போது, அதிகம் கிடைக்கும் பேச்சாளை மீன்களை பிடிக்க, தடை செய்யப்பட்ட இரட்டை மடி வலைகளையே மீனவர்கள் பயன்படுத்தி வருகின்றனர். நேற்று இரட்டை மடி மீன்பிடிப்பில் ஈடுபட்ட மீனவர் ஒருவரின் படகில், அரிய வகை கூரல் மீன்கள் டன் கணக்கில் பிடிபட்டன.

வலையில் சிக்கிய தலா மூன்று கிலோ எடையுள்ள கூரல் மீன்களை, கிலோ 200 ரூபாய்க்கு வியாபாரிகள் விலைக்கு வாங்கிச் சென்றனர். கூரல் மீன்கள், கடலில் கூட்டமாக ஓரிடத்திலிருந்து மற்றொரு இடத்திற்கு இடம்பெயரும் போது, கடல் மேல்மட்டத்தில் நீந்திச் செல்லும் போது, கடல் நீரில் சிவப்பு நிறத்தில் தனியாகத் தெரியும். கூட்டமாக வரும் மீன்களை பார்த்தவுடன், மீனவர்கள் வலையை கடலில் போட்டு, மீன்களை பிடிப்பது வழக்கம். நேற்று பிடிபட்டது சிறிய அளவு மீன்களாக இருந்தாலும் இவ்வகை மீன்கள் ஆறடி நீளத்தில் 60 கிலோ எடை வரை வளரும் தன்மையுடையது.

பெரிய அளவு மீன்கள் வலைக்குள் சிக்கும் போது, தனது வயிற்றில் உள்ள காற்றுப்பையை மூச்சிழுத்து தம் கட்டி, உப்பச் செய்து, உடலின் முழு பலத்தையும் வாய் பகுதிக்கு கொண்டு வந்து, பற்களினால் எப்படிப்பட்ட வலையையும் கிழித்துக் கொண்டு வெளியேறி தப்பி விடும். கூரல் மீனின் வயிற்றுக்குள் இருக்கும் நெட்டி எனப்படும் காற்றுப்பை, மருத்துவத் துறையில் அறுவை சிகிச்சைக்குரிய மருந்துகள் தயாரிக்க பயன்படுத்தப்படுவதால், இதற்கு அதிக விலை கிடைக்கும். ராமேஸ்வரம் கடல் பகுதியில் பேச்சாளை மீன்களை மட்டுமே இரட்டை மடியில் பிடித்து வந்த நிலையில், அரிதாக கிடைக்கக்கூடிய கூரல் மீன் நேற்று மூன்று டன் வரையில் சிக்கியதால், மீனவர்கள் மகிழ்ச்சியில் உள்ளனர்.