வேண்டாம் மானிடப்பிறவி.

by kavimuki Mon Mar 07, 2011 5:02 pm

வா ஜோடிக்குருவி
வானத்தில் கடவுள்
இருக்கிறாராம்

இப் பிறவியிலே
மானிடரை போன்று வாழனுமென
மன்றாடுவோம்

அதற்கான பட்டியலை
சேர்த்துள்ளேன் அமைதியாக
கேள்

அவர்களைப்போல்
அனுதினத்துக்கு ஒரு ஆடை
வேண்டும்

அரை கிலோ மீட்டர்க்கும்
ஆள் சுமக்கும் வாகனம்
வேண்டும்.

திருமணம் என்பது
திருவிழாவாக நடக்க
வேண்டும்

என் ஆசைகள் எதையும்
மறைக்காமல் கடவுளிடம்
சொல்வேன் என

கூறிச்சென்ற குருவியே
ஏன் தலை குனிந்து
நிற்கிறாய்

மானிடப்பிறவியை விட
மகத்தானது நம்
பிறவிதானாம்

நம் பிறவியில்
ஒருவருக்கொருவர் ஏய்த்துப் பிழைக்க
தேவையில்லையாம்

எவன் உயர்ந்தவன்
தாழ்ந்தவன் என்ற
வகையில்லையாம்

பல மாடியில் ஒருவரும்
பனி, மழைகளில் ஒருவரும்
வாழும் நிலையில்லையாம்

உணவுக்காக உன் காலை
தொட்டு வணங்குமளவிற்கு-நம்
வாழ்க்கையில்லையாம்

இதைவிட... பசி வரும்போது
நம்மைப்போல் பகிர்ந்துண்ண
வழியில்லையாம்

வேதனையுடன் சொல்கிறேன்
வேண்டாம் ஜோடியே
மானிடப்பிறவி........

வேதனைகளை உணர்ந்தால்
அவன் நிச்சயம் ஆவான்
துறவியே.....

by பிரகாசம் Mon Mar 07, 2011 5:08 pm

நிதர்சன உண்மை வேண்டாம் மானிடப்பிறவி. 677196

by kavimuki Mon Mar 07, 2011 5:14 pm

நன்றி நண்பரே

by மஞ்சுபாஷிணி Mon Mar 07, 2011 5:16 pm

அருமையான மற்றொரு கவிதை கவிமுகியிடமிருந்து....
மனிதவாழ்க்கை மண்டியிட்டு ஏய்த்து பிழைத்து மனிதம் மறந்து மிருகமாய் மாறி மதக்கலவரத்தில் தொடங்கி வரதட்சணையில் முடித்து ஏழைப்பணக்காரன் பாகுபாடு பார்த்து இப்படி இன்னும் பட்டியல் நீண்டுக்கொண்டே தான் இருக்கும்.... இத்தனையும் இல்லாமல் ஒருவன் வாழ்கிறான் என்றால் கண்டிப்பாக அவன் துறவியே என்று அழகுடன் முடித்து மானிடப்பிறவியும் மகத்தானது தான் ஆனால் மனிதன் தன்னை உணர்ந்து பண்பட்டு வாழக்கற்றுக்கொண்டால் அன்பை விதைத்து அன்பையே மலரச்செய்தால் மானிடவாழ்க்கை மகத்தானதாகும்...

வரிகளில் உயிர்ப்பு
சொல்லும் வார்த்தைகளில் தெளிவு
நடையிலோ விறுவிறுப்பு
பொருத்தமான படம் இட்டதிலும் தெரிகிறது சிரத்தை...
மிக அருமையான கவிதை தந்தமைக்கு அன்பு வாழ்த்துக்கள் கவிமுகி....