தேர்தல் பாதுகாப்பு பணிக்காக துணை ராணுவப்படையினர் எந்திர துப்பாக்கிகளுடன் சென்னை வருகை

தேர்தல் பாதுகாப்பு பணிக்காக துணை ராணுவப்படையினர் எந்திர துப்பாக்கிகளுடன் குஜராத்தில் இருந்து ரெயில் மூலம் நேற்று சென்னை வந்து சேர்த்தனர்.

துணை ராணுவ படை

தமிழகத்தில் சட்டமன்ற தேர்தலையொட்டி முதல் கட்ட மதிப்பீட்டின்படி, பாதுகாப்பு உள்ளிட்ட பணிகளை மேற்கொள்வதற்காக 266 கம்பெனி துணை ராணுவ படையை தேர்தல் ஆணையம் மத்திய அரசிடம் கேட்டிருந்தது. அதன்படி மத்திய அரசு ஒரு கம்பெனியில் 100 போலீஸ்காரர்கள் வீதம் 266 கம்பெனியில் மொத்தம் 26600 போலீஸ்காரர்கள் அடங்கிய குழுவை தமிழகத்திற்கு அனுப்புவதாக உறுதியளித்திருந்தது.

அதன்படி, முதல் கட்டமாக 50 கம்பெனி மத்திய போலீஸ் படையினர் தமிழகம் வருகிறார்கள். அடுத்த 3 நாட்களுக்குள் 35 கம்பெனி போலீஸ் படை வந்துவிடும். மீதமுள்ள போலீஸ் படையினர் 13-ந் தேதிக்குள் வந்து சேர்ந்து விடுவார்கள். அவர்கள் வந்த பிறகே அவர்களை எந்தெந்த மாவட்டங்களுக்கு அனுப்புவது என்று முடிவு செய்வார்கள்.


தேர்தல் பாதுகாப்பு பணி

முதலில் பதற்றம் அதிகமான மாவட்டங்களுக்கு துணை ராணுவ படை அனுப்பப்படும். தேவைப்பட்டால் கூடுதலாக துணை ராணுவப்படையினர் வரவழைக்கப்படுவார்கள். கடந்த 2006-ம் ஆண்டு நடந்த தேர்தலின் போது 196 கம்பெனி மத்திய போலீஸ் படையினர் பாதுகாப்பு பணியில் ஈடுபடுத்தப்பட்டனர்.

குஜராத் மாநிலம் அகமதாபாத்தில் இருந்து நவஜீவன் எக்ஸ்பிரஸ் மூலம் ஒரு கம்பெனி துணை ராணுவ படை போலீசார் நேற்று சென்னை சென்டிரல் ரெயில் நிலையத்திற்கு மாலை 4 மணியளவில் வந்து இறங்கினர். அதில் மொத்தம் 100 போலீஸ்காரர்கள் அடங்கிய குழு இருந்தனர். பெட்டி படுக்கை, மூட்டைமுடிச்சுகளுடன் வந்திருந்தனர். தேர்தல் பாதுகாப்பு பணிக்காக தமிழகம் வந்திருப்பதாக அவர்கள் கூறினர்.


சென்னை வந்தனர்

ஏற்கனவே 10 துணை ராணுவ படை போலீசார் சென்னை வந்திருக்கின்றனர். இன்னும் எஞ்சியுள்ள கம்பெனிகள் ஒன்றன்பின் ஒன்றாக சென்னை வருகின்றனர். அவர்கள் தமிழகத்தில் பல்வேறு மாவட்டங்களுக்கு தேர்தல் பாதுகாப்பு பணிக்காக அனுப்பி வைக்கப்படுவார்கள் என்றும் தெரிவித்தனர்.

ஒவ்வொரு போலீசாரும் பாதுகாப்புக்காக தங்கள் கைகளில் எந்திர துப்பாக்கிகளை ஏந்தி இருந்தனர். காக்கி உடையும், தொப்பியும் அணிந்து கம்பீரமாக காணப்பட்டனர். பின்னர் லாரிகளின் மூலம் அங்கிருந்து நாமக்கல் மாவட்டத்துக்கு அனுப்பி வைக்கப்பட்டனர்.