லிபியாவில் கடாபி வன்முறை உச்சகட்டம்:ஓயாத குண்டு சத்தம்: பலி அதிகரிப்பு

கெய்ரோ:லிபியாவில் போராட்டக்காரர்களின் ஆக்கிரமிப்பில் உள்ள திரிபோலி நகரை மீட்க கடாபியின் ஆதரவாளர்கள், போராட்டக்காரர்கள் இடையே நடந்த பயங்கர மோதலில் 49 பேர் பலியாயினர்.லிபியா தலைவர் கடாபியை நாட்டை விட்டு ஓடும்படி போராட்டக்காரர்கள் போராடி வருகின்றனர். ஆனால், போராட்டக்காரர்களுக்கு எதிராக ஆதரவாளர்களையும், பாதுகாப்பு படையினரையும் கடாபி தூண்டி விடுவதால், வன்முறை உச்சகட்டத்தை அடைந்து உயிர்பலி அதிகரித்து வருகிறது.லிபியாவின் மேற்கு பகுதி கடாபியின் ஆதரவாளர்கள் கையில் உள்ளது. கிழக்கு பகுதி போராட்டக்காரர்களின் கையில் உள்ளது.

கிழக்கில் போராட்டக்காரர்களின் ஆக்கிரமிப்பில் உள்ள திரிபோலி அருகே 50 கி.மீ .,தொலைவில் உள்ள அல்ஜாவியா நகரை மீட்க கடாபியின் ஆதரவாளர்கள் புதிய வன்முறையில் ஈடுபட்டுள்ளனர்.இதன் முதல் கட்டமாக, நேற்று காலை கடாபியின் ஆதரவாளர்கள் சுற்றி வளைத்தனர். இங்கிருந்து முன்னேறி இதுவரை கடாபியின் ஆதரவாளர்கள் கட்டுப்பாட்டிற்குள் கொண்டு வர முடியாத திரிபோலியை கைப்பற்றப் போவதாக பாதுகாப்பு படை தெரிவித்துள்ளது. அதனால் பயங்கர மோதல் நடக்கிறது.அஸ் ஜவியா நகரை கைப்பற்ற நடந்த போராட்டத்தில் பயங்கர ஆயுதங்களை இருதரப்பிலும் பயன்படுத்தினர்.

இதில், 30 பேர் பலியாயினர். போராட்டக்காரர்களின் கையில் உள்ள, பெங்காசி நகருக்கு வெளியே உள்ள இரண்டு ராணுவ கிடங்குகளில் ஏற்பட்ட வெடி விபத்தில் 19 பேர் பலியாயினர்.எண்ணெய் வளம் நிறைந்த பிரிகா, அஸ் ஜவியா போன்ற நகரங்களை கடாபியின் ஆதரவாளர்கள் தங்கள் கட்டுப்பாட்டிற்குள் கொண்டு வர பயங்கர வன்முறையில் இறங்கியுள்ளனர்.

கிழக்கில் ராஸ் லனூப் எண்ணெய் வளமிக்கது. இந்நகரை போராட்டக்காரர்கள் தங்கள் கையில் வைத்துள்ளனர். போராட்டக்காரர்களின் ஆக்கிரமிப்பில் உள்ள அஜ்டாபையா நகரில் லிபியா படைகள் விமான தாக்குதல் நடத்தின. இச்சம்பவத்தில் உயிர்பலி எதுவும் நடக்கவில்லை."ஆபரேஷன் ஒடிசி டான்'லிபியாவில் இருந்து துனிசியா எல்லை வழியாக அடைக்கலம் தேடி வெளியேறுபவர்களுக்கு, மனிதாபிமான அடிப்படையில் உதவும் வகையில் அமெரிக்கா இரண்டு ராணுவ விமானங்களை அனுப்பியுள்ளது. இதற்கு "ஆபரேஷன் ஒடிசி டான்' என்று பெயரிட்டுள்ளது.

லிபியாவில் பிப்., 5ம் தேதிக்கு பின்னர் கடாபிக்கு எதிராக போராட்டக்காரர்கள் களத்தில் குதித்தனர். ஆனால், தற்போது தான் கடாபி மற்றும் அவரது குடும்பத்திற்கு எதிராக இன்டர்போல் "ஆரஞ்ச் நோட்டீஸ்' விடுத்துள்ளது.இன்டர்போல் சட்டத்திற்கு உட்பட்ட 188 நாடுகளில் கடாபி மற்றும் அவரது குடும்பத்தினரை அனுமதிக்க கூடாது என்பதை எச்சரிக்க இந்த நோட்டீஸ் வெளியிடப்பட்டுள்ளது.லிபியாவின் நிலைமையை தொடர்ந்து கண்காணித்து, நேட்டோ நாடுகளுடன் பேசி வருவதாக அமெரிக்கா தெரிவித்துள்ளது.

தினமலர்