மேலூர் அருகே நான்கு வழிச்சாலையில் அடுத்தடுத்து விபத்து: நான்கு பேர் பலி

மேலூர்: நான்கு வழிச்சாலையில் திடீரென குறுக்கே பாய்ந்த லாரி மீது கார் மோதியதில் கணவன், மனைவி மற்றும் டிரைவர் பலியாகினர். மற்றொரு விபத்தில் பைக்கில் வந்தவர் இறந்து போனார்.

தூத்துக்குடியை சேர்ந்தவர் சதீஷ்குமார்(30). அங்கு சரஸ்வதி டிரேடர்ஸ் என்னும் டைல்ஸ் நிறுவனத்தை நடத்தி வருகிறார். இவரது பெரியப்பா சென்னையில் 20 நாட்களுக்கு முன்பு இறந்து விட்டார். அவரது இறுதி சடங்கில், கலந்து கொள்வதற்காக சதீஷ்குமார், மனைவி இசக்கி தேவி(27)யுடன் நேற்று காலை 8.45 மணிக்கு இன்னோவா காரில் மேலூர் வழியாக சென்றார். இவர்களுக்கு திருமணமாகி ஏழு மாதங்களே ஆகிறது. தூத்துக்குடி அழகேசபுரத்தை சேர்ந்த டிரைவர் பாபுசங்கர்(21), காரை ஓட்டி வந்தார். கச்சிராயன்பட்டியில் இருந்து விறகு ஏற்ற, ஐந்து லோடு மேன்களுடன் ஒரு லாரி நான்கு வழிச்சாலையில் எதிர் திசையில் வந்துள்ளது. மேலூருக்கு பிரியும் இடத்தில் எதிரில் வந்த இன்னோவா கார், வேகமாக வந்த லாரியின் நடுப்பகுதியில் மோதி சுக்கு நூறாக உடைந்தது. இதில், காரில் இருந்த சதீஷ்குமார், டிரைவர் பாபுசங்கர் சம்பவ இடத்திலேயே இறந்தனர். அரசு ஆஸ்பத்திரி கொண்டு செல்லும் வழியில் இசக்கி தேவி இறந்தார். லாரியில் பயணம் செய்த மலைச்சாமி உட்பட 5 லோடுமேன்கள் தூக்கி வீசப்பட்டு படுகாயமடைந்தனர். நத்தத்தை சேர்ந்த லாரி டிரைவர் சேவுகமூர்த்தியை மேலூர் போலீசார் கைது செய்து விசாரித்தனர்.

மற்றொரு விபத்து: மேலவளவு பட்டூரைச் சேர்ந்தவர் பாஸ்கரன் மகன் முருகேசன்(22). நேற்று பகல் 3.30 மணிக்கு மோட்டார் சைக்கிளில் வெள்ளிரிபட்டி வழியாக நான்கு வழிச்சாலையில் சென்றுள்ளார்.(ஹெல்மெட் அணியவில்லை). பின்னால், டி.வி.எஸ்., நிறுவனத்தில் டயர் ஏற்றுவதற்காக வந்த லாரி, இவர் மீது மோதியது. இதில் தலையில் பலத்த காயங்களுடன் மதுரை அரசு ஆஸ்பத்திரியில் அனுமதிக்கப்பட்டு, முருகேசன் இறந்தார். திருவண்ணாமலையை சேர்ந்த லாரி டிரைவர் செந்தில்குமாரை(27), மேலூர் போலீசார் கைது செய்து விசாரித்து வருகின்றனர். மதுரை -திருச்சி நான்கு வழிச்சாலையில் ஒத்தக்கடை, மேலூர், கருங்காலக்குடி, கொட்டாம்பட்டி என ஊர்கள் திரும்பும் இடத்தில் முறையான சிக்னல் வசதி செய்து தரப்படவில்லை. அவ்விடங்களில் அமைக்கப்பட்ட ஹைமாஸ் விளக்குகள் ஒன்றரை வருடங்களாக எரியவில்லை. ரோடுகள் பிரியும் இடங்களில் ஒளிரும் ஸ்டிக்கர்கள் கூட அமைக்கப்படவில்லை. ஆனால், சுங்கச்சாவடியில் சுங்க வரி தொகை மட்டும், மற்ற சாவடிகளை விட அதிகமாக வசூல் செய்யப்பட்டு வருகிறது.