பாகிஸ்தானில் மசூதியில் குண்டு வெடிப்பு: 8 பேர் பலி; 30 பேர் காயம்

**சிவா** · **சிவா** Sat Mar 05, 2011 10:23 am

பெஷாவர், மார்ச்.5- பாகிஸ்தானில் பெஷாவர் நகரில் இருந்து 15 கி.மீ. தொலைவில் உள்ள நவ்ஷெரா என்ற இடத்தில் சூபி மசூதி அமைந்துள்ளது. இங்கு, வெள்ளிக்கிழமை தொழுகைக்காக நேற்று நண்பகலில் ஆயிரத்துக்கும் மேற்பட்டோர் கூடி இருந்தனர். அப்போது, `திடீர்` என பலத்த சப்தத்துடன் பயங்கரமாக குண்டு வெடித்தது. அதனால், மக்கள் சிதறி ஓடினார்கள். இந்த குண்டு வெடிப்பில் 8 பேர் உடல் சிதறி பலியானார்கள்.

மேலும், 30 பேர் படுகாயம் அடைந்தனர். நவ்ஷெராவில் உள்ள பல்வேறு மருத்துவமனைகளில் அவர்கள் அனுமதிக்கப்பட்டுள்ளனர். அவர்களில் குழந்தைகள் உட்பட 8 பேருடைய நிலைமை கவலைக்கிடமாக உள்ளது. குண்டு வெடிப்பு நடந்த இடத்தில் இருந்து பல கி.மீ. தொலைவு வரை சப்தம் கேட்டதாக மக்கள் தெரிவித்தனர். குண்டு வெடித்தபோது, மசூதியில் உள்ள உணவு கூடத்தில் ஏராளமானோர் இருந்தனர். இந்த குண்டு வெடிப்புக்கு எந்தவொரு தீவிரவாத இயக்கமும் பொறுப்பேற்கவில்லை.

**சிவா** · **சிவா** Sat Mar 05, 2011 10:24 am

தீவிரவாத தாக்குதல்களுக்காக பாகிஸ்தானில் இருந்து இந்தியாவுக்குள் கள்ள ரூபாய் நோட்டுகள் ஊடுருவல் - அமெரிக்கா எச்சரிக்கை

வாஷிங்டன், மார்ச்.5- பாகிஸ்தானில் இந்திய கள்ள ரூபாய் நோட்டுகள் அச்சடிக்கப்பட்டு பல்வேறு நாடுகளின் வழியாக இந்தியாவுக்குள் கொண்டு வரப்படுவதாக அமெரிக்கா எச்சரிக்கை விடுத்துள்ளது.

அமெரிக்க வெளியுறவுத்துறை

இந்தியாவுக்குள் பல்வேறு முக்கிய நகரங்களில் தாக்குதல்களை நடத்த பாகிஸ்தான் தீவிரவாதிகள் சதி செய்து வருகின்றனர். அதற்கான நிதி வசதியை கள்ள ரூபாய் நோட்டுகள் மற்றும் போதைப் பொருள் கடத்தல் மூலமாக ஏற்படுத்திக் கொள்கின்றனர். ஏற்கனவே, வெளிநாடுகளில் உள்ள கறுப்பு பண விவகாரம் குறித்து கருத்து தெரிவித்த சுப்ரீம் கோர்ட்டு, போதைப்பொருள் கடத்தல் மற்றும் தீவிரவாதம் குறித்து மத்திய அரசை எச்சரித்தது.

இந்த நிலையில், அமெரிக்காவும் இதே கருத்தை தெரிவித்துள்ளது. இது தொடர்பாக, அமெரிக்க வெளியுறவு துறையின் `சர்வதேச போதைப்பொருள் கட்டுப்பாடு அமைப்பு' வெளியிட்டுள்ள 2011-ம் ஆண்டுக்கான அறிக்கையில் கூறப்பட்டுள்ளதாவது:-

பாகிஸ்தானில் தயாராகிறது

எளிதில் கண்டுபிடிக்க முடியாத அதிகபட்ச தரமுடைய கள்ள நோட்டுகள் சவாலை இந்தியா எதிர் கொண்டுள்ளது. பாகிஸ்தானில் அச்சடிக்கப்படும் இந்த கள்ள நோட்டுகள் அனைத்தும், சர்வதேச அளவில் பல்வேறு நாடுகளின் வழியாக இந்தியாவுக்குள் கொண்டு செல்லப்படுகின்றன. இத்தகைய கள்ள நோட்டுகளை தீவிரவாதிகள், கிரிமினல்கள் போன்றோர் நல்ல ரூபாய்களாக மாற்றிக் கொள்கின்றனர்.

இந்த பண பரிவர்த்தனையால் நாட்டின் அமைதிக்கு மட்டுமல்லாமல் இந்திய பொருளாதாரத்துக்கே அச்சுறுத்தல் ஏற்பட்டுள்ளது. கறுப்பு பணம், எல்லையில் உள்ள ரகசிய வழிகள், பண பரிமாற்றம் போன்றவை மூலமாக இந்தியாவுக்குள் கள்ள நோட்டுகள் செல்கின்றன. எனவே, மொபைல் பேங்கிங் வசதி உள்ளிட்ட மாற்று பண பரிமாற்ற சேவை வசதிகளை இந்தியா மேம்படுத்துவது அவசியம்.

வெளிநாட்டு பணம்

வரிஏய்ப்பு, மோசடி, சைபர் குற்றம் போன்ற பொருளாதார குற்றங்களே இந்தியாவின் கறுப்பு பண வர்த்தனைக்கு முக்கியமாக உள்ளது. இது தவிர ஆள் கடத்தல், போதைப்பொருள் கடத்தல், சட்டவிரோத வர்த்தகம், வைரம் உள்ளிட்ட விலையுயர்ந்த ஆபரணங்கள் கடத்தல், ஊழல் போன்றவையும் இந்தியாவில் கறுப்பு பண புழக்கத்துக்கு காரணங்களாக உள்ளன.

உள்நாட்டிலும், வெளிநாடுகளிலும் செயல்படும் தீவிரவாத அமைப்புகளுக்கு குறிப்பிடத்தக்க இலக்காக இந்தியா உள்ளது. எனவே, 1976-ம் ஆண்டு அன்னிய பங்களிப்பு சட்டத்துக்கு ஜனாதிபதி ஒப்புதலை இந்திய அரசு பெற வேண்டும். அதன் மூலமாக, எந்தவொரு தொண்டு நிறுவனமும் வெளிநாட்டில் இருந்து அரசியல், கலாசார, பொருளாதார, கல்வி ரீதியாக பெறும் பண பரிவர்த்தனையை கண்காணிக்க முடியும்.

இவ்வாறு அந்த அறிக்கையில் கூறப்பட்டுள்ளது.