பங்களாதேஷின் பரிதாப தோல்வி

மிர்புர்: உலக கோப்பை லீக் போட்டியில் வெஸ்ட் இண்டீஸ் பந்துவீச்சில் அதிர்ந்த வங்கதேச அணி 58 ரன்களுக்கு சுருண்டது. பின் சுலப இலக்கை விரட்டிய வெஸ்ட் இண்டீஸ் அணி 9 விக்கெட் வித்தியாசத்தில் வெற்றி பெற்றது.

இந்தியா, இலங்கை, வங்கதேச மண்ணில் பத்தாவது உலக கோப்பை கிரிக்கெட் தொடர் நடக்கிறது. மிர்புரில் உள்ள ஷேர்-இ-பங்களா தேசிய மைதானத்தில் நேற்று நடந்த "பி' பிரிவு லீக் போட்டியில் (பகலிரவு) வங்கதேசம், வெஸ்ட் இண்டீஸ் அணிகள் மோதின. "டாஸ்' வென்ற வங்கதேச கேப்டன் சாகிப் அல் ஹசன், பேட்டிங் தேர்வு செய்தார்.

பேட்டிங் மோசம்:

முதலில் பேட்டிங் செய்த வங்கதேச அணியை, வெஸ்ட் இண்டீஸ் பவுலர்கள் போட்டுத் தாக்கினர். நெதர்லாந்துக்கு எதிராக "ஹாட்ரிக்' சாதனை படைத்த கீமர் ரோச், ஆட்டத்தின் முதல் ஓவரில் தமிம் இக்பாலை "டக்-அவுட்' செய்தார். இம்ருல் கைய்ஸ் (5), முஷ்பிகுர் ரஹிம் (0) உள்ளிட்ட "டாப்-ஆர்டர்' பேட்ஸ்மேன்கள் டேரன் சமி வேகத்தில் வெளியேறினர். சிறிது நேரம் தாக்குப் பிடித்த ஜுனாய்டு சித்திக் (25), ரோச் பந்தில் எல்.பி.டபிள்யு., முறையில் அவுட்டானார்.

பென் துல்லியம்:

அடுத்து வந்த வங்கதேச கேப்டன் சாகிப் அல் ஹசன் (8), பென் சுழலில் போல்டானார். ரகிபுல் ஹசன் (4), முகமது அஷ்ரபுல் (11) உள்ளிட்டோரும் நீண்ட நேரம் நிலைக்கவில்லை. நயீம் இஸ்லாம் (1), ஷபியுல் இஸ்லாம் (0), ருபெல் ஹொசைன் (0) உள்ளிட்ட "டெயிலெண்டர்கள்' பென் சுழலில் பெவிலியன் திரும்பினர். வங்கதேச அணி 18.5 ஓவரில் 58 ரன்களுக்கு சுருண்டது. வெஸ்ட் இண்டீஸ் சார்பில் பென் 4, டேரன் சமி, கீமர் ரோச் தலா 3 விக்கெட் வீழ்த்தினர்.

சுலப வெற்றி:

மிக எளிதான இலக்கை விரட்டிய வெஸ்ட் இண்டீஸ் அணிக்கு டேவான் ஸ்மித் (6) ஏமாற்றம் அளித்தார். மறுமுனையில் அதிரடி காட்டிய கிறிஸ் கெய்ல் வெற்றிக்கு வித்திட்டார். வெஸ்ட் இண்டீஸ் அணி 12.2 ஓவரில் ஒரு விக்கெட் இழப்புக்கு 59 ரன்கள் எடுத்து சுலப வெற்றி பெற்றது. கெய்ல் (36), டேரன் பிராவோ (9) அவுட்டாகாமல் இருந்தனர். வங்கதேசம் சார்பில் நயீம் இஸ்லாம் ஒரு விக்கெட் வீழ்த்தினார். ஆட்ட நாயகனாக வெஸ்ட் இண்டீசின் கீமர் ரோச் தேர்வு செய்யப்பட்டார்.

நான்காவது குறைந்த ஸ்கோர்

நேற்று 58 ரன்களுக்கு சுருண்ட வங்கதேச அணி, உலக கோப்பை வரலாற்றில், நான்காவது குறைந்தபட்ச ஸ்கோரை பதிவு செய்தது. இது, உலக கோப்பை அரங்கில் வங்கதேச அணியின் மோசமான ஸ்கோர். முன்னதாக கடந்த 2003ல் தென் ஆப்ரிக்காவுக்கு எதிராக 108 ரன்களுக்கு சுருண்டது.

உலக கோப்பை அரங்கில், "டாப்-5' குறைந்த ஸ்கோர்:

அணி எடுத்த ரன்கள் எதிரணி
1. கனடா 36 இலங்கை (2003)
2. கனடா 45 இங்கிலாந்து (1979)
3. நமீபியா 45 ஆஸ்திரேலியா (2003)
4. வங்கதேசம் 58 வெஸ்ட் இண்டீஸ் (2011)
5. ஸ்காட்லாந்து 68 வெஸ்ட் இண்டீஸ் (1999)

வங்கதேசம் "58'

நேற்று 58 ரன்களுக்கு சுருண்ட வங்கதேச அணி, மிர்புரில் உள்ள ஷேர்-இ-பங்களா தேசிய மைதானத்தில் மிகக் குறைந்த ஸ்கோரை பதிவு செய்தது. முன்னதாக கடந்த 2009ல் இலங்கை அணிக்கு எதிராக ஜிம்பாப்வே அணி 80 ரன்களுக்கு சுருண்டது.

மிர்புர் மைதானத்தில், "டாப்-5' குறைந்த ஸ்கோர்:

அணி ஸ்கோர் எதிரணி
வங்கதேசம் 58 வெஸ்ட் இண்டீஸ் (2011)
ஜிம்பாப்வே 80 இலங்கை (2009)
வங்கதேசம் 124 ஜிம்பாப்வே (2009)
ஸ்காட்லாந்து 132 வங்கதேசம் (2006)
வங்கதேசம் 137 நியூசிலாந்து (2008)

மோசமான ஸ்கோர்

நேற்று 58 ரன்களுக்கு சுருண்ட வங்கதேச அணி, சர்வதேச ஒருநாள் போட்டி கிரிக்கெட் அரங்கில் தனது மோசமான ஸ்கோரை பதிவு செய்தது. முன்னதாக கடந்த 2008ல் ஆஸ்திரேலியாவுக்கு எதிராக 74 ரன்களுக்கு சுருண்டது. இதன்மூலம் வங்கதேச அணி, 12வது முறையாக 100 ரன்களுக்கு குறைவான ஸ்கோரை பதிவு செய்தது.

ஸ்கோர் போர்டு

வங்கதேசம்

தமிம்(கே)சமி(ப)ரோச் 0(3)
இம்ருல்(கே)தாமஸ்(ப)சமி 5(8)
ஜுனாய்டு-எல்.பி.டபிள்யு.,(ப)ரோச் 25(27)
முஷ்பிகுர்(கே)சர்வான்(ப)சமி 0(4)
சாகிப்(ப)பென் 8(16)
ரகிபுல்(கே)போலார்டு(ப)சமி 4(17)
அஷ்ரபுல்(கே)தாமஸ்(ப)ரோச் 11(21)
நயீம்(கே)தாமஸ்(ப)பென் 1(4)
ஷபியுல்(கே)போலார்டு(ப)பென் 0(6)
அப்துர்-அவுட் இல்லை- 2(6)
ருபெல்(ப)பென் 0(2)
உதிரிகள் 2
மொத்தம் (18.5 ஓவரில் "ஆல்-அவுட்') 58
விக்கெட் வீழ்ச்சி: 1-0(தமிம்), 2-16(இம்ருல்), 3-25(முஷ்பிகுர்), 4-36(ஜுனாய்டு), 5-41(சாகிப்), 6-51(ரகிபுல்), 7-56(நயீம்), 8-56(அஷ்ரபுல்), 9-58(ஷபியுல்), 10-58(ருபெல்).
விக்கெட் வீழ்ச்சி: ரோச் 6-0-19-3, பென் 5.5-2-18-4, சமி 7-0-21-3.

வெஸ்ட் இண்டீஸ்

ஸ்மித்(ப)நயீம் 6(12)
கெய்ல்-அவுட் இல்லை- 37(36)
பிராவோ-அவுட் இல்லை- 9(26)
உதிரிகள் 7
மொத்தம் (12.2 ஓவரில், 1விக்.,) 59
விக்கெட் வீழ்ச்சி: 1-29(ஸ்மித்)
பந்துவீச்சு: நயீம் 6-1-14-1, ஷபியுல் 2--0-11-0, ருபெல் 1-0-12-0, அப்துர் 1-0-8-0, அஷ்ரபுல் 2-0-11-0, சாகிப் 0.2-0-1-0.

தினமலர்

நேத்து நடந்த போட்டியை பார்க்கும் பொது பங்க்லதேஷ் அணியினரின் ஆட்டம் காமெடியா இருந்துச்சு

வெஸ்ட் இண்டீஸ் எல்லோரும் சொன்னார்களாம் எவ்வளவு அடிச்சலும் தாங்குராணுங்க ரெம்ப நல்லவெண்ணு அதுதான் இந்த தோல்விக்கு காரணம்