சட்டசபை தேர்தல் முடியும் வரை இலவச கலர் டி.வி. வழங்கக் கூடாது

by **சிவா** Thu Mar 03, 2011 9:14 am

சட்டசபை தேர்தல் முடியும் வரை இலவச கலர் டி.வி. வழங்கக் கூடாது. தலைமை தேர்தல் அதிகாரி உத்தரவு

சென்னை, மார்ச் 3-

சட்டசபை தேர்தல் முடியும் வரை இலவச கலர் டி.வி. வழங்கக்கூடாது என்று தமிழக தலைமை தேர்தல் அதிகாரி பிரவீண்குமார் உத்தரவிட்டுள்ளார்.

இலவச கலர் டி.வி.

கடந்த 2006-ம் ஆண்டு சட்டசபை தேர்தலில், அனைவருக்கும் இலவச கலர் டி.வி. என்பது தி.மு.க.வின் முக்கிய தேர்தல் வாக்குறுதியாக இருந்தது. தி.மு.க. ஆட்சிக்கு வந்தால் தமிழகத்தில் உள்ள அனைத்து குடும்பங்களுக்கும் இலவச கலர் டி.வி. வழங்கப்படும் என்று அறிவிக்கப்பட்டது. அதன்படி, தி.மு.க. ஆட்சிக்கு வந்தவுடன் இலவச கலர் டி.வி. திட்டத்தை செயல்படுத்த முடிவு செய்யப்பட்டது.

அண்ணா பிறந்த நாளான செப்டம்பர் மாதம் 15-ந் தேதி இலவச கலர் டி.வி. வழங்கும் திட்டம் தொடங்கப்பட்டது. இதுவரை 5 கட்டங்களாக ஒரு கோடியே 52 லட்சத்து 25 ஆயிரம் குடும்பங்களுக்கு இலவச கலர் டி.வி. வழங்கப்பட்டு இருக்கிறது. இலவச டி.வி.க்களை அமைச்சர்கள் மற்றும் மாவட்ட கலெக்டர்கள் வழங்கி வருகிறார்கள். 6-வது கட்டமாக இந்த ஆண்டு 10 லட்சம் பேர்களுக்கு டி.வி. வழங்க ஏற்பாடு செய்யப்பட்டுள்ளது. அதற்கான கொள்முதல் பணிகளும் நடைபெற்று வருகின்றன.

தேர்தல் நடத்தை விதிமுறை

இதற்கிடையே, தமிழகம் உள்பட 5 மாநிலங்களுக்கான சட்டசபை தேர்தல் தேதி நேற்று முன்தினம் (செவ்வாய்க்கிழமை) அறிவிக்கப்பட்டது. தேர்தல் தேதி அறிவிக்கப்பட்டதும் உடனடியாக தேர்தல் நடத்தை விதிமுறை அமலுக்கு வந்துவிடும். அதன்படி, தமிழகத்தில் தேர்தல் நடத்தை விதிமுறை மார்ச் 1-ந்தேதி முதல் அமலுக்கு வந்துவிட்டது.

இந்த சூழ்நிலையில், சட்டசபை தேர்தல் முடியும் வரை இலவச கலர் டி.வி. வழங்கக்கூடாது என்று தமிழக தலைமை தேர்தல் அதிகாரி பிரவீண்குமார் உத்தரவு பிறப்பித்துள்ளார். இதுதொடர்பாக அவர் வெளியிட்டுள்ள அறிவிப்பில் கூறியிருப்பதாவது:-

டி.வி. வழங்க தடை

சட்டசபை தேர்தல் நடைமுறைகள் முடியும் வரையில் இலவச கலர் டி.வி.க்கள் வழங்குவதை உடனடியாக நிறுத்த வேண்டும் என்று மாவட்ட கலெக்டர்களும், துறைத்தலைவர்களும் கேட்டுக்கொள்ளப்படுகிறார்கள். இந்த விதிமுறையை மீறி எந்த அதிகாரியாவது இலவச டி.வி. வழங்கினால் அவர்கள் மீது கடும் ஒழுங்கு நடவடிக்கை எடுக்கப்படும்.

இவ்வாறு பிரவீண்குமார் கூறியுள்ளார்.

by **சிவா** Thu Mar 03, 2011 9:15 am

தமிழக சட்டசபை தேர்தல்: நாளை அனைத்து கட்சி கூட்டம். தலைமை தேர்தல் அதிகாரி ஏற்பாடு

தமிழக சட்டசபை தேர்தல் தொடர்பாக அனைத்து கட்சி ஆலோசனை கூட்டத்தை தலைமை தேர்தல் அதிகாரி பிரவீண்குமார் நாளை (வெள்ளிக்கிழமை) கூட்டியுள்ளார். இந்த கூட்டத்தில், தேர்தல் ஏற்பாடுகள், தேர்தல் நடத்தை விதிமுறைகள், அரசியல் கட்சிகளின் ஒத்துழைப்பு, தேர்தல் விளம்பரம் உள்ளிட்டவை குறித்து விரிவாக விவாதிக்கப்படுகிறது.

அனைத்து கட்சி கூட்டம்

தமிழக சட்டசபைக்கான தேர்தல் அடுத்த மாதம் (ஏப்ரல்) 13-ந் தேதி நடைபெறும் என்று இந்திய தேர்தல் ஆணையம் அறிவித்துள்ளது. வேட்பு மனு தாக்கல் வருகிற 19-ந் தேதி தொடங்குகிறது. தேர்தல் தேதி அறிவிக்கப்பட்டுள்ளதாக அரசியல் கட்சிகள் தேர்தல் பிரசார பணிகளை தீவிரமாக மேற்கொண்டு வருகின்றன. கூட்டணி பேச்சுவார்த்தை ஒருபுறம் நடந்து வருகிறது.

இந்த நிலையில், கட்சி தலைவர்களின் பிரசார சுற்றுப்பயண ஏற்பாடு, தேர்தல் அறிக்கை தயாரிப்பு, எதிரணியினரின் பிரசாரங்களுக்கும், விமர்சனங்களுக்கும் பதிலடி கொடுப்பது என அனைத்து பணிகளும் மறுபுறம் முழுவீச்சில் நடைபெற்று வருகின்றன. இந்த சூழ்நிலையில், சட்டசபை தேர்தல் தொடர்பான அனைத்து கட்சி கூட்டத்திற்கு தலைமை தேர்தல் அதிகாரி பிரவீண்குமார் ஏற்பாடு செய்துள்ளார்.

நாளை நடக்கிறது

சென்னை கோட்டை மாநாட்டு அரங்கில் நாளை (வெள்ளிக்கிழமை) மாலை 5.30 மணிக்கு இந்த ஆலோசனை கூட்டம் நடக்கிறது. இதில், சட்டசபை தேர்தல் ஏற்பாடுகள், அனைத்து கட்சி தலைவர்களின் ஒத்துழைப்பு, தேர்தல் நடத்தை விதிமுறைகளை மதித்தல், சுவர் விளம்பரம், தேர்தல் செலவுகள், தேர்தல் அதிகாரிகளின் நடவடிக்கைகளுக்கு ஒத்துழைப்பு அளித்தல் என பல்வேறு அம்சங்கள் குறித்து விரிவாக ஆலோசனை செய்யப்படுகிறது.

ஆலோசனை கூட்டத்தில் கலந்து கொள்வது தொடர்பாக அனைத்து கட்சி தலைவர்களுக்கும் தகவல் தெரிவிக்கப்பட்டு வருவதாக தலைமை தேர்தல் அதிகாரி பிரவீண்குமார் தெரிவித்தார். முன்னதாக, தேர்தல் நடத்தை விதிகள் அமலுக்கு வந்துள்ள நிலையில், அரசியல் கட்சிகள் மற்றும் வேட்பாளர்கள் கொடுக்கும் பத்திரிகை விளம்பரங்களை வெளியிடுவது தொடர்பாக நாளிதழ்களின் நிர்வாகிகளுடனும் ஆலோசனை நடத்த உள்ளார்.