வால்பாறையில் தேவாலயம், வீடுகளை இடித்து காட்டு யானைகள் அட்டகாசம்

வால்பாறையில் காட்டு யானைகள் புகுந்து வீடுகள், தேவாலயம், ரேஷன் கடையை இடித்து சேதப்படுத்தின.

காட்டுயானைகளின் அட்டகாசம்

வால்பாறை வட்டாரப்பகுதியில் கடந்த 8 மாதங்களாக காட்டு யானைகளின் அட்டகாசம் தொடர்ந்து நடந்து வருகிறது. வறட்டுப்பாறை பெரிய கல்லார், அய்யர்பாடி, கருமலை, குரங்குமுடி உள்ளிட்ட எஸ்டேட் பகுதிகளில் காட்டு யானைகள் கூட்டம் கூட்டமாக நடமாடி வருகின்றன.

கருமலை எஸ்டேட் பகுதியில் உலாவி கொண்டு இருந்த 7 யானைகள் நேற்று முன்தினம் நள்ளிரவு குடியிருப்புப்பகுதிக்குள் புகுந்தன. தொழிலாளர்களின் வீட்டு தோட்டங்களை சேதப்படுத்தின. குடியிருப்புப்பகுதி மக்கள் பட்டாசுகளை வெடித்து, காட்டுயானைகளை விரட்டினார்கள்.

தொழிலாளர்கள் அவதி

இதற்கிடையே நேற்று காலை 7 மணியளவில் காட்டுயானை கூட்டத்தை சேர்ந்த ஒற்றை ஆண் யானை வனப்பகுதியில்இருந்து வெளியேறி தேயிலை தோட்டத்தில் புகுந்து, தேயிலை பறிக்க வந்த தொழிலாளர்களை விரட்ட தொடங்கியது. இதனால் காலை 8.30 மணிமுதல் தொழிலாளர்கள் வேலைக்கு செல்லமுடியாமல் அவதிப்பட்டனர் பின்னர் எஸ்டேட் தொழிலாளர்கள் ஒன்று சேர்ந்து ஒற்றை காட்டு யானையை வனப்பகுதிக்குள் விரட்டினார்கள்.

அய்யர்பாடி குடியிருப்பு

வில்லோனி எஸ்டேட் பகுதியிலும், 9வது நம்பர் தேயிலை தோட்டப்பகுதியிலும் தொழிலாளர்கள் தேயிலை பறித்து கொண்டு இருந்தபோது காட்டு யானைகள் புகுந்தன. இதை அறிந்த எஸ்டேட் நிர்வாகம், தொழிலாளர்களை அந்த பகுதியில் இருந்து பாதுகாப்பாக அழைத்து வந்து வேறு பகுதியில் உள்ள தேயிலை தோட்டத்தில் பணியில் ஈடுபடுத்தியது.

அய்யர்பாடி எஸ்டேட் பகுதியில் நின்றிருந்த 8 யானைகள் நேற்று முன்தினம் மாலை 6.30 மணியளவில் அய்யர்பாடி ரோப்வே பகுதி குடியிருப்புக்குள் புகுந்தன. இதுபற்றி எஸ்டேட் தொழிலாளர்கள் வால்பாறை வனத்துறைக்கு தகவல் கொடுத்தனர். இதனை உடனே வனத்துறையினர் சம்பவ இடத்திற்கு விரைந்து வந்து காட்டு யானைகளை வனப்பகுதிக்குள் விரட்டினார்கள்.

ரேஷன்கடை, வீடுகள் சேதம்

ஆனால் காட்டு யானைகள் வனப்பகுதிக்குள் செல்லாமல் மீண்டும் குடியிருப்பு பகுதிக்குள் புகுந்து மின்கம்பிகளை தாக்கி சேதப்படுத்தியது. இதனால் அங்கு மின்இணைப்பு துண்டிக்கப் பட்டது.

இந்தநிலையில் காட்டு யானைகள் குடியிருப்புக்குள் புகுந்து ரேஷன்கடையின் கதவு, ஜன்னல்களை உடைத்தன. ஆனால் ரேஷன் பொருட்கள் எதுவும் கடைக்குள் வைக்கப்படாமல் வேறு ஒரு வீட்டில் வைக்கப்பட்டிருந்தது. இதனை மோப்பம் பிடித்த காட்டு யானைகள் ரேஷன் பொருட்கள் வைக்கப்பட்டு இருந்த வீட்டிற்கு சென்றன. அந்த வீட்டிற்கு அருகில் இருந்த இளங்கோ என்பவரது வீட்டு ஜன்னலை சுவரோடு இடித்து தள்ளின. பின்னர் காட்டு யானைகள் தொடக்கப்பள்ளியின் கதவு, ஜன்னல், சி.எஸ்.ஐ. தேவாலயத்தின் மேற்கூரை, பெத்தர் தங்கமணி என்பவர் வீட்டு, ஜன்னல் ஆகியவைகளை உடைத்தன.

பொதுமக்கள் பீதி

வால்பாறை வனத்துறையினரும், பொதுமக்களும் ஒன்று சேர்ந்து இரவு முழுவதும் தூங்காமல் இருந்து யானைகளை வனப்பகுதிக்குள் விரட்டினார்கள். மின் இணைப்பு துண்டிப்பு குறித்த தகவல் அறிந்ததும் மின்வாரிய அதிகாரிகளும் சம்பவ இடத்திற்கு வந்து துண்டிக்கப்பட்ட மின்கம்பிகளை சரிசெய்து மின் இணைப்பை கொடுத்தனர்.

இதனால் 21/2 மணி நேரம் தடைப்பட்ட மின் வினியோகம் சீர் செய்யப்பட்டது. காட்டுயானைகளின் தொடர் அட்டகாசத்தால் பொதுமக்கள் பீதி அடைந்துள்ளனர்.

அதுங்க போற வழியில் வீட்டையும் ,தேயிலை செடியையும் வைத்தால் அத்வும் என்னதான் பண்ணும் .இப்போ அதுங்களும் ரேஷன் சக்கரையையும் ,அரிசி பருப்புகளையும் சாப்பிட ஆரம்பித்துவிட்டன .வால்பாறையில் அதிகமாக தாக்குதலுக்கு உல்லாவது ரேஷன் கடைகள் தான் .இன்னும் சில ஆண்டுகளில் இவை உணவு விடுதிகளுக்குக்கூட வர ஆரம்பிக்கலாம் .

ராம்