சித்தா டாக்டர்கள் ஊசி போடலாம் என்பதற்கு தடை

சித்தா டாக்டர்கள் ஊசி போடலாம் என்பதற்கு தடை விதித்து மதுரை ஐகோர்ட்டு உத்தரவிட்டுள்ளது.

சித்தா டாக்டர்கள் வழக்கு

தமிழ்நாடு மருத்துவக்கவுன்சில் பதிவாளர் எஸ்.கந்தசாமி. இவர் மதுரை ஐகோர்ட்டு கிளையில் தாக்கல் செய்துள்ள மனுவில் கூறி இருப்பதாவது:-

சித்த மருத்துவ டாக்டர்கள் அலோபதி மருத்துவம் மேற்கொள்வதாக கூறி போலீசார் துன்புறுத்துவதாகவும், சித்த மருத்துவ டாக்டர்களை போலீசார் துன்புறுத்தக்கூடாது என்று உத்தரவிட வேண்டும் என்றும் தமிழ்நாடு சித்த மருத்துவ பட்டதாரிகள் சங்கத்தின் சார்பில் ஐகோர்ட்டில் வழக்கு தொடர்ந்தனர். வழக்கை விசாரித்த ஐகோர்ட்டு, சித்த மருத்துவர்கள் அறுவை சிகிச்சை மட்டும் மேற்கொள்ளக்கூடாது என்றும், ஊசி போடலாம் என்றும் உத்தரவிட்டது.

பொதுமக்கள் பாதிக்கப்படுவர்

அலோபதி மருத்துவ படிப்பை படிக்காதவர்கள், அலோபதி சிகிச்சை அளிக்க அனுமதிக்கும் பட்சத்தில் பொதுமக்களின் உயிருக்கு பாதிப்பு ஏற்படும்.

சித்த மருத்துவர்கள், அலோபதி மருத்துவம் பார்ப்பது சரியல்ல. இது பதிவு பெற்ற டாக்டர்கள் மத்தியில் குழப்பத்தை ஏற்படுத்தும். தனி நீதிபதி பிறப்பித்த உத்தரவால் சித்த மருத்துவ டாக்டர்கள், சட்டவிரோத மருத்துவ பணியை மேற்கொண்டு வருகின்றனர். இந்த உத்தரவை ரத்து செய்யாதபட்சத்தில் பொதுமக்கள் கடுமையாக பாதிக்கப்படுவர். எனவே தனி நீதிபதியின் உத்தரவை ரத்து செய்ய வேண்டும்.

இவ்வாறு மனுவில் கூறப்பட்டுள்ளது.

ஊசி போட தடை

இந்த மனு நீதிபதிகள் என்.பால்வசந்தகுமார், ஆர்.சுப்பையா ஆகியோர் முன்னிலையில் விசாரணைக்கு வந்தது. மனுவை விசாரித்த நீதிபதிகள், சித்தா டாக்டர்கள், ஊசி போடுவது போன்ற அலோபதி மருத்துவம் மேற்கொள்ளலாம் என்ற தனி நீதிபதியின் உத்தரவுக்கு தடை விதித்து உத்தரவிட்டனர்.

மேலும் இந்த வழக்கு சம்பந்தமாக தமிழ்நாடு சித்த மருத்துவ பட்டதாரிகள் சங்கம், இந்திய மருத்துவ கழகம், பொது சுகாதாரத்துறை செயலாளர், இயக்குனர் ஆகியோர் பதில் அளிக்க நோட்டீசு அனுப்ப உத்தரவிட்டனர்.

அப்ப நீங்க இந்தியா வந்தா ஊசி போடமுடியாதா