அரசியல் கட்சிகளுக்கான தேர்தல் ஸ்பெஷல் ராசிபலன்கள்

(குறிப்பு : இது முழுக்க முழுக்க நகைச்சுவைக்காக மட்டுமே!)


மேஷம் : மேஷராசிக் கட்சிக்காரர்களே, சித்திரையில் சூரியன் உங்கள் ராசியில் உச்சமாக உதயமாவதால் இத்தேர்தல் உங்களுக்கு களைகட்டுவதாக அமையும். ஆம்! களைகளைக் களைய நினைக்கும் மக்களின் எண்ணங்கள், சுட்டெரிக்கும் சூரியனை கலைய வைத்துவிடு்ம். "கை-கள்" தொந்தரவு கொடுக்கும். கடவுளுக்கும் உங்களுக்கு ஆகாது என்பதால் அவருடன் கூட்டணி என்பது சாத்தியமில்லாமல் போனது ஒருவகையில் துரதிர்ஷ்டமே! சனி வேறு மனோகாரகன் சந்திரனுடன் சேர்ந்துகொண்டு மூன்றில் இருந்து சூரியனை ஒரு கேவலமான லுக் விடுவது பாதகமாகும். அவ்வப்போது உண்ணாவிரதம் இருப்பது வெயிலுக்கு இதம் தரும். உங்கள் ராசியான நிறம் கருப்பு மற்றும் சிவப்பு.


ரிஷபம் : ரிஷபராசிக் கட்சிக்காரர்களே, வெளுத்ததெல்லாம் பால் என நினைக்கும் வெள்ளை மனம் படைத்த உங்களுக்கு இத்தேர்தல் சாவுமணி அடித்து சங்கு ஊதிவிடும். எதற்கும் எச்சரிக்கையாக கூட்டணி அறிவித்து விடுங்கள். மிச்சத்தை அவர் பார்த்துக் கொள்வார். நவகிரகங்கள் அனைத்தும் ஆளாளுக்கு ஒரு பக்கம் திரும்பிக் கொண்டு நின்றாலும், உங்களைக் காப்பாற்றுவதற்காகவே சந்திராயன் ஆறில் நின்றும், இன்சாட் 2சி பதிமூணில் நின்றும் உங்கள் ராசியைப் பார்க்கிறார்கள்! உங்கள் ராசியான நிறம் சிவப்பு, கருப்பு; மறுபடியும் சிவப்பு! ராசியான சின்னம் பம்பரம். ஆனால் சாட்டை உங்கள் கையில் இல்லை, அதையும் ஞாபகம் வைத்து செயலாற்றுங்கள்.


மிதுனம் : மிதுனராசிக் கட்சிக்காரர்களே, கூடு விட்டு கூடு பாயும் கலையில் வல்லவர் நீங்கள். சித்தர்களே தோற்றுப் போகுமளவிற்கு தேர்ந்த வித்தைக்காரரான உங்களைப் பார்த்து மேஷராசிக் காரர்கள் அலறுவர். பாசக்கார தங்கச்சியுடன் ‘மலர்ந்தும் மலராத’ பாட நினைப்பீர். பின்னர் மேஷராசிக் காரர்களுடன் ராசியாகிவிடுவீர். தேர்தலுக்குப் பின், அன்பு மனம் படைத்த மணி, நொந்த மனம் படைத்த மணியாவார். எதற்கும் சனி பகவானிடமும் ஒரு துண்டு போட்டு வையுங்கள்! அவர் அருகிருக்க சகல துன்பங்களும் விலகியோடும். காடுவெட்டிகளும், மேடுவெட்டிகளும் உங்கள் பக்கத்திலிருக்க பயமேன்! உங்கள் ராசியான நிறம் பச்சோந்தியின் நிறம்!


கடகம் : கடகராசிக் கட்சிக்காரர்களே, இதுநாள் வரை கோடநாடு எஸ்டேட்டுகளில் தங்கி மக்கள் பணியாற்றிய நீங்கள் கோட்டையில் தங்கி பணியாற்ற வேண்டிய சந்தர்ப்பம் வந்து விட்டது. மடகாஸ்கர் தீவுகளையும், பிலிப்பைன்ஸ் தீவுகளையும் விலைக்கு வாங்கிவிட்டால் தமிழக மீனவர்கள் பிரச்சினை தீர்ந்துவிடும் என்ற தங்களின் அறிவிப்பால் ஓட்டு மழை கொட்டப் போகிறது. பிலிப்பைன்ஸ் தீவுகளில் திராட்சைத் தோட்டங்களை வளர்த்து பசுமைப் புரட்சி ஏற்படுத்துவீர்கள். உங்கள் ராசியான நிறம் பச்சையாக இருந்தாலும், இது தேர்தல் நேரமாக இருப்பதால் கருப்பு, வெள்ளை, சிவப்பு மட்டுமே உதவும்!


சிம்மம் : சிம்மராசிக் கட்சிக்காரர்களே, ராஜராஜ சோழன் ஆட்சியமைப்போம் என்று முழங்கி வந்த தாங்கள், சின்ன ஜமீன் அளவுக்குக் கூட ஆட்சியமைப்பதில் திறமையற்றவர்கள் என்பதை உணர்வதே உங்களுடைய மிகப்பெரிய வெற்றியாகும். நாற்காலியில் எந்தப் பக்க ஸ்க்ரூ எப்போது கழன்று கீழே விழும் என்று தெரியாமல் சகட்டுமேனிக்கு அத்தனை ஸ்க்ரூவையும் டைட் செய்து கொண்டிருப்பீர்கள்! ஏழில் ராகு நாண்டுக்கிட்டு நிற்பதாலும், பத்தில் பத்தியும் பத்தாமலும் ஒரு ஓரத்தில் செருகிக் கொண்டிருக்கும் கேதுவாலும், உங்களுக்கு பெரும் சிக்கல் ஏற்படும். சூரியனின் உக்கிரத்தில் இருந்து முரசு கொட்டும் இடத்திற்கு உங்கள் ஜாகையை விரைவில் மாற்றுவீர்கள். உங்கள் ராசியான நிறம் ஆரஞ்சு, வெள்ளை, பச்சை. உங்களுக்கு ‘கை’ராசியும் கொஞ்சம் உள்ளது!


கன்னி : கன்னிராசிக் கட்சிக்காரர்களே, இது உங்களுக்கு முதல் பெரிய தேர்தலாக அமைந்தாலும், கடவுளையும், மக்களையும் முதலிலேயே ஒட்டுமொத்த குத்தகைக்கு எடுத்துக் கொண்டுவிட்டதால் வெற்றி உங்களுக்கே! புதன் ராசியதிபதி ஆகி, அரச குரு எட்டாம் இடத்தில் இருந்து கஷ்டப்பட்டு கோணிக்கொண்டு உங்கள் அதிபதியைப் பார்ப்பதால் அரசாட்சி அமைப்பதில் சிறிது சிரமப்பட நேரிடும். எனினும் சுக்கிரனும், செவ்வாயும் கூடிக்கொண்டு பதினொன்றில் கும்மியடிப்பது மற்றவர்களுக்குக் கலக்கத்தைத் தரும். ஒபாமாவுக்கே எஸ்.எம்.எஸ் அனுப்பிய உங்கள் நிர்வாகத்திறனை இந்த நாடே போற்றும். உங்கள் ராசியான நிறம் சிவப்பு, மஞ்சள், கருப்பு.


துலாம் : துலாம்ராசிக் கட்சிக்காரர்களே, துண்டைக் காணோம் துணியைக் காணோம் என உங்களை ஓடச் செய்ய, ‘மங்கலத்திலேயே’ உங்களுக்கு மங்களம் பாடி விடத் துணிந்தனரே எதிர்க்கட்சிகள்! இருந்தாலும் மனம் தளரா விக்கிரமாதித்தனைப் போல காவிப்படையின் துணையுடன் களமிறங்கி விட்டீர். சுக்கிரன் லக்கினத்திலேயே இருந்து உங்களுக்கு வசீகரத்தைக் கொடுத்தாலும், நேரெதிரில் நின்று சூரியனும், சனியும் கட்டையைக் கொடுப்பதால் முன்னேற முடியாமல் தவிப்பீர். நமீதா, நயன்தாரா வகையறாக்களை களமிறக்கி கொஞ்சம் ஷோ காட்டினால், டிவியில் உங்களைப் பற்றி ஷோ எடுக்க கொஞ்சம் வாய்ப்பாக அமையும். உங்கள் ராசியான நிறம் மஞ்சளும் வெள்ளையும்.


விருச்சிகம் : விருச்சிகராசிக் கட்சிக்காரர்களே, ‘அய்யோ தீ’ என அடிக்கடி அலறும் உங்களுக்கு இந்தத் தேர்தல் நன்றாகப் பத்திக் கொள்ளும். எதிர்க்கட்சி வேட்பாளர்கள் வேற்று கிரகவாசிகள் என பழைய பஞ்சாங்கத்தையே வாசித்துக் கொண்டிராமல் புதிதாக ஏதாவது சிந்தனை செய்வது நல்லது. சிந்தனை என்பது உங்களுக்கு கை வராத கலை என்பது உண்மையானாலும், ரெண்டில் சேரைப் போட்டு பக்குவமாக உட்கார்ந்திருக்கும் புதன் அதற்கு உதவுவார். செவ்வாயும் சந்திரனும் சற்றே கனிவுடன் ராசியைக் கவனிப்பதால் வாய்ப்பை நழுவவிடாமல் உபயோகப்படுத்திக் கொள்ளுங்கள். காங்கோ நாட்டில் ராமனுடைய சித்தப்பனுடைய மச்சான் மகன் சிறிது காலம் தங்கியிருந்ததை நம்பி அவருக்கு அங்கு கோயில் கட்டும் முடிவை மட்டும் எடுத்துவிடாதீர்கள்! உங்கள் ராசியான நிறம் இந்த ஜென்மத்துக்கும் காவி, காவியைத் தவிர வேறில்லை.


தனுசு முதல் மீனம் வரையிலான ராசிகள் : இந்த ராசிகளின் கட்சிக்காரர்களே, திருவிழாவில் சிக்கிய குழந்தையைப் போல திரு திருவென முழிக்கப் போகிறீர்கள். சூரியன் முதலான ஒன்பது கிரகங்களும், லட்சோப லட்சம் விண்மீன்களும் உங்கள் ராசியைப் பார்த்தாலும், படுத்துப் புரண்டாலும் உங்கள் வெற்றி என்பது கானல் நீர்தான்.

வாழ்க வளமுடன்!

இராசிபலன்களில் மாற்றமோ தவறுகளோ இருப்பின் பெரிய ஜோதிடர்களின் விளக்கத்தை கேட்டுப் பெற்றுக் கொள்க!!!!!!!!

என்னுடைய மகர ராசியைக் காணவில்லையே?

சிவா wrote:என்னுடைய மகர ராசியைக் காணவில்லையே?

மீதமுள்ள அனைத்து இராசிக்காரர்களுக்கும்: திருவிழாவில் சிக்கிய குழந்தையைப் போல திரு திருவென முழிக்கப் போகிறீர்கள். சூரியன் முதலான ஒன்பது கிரகங்களும், லட்சோப லட்சம் விண்மீன்களும் உங்கள் ராசியைப் பார்த்தாலும், படுத்துப் புரண்டாலும் உங்கள் வெற்றி என்பது கானல் நீர்தான்.