கிராம மக்களின் வினோத பெயர்கள்

சுப்ரீம் கோர்ட்டு எங்கே இருக்கிறது?' என்று கேட்டால், படக்கென்று டெல்லியில் என்பீர்கள். பத்ரபுரா என்று சொன்னாலும் தப்பில்லை. பெங்களூரை ஒட்டிக் கிடக்கும் இந்தக் கிராமத்தில், `சுப்ரீம் கோர்ட்டு' என்ற பெயர் கொண்ட நபர் இருக்கிறார்.

சுப்ரீம் கோர்ட்டு' மட்டுமல்ல, ஐகோர்ட்டு'ம் இங்கே இருக்கிறது... ஸாரி, இருக்கிறார். 90 வயது முதியவர் அவர்.

ஒரு பின்தங்கிய கிராமத்துக்கு உரிய அத்தனை இலக்கணங்களோடும் இருக்கும் பத்ரபுராவில் ஹக்கி பிக்கி பழங்குடி இனத்தவர்கள் வசிக்கின்றனர். இங்கே யாரை நிறுத்திக் கேட்டாலும் ஒரு வித்தியாசமான பெயரைக் கூறுகிறார்கள்.

சாம்பிளுக்கு சில...

மிலிட்டரி, ரிவால்வர், குளூக்கோஸ், பிஸ்கட், ஜப்பான், சீனா, அமெரிக்கா, ஆப்பிள்ராணி, டாலர், ஜெயிலர், பஸ் டிப்போ, சைக்கிள் ராணி, டெல்லி ராணி, ஜிலேபி, மைசூர்பாகு, இன்ஸ்பெக்டர், கவர்ன்மெண்ட், ஓட்டல், கிராமபோன், ரேடியோ, காங்கிரஸ்,

பயாஸ்கோப்... குழந்தைகளுக்குப் பெயர் சூட்டும் விஷயத்தில் எங்கள் அப்பா- அம்மாக்கள், தாத்தா- பாட்டிகள் அதிகம் அலட்டிக்கொண்டதில்லை. குழந்தை பிறக்கும்போது அவர்கள் மனதில் என்ன தோன்றியதோ அதையே சூட்டியிருக்கிறார்கள்'' என்கிறார், `ஜப்பான்'. ``சில வேளைகளில், குழந்தை எந்தக் கிராமத்தில் அல்லது நகரத்தில் பிறக்கிறதோ, அந்தப் பெயரே சூட்டப்பட்டிருக்கிறது'' என்கிறார் இவர். ஜப்பானின் மனைவி பெயர் இன்னும் வினோதம். அவர் பிறந்த இடத்தில் ஜல்லிக்குவியல் கிடந்ததாம். யோசிக்கவேயில்லை அவரது தந்தை. `ஜல்லியம்மா' என்று பெயர் சூட்டிவிட்டார்.

எங்கள் இனத்தில் முதன்முதலாக ஆஸ்பத்திரியில் பிறந்த குழந்தைக்கு ஆஸ்பிடல்' என்றே பெயர் வைக்கப்பட்டுவிட்டது. அதேமாதிரி ஒரு குழந்தை பிறந்தபோது அருகே சாலையில் ராணுவ வீரர்கள் அணிவகுத்துச் செல்ல, `மிலிட்டரி' என்பதே அக்குழந்தையின் பெயரானது'' என்கிறார், ஜல்லியம்மா. இவர் பஞ்சாயத்து உறுப்பினரும் கூட.

தொடர்ந்து வந்த தலைமுறைகளில் கொஞ்சம் மாற்றம். பிரபலங்களின் பெயர்களைத் தங்கள் குழந்தைகளுக்கு இட்டு மகிழ ஆரம்பித்தார்கள். தற்போது நீங்கள் பத்ரபுராவுக்குச் சென்றால், ராஜீவ் காந்தி, அமிதாப் பச்சன், ராஜ்கபூர், அனில்கபூர், ஐஸ்வர்யா ராய், கஜோல், சோனாலி பிந்த்ரே, ஷாருக்கான் எல்லோரையும் சந்திக்கலாம். `ஜப்பான் தம்பதி' இன்னும் ஒரு படி மேலே போயிருக்கிறது. தங்கள் 20 வயது மகளுக்கு எலிஸபெத் ராணி என்று பெயர் வைத்திருக்கிறார்கள்.

நமக்கு இந்தப் பெயர்கள் எல்லாம் வேடிக்கையாகத் தெரிந்தாலும், இவை எல்லாவற்றிலும் ஒன்றும் அர்த்தமில்லை என்று ஒதுக்கிவிட முடியாது என்பது பேராசிரியர் மேத்ரியின் கருத்து. ஹம்பியில் உள்ள கன்னடப் பல்கலைக்கழகத்தின் பழங்குடியின ஆய்வு மையத்தைச் சேர்ந்தவர் இவர்.

மேத்ரி கூறுகையில், ``இடம்பெயர்ந்து கொண்டே இருக்கும் ஒவ்வொரு பழங்குடி இனத்துக்கும் ஒரு சங்கேத மொழி உண்டு. மற்றவர்கள் அதைப் புரிந்துகொள்ளவே முடியாது. அந்தச் சங்கேத மொழியின் ஓர் அங்கமாக இந்தப் பெயர்கள் இருக்கக்கூடும்'' என்கிறார்.

`குருவிக்காரர்கள்' என்றும் அழைக்கப்படும் `ஹக்கி பிக்கி'கள், குஜராத்தில் இருந்து தமிழ்நாடு, ஆந்திரா, கர்நாடகா போன்ற மாநிலங்களுக்கு இடம் பெயர்ந்தவர்கள் என்கிறார், மைசூர் மனிதவியல் ஆய்வு நிறுவனத்தின் மரளுசித்தையா. பறவைகள், சிறுவிலங்குகளை வேட்டையாடுவதையே குலத்தொழிலாகக் கொண்ட `ஹக்கி பிக்கிகள்', தற்போது கைவினைப்பொருட்கள் தயாரிப்பது, நாட்டு மருந்துகள் தயாரிப்பது என்று தொழிலை மாற்றிவருகிறார்கள் என்கிறார் இவர்.

அப்பா, தாத்தா வழியில் காடுமேடென அலைந்து திரிந்த இந்த இனக் குழந்தைகள் தற்போது பள்ளி செல்லத் தொடங்கியிருக்கிறார்கள். இனி பெயர்களும் மாற்றம் பெறத் தொடங்கிவிடும் என்று நம்பலாம்.

தினதந்தி!

ஹி ஹி ,, வித்தியாசமா இருக்கே