பாலியல் வல்லுறவு குற்றச்சாட்டு:அமைச்சர் நிரபராதி என்றால் அதை நிரூபிக்க வேண்டும்

2007-இல் மலேசிய அமைச்சர் ஒருவர், தம் இந்தோனேசிய பணிப்பெண்ணுடன் பாலியல் வல்லுறவில் ஈடுபட்டார் என்றும் ஆனால் அச்சம்பவம் மூடி மறைக்கப்பட்டது என்றும் இணையத்தளத்தில் உலவும் குற்றச்சாட்டு தொடர்பில் பிகேஆர் மேல்நடவடிக்கை எடுக்கும்.

இந்தோனேசிய தொழிலாளர்களின் நலனைக் கவனித்துக்கொள்ளும் மைக்ரண்ட் கேர் என்னும் அரசுசாரா அமைப்பு வெளியிட்டிருக்கும் செய்தியின் அடிப்படையில் நடவடிக்கையில் இறங்கப்போவதாக பிகேஆர் இளைஞர் பகுதியின் தலைவர் ஷம்சுல் இஸ்கண்டர் முகம்மட் அகின் கூறினார்.

“பிகேஆர் இளைஞர் பகுதி இதனைக் கடுமையான விவகாரமாகக் கருதுகிறது. 2007 பிப்ரவரி 19-இல், அச்சம்பவம் நிகழ்ந்திருக்கிறது. அதில் பாதிக்கப்பட்ட பெண் அது பற்றி வாய் திறக்கக்கூடாது என்று மிரட்டப்பட்டிருக்கிறார்”, என்றவர் கூறினார்.

முன்னாள் பிரதமர் அப்துல்லா அஹமட் படாவி காலத்தில் நிகழ்ந்த அச்சம்பவம் தொடர்பில் சம்பந்தப்பட்ட அமைச்சருக்கு எதிராக எந்த நடவடிக்கையும் எடுக்கப்படவில்லை என்றாரவர்.

“அவ்விவகாரம் மீது இணையத்தளத்தில் சூடான விவாதம் நடைபெறுகிறது. அக்குற்றச்சாட்டு உண்மையா என்பது அந்த அமைச்சருக்கும் இறைவனுக்கும் மட்டுமே தெரியும்.

“எனவே, அதில் உண்மை இல்லையென்றால் இப்போது பிரதமர் நஜிப்பின் அமைச்சரவையில் இடம்பெற்றுள்ள அவர் முன்வந்து தம்மை நிரபராதி என்பதை நிறுவ வேண்டும் என்று கேட்டுக்கொள்கிறேன்.”

ஆனால், அக்குற்றச்சாட்டில் உண்மை உள்ளது என்றே பிகேஆர் இளைஞர் பகுதி நம்புகிறது. இதனால் நஜிப் அமைச்சரவையின் பெயர்தான் கெடுகிறது என்றும் ஷம்சுல் குறிப்பிட்டார்.

“பாலியல் குற்றவாளி என்றபோதிலும் அந்நபரை இன்னமும் அமைச்சரவையில் விட்டு வைத்துள்ளார் நஜிப். அவர்மீது எந்தவொறு நடவடிக்கையும் எடுக்கப்படாவிட்டால் மலேசிய-இந்தோனேசிய உறவுகள் பாதிப்புறும்.”

அக்குற்றச்சாட்டால் மலேசியாவுக்கு ஏற்பட்டுள்ள களங்கத்தைப் போக்க நஜிப், முழுமையான விசாரணைக்கு உத்தரவிட வேண்டும் என்று ஷம்சுல் கேட்டுக்கொண்டார்.

அவ்விவகாரம் பற்றி இன்னொரு பிகேஆர் உறுப்பினர், பட்ருல் ஹிஷாம் ஷாஹாரின் -ச்சேகு பார்ட் என்ற பெயரில் பிரபலமானவர்- இன்று சிரம்பானில் போலீஸ் புகார் ஒன்றைச் செய்யவிருக்கிறார்.

இதே விவகாரம் மீது, பிகேஆர் மகளிர் பகுதித் தலைவரும் அம்பாங் எம்பியுமான சுரைடா கமருடின் இன்று செய்தியாளர் கூட்டம் ஒன்றை நடத்துகிறார்.

பிகேஆர் இளைஞர் பகுதி, இக்குற்றச்சாட்டின் உண்மை நிலவரத்தைக் கண்டறிய மைக்ரண்ட் கேர் அமைப்பையும் மற்ற இந்தோனேசிய அமைப்புகளையும் சந்திக்க தன் நிர்வாகக் குழு உறுப்பினர்களை அனுப்பி வைக்கும் என்றும் ஷம்சுல் இஸ்கண்டர் தெரிவித்தார்.

அந்தப் பாலியல் வல்லுறவுச் சம்பவத்துக்குப் பின்னர் அப்பணிப்பெண் இந்தோனேசியாவுக்குத் திருப்பி அனுப்பட்டதாகக் கூறப்படுகிறது.

ஆனால், அவரின் தங்கை, நீதி கேட்டுப் போராட்டத்தில் குதித்துள்ளார்.

அமைச்சர் செல்வாக்கு மிக்கவர் என்றும் அதனால் தம் தமக்கையின் பெயரை வெளியிட வேண்டாம் என்றவர் கேட்டுக்கொண்டிருக்கிறார். இச்சம்பவம் தொடர்பில் மங்கோலிய பெண்ணான அல்டான்துயாவுக்கு நேர்ந்த கதி(கொலை) அவருக்கும் ஏற்படலாம் என்றவர் அஞ்சுகிறார்.

பாலியல் வல்லுறவு மலேசியாவில் ஒரு கடுமையான குற்றமாகக் கருதப்படுகிறது. அதற்குத் தண்டனையாக 20 ஆண்டு சிறையும் பிரம்படியும் கொடுக்கப்படுகிறது.

பாலியல் வல்லுறவுக்கு ஆளானவர்களின் பெயர்கள் வெளியிடப்படுவதில்லை. ஆனால், அந்த இந்தோனேசிய பணிப்பெண்ணின் பெயர் இணையத் தளங்களில் வெளியிடப்பட்டுள்ளது.

அதேபோல், பாலியல் வல்லுறவில் ஈடுபட்டவர்களாகக் குற்றம் சாட்டப்படுவோரின் பெயர்களும் அவர்கள் நீதிமன்றத்தில் நிறுத்தப்படும்வரை வெளியிடப்படுவதில்லை. ஆனால், சம்பந்தப்பட்ட அமைச்சரின் பெயரை இணையத் தளங்கள் குறிப்பிட்டுள்ளன.

மலேசியாஇன்று!

அட ,அரசியல்ல இதெல்லாம் சாதாரணமப்ப