தடையை மீறி ஊர்வலம் சென்றதால் இந்திய வம்சாவளியினர் 78 பேர் மலேசியாவில் கைது

கோலாலம்பூர், பிப்.28- மலேசியாவில் தடை செய்யப்பட்ட ``இந்த்ராப்'' என்ற அமைப்பின் சார்பில் இந்திய வம்சாவளியினர் ஊர்வலமாக சென்ற போது அந்த அமைப்புடன் தொடர்புடைய 78 பேரை போலீசார் கைது செய்தனர்.

தமிழர்களை இழிவுபடுத்தும் நாவல்

மலேசியாவில் மலாய் மொழியில் எழுதப்பட்ட நாவல் இன்டர்லோக். இதில் தமிழர்களை பற்றி இழிவாக எழுதப்பட்டு உள்ளது. இந்த புத்தகத்தை அந்த நாட்டு அரசு உயர்நிலைப்பள்ளியில் ஒரு பாடப்புத்தகமாக அறிமுகப்படுத்தி உள்ளது.

இந்த புத்தகத்துக்கு எதிர்ப்பு தெரிவித்து ``இந்த்ராப்'' (இந்து உரிமை நடவடிக்கை சக்தி )என்ற அமைப்பின் அரசியல் அமைப்பான இந்து உரிமை கட்சி நேற்று கோலாலம்பூரில் உள்ள சிட்டி சென்டரை நோக்கி ஊர்வலம் நடத்தினார்கள். இந்த ஊர்வலத்தை அரசாங்கம் சட்ட விரோதமானது என்று அறிவித்தது. ஊர்வலம் ரினைசான்ஸ் ஓட்டலில் இருந்து கோலாலம்பூர் சிட்டி சென்டரை நோக்கி ஊர்வலமாக சென்றார்கள்.

கைது

ஓட்டலில் இருந்து ஊர்வலம் புறப்படுவதற்கு முன்பே ஊர்வலத்தில் வந்த 78 பேரை போலீசார் கைது செய்தனர். இந்த்ராப் அமைப்பை ஏற்கனவே அந்த நாட்டு அரசாங்கம் தடை செய்து உள்ளது என்பது குறிப்பிடத்தக்கது. இந்த ஊர்வலத்துக்கு அனுமதி அளிக்கவும் போலீசார் மறுத்து விட்டனர்.

அனுமதி அளிக்கப்படாததால் இந்த ஊர்வலத்தில் கலந்து கொள்பவர்கள் மீது நடவடிக்கை எடுக்கப்படும் என்று போலீஸ் இன்ஸ்பெக்டர் ஜெனரல் இஸ்மாயில் ஒமர் எச்சரித்து இருந்தார்.

போலீஸ் நடவடிக்கையில் இருந்து தப்பித்த சிலர் போராட்ட இடத்துக்கு ஊர்வலமாக சென்று அடைந்தனர்.

தலைவர் உதயகுமார்

இந்து உரிமை கட்சியின் தலைவர் பி.உதயகுமார் காலை 8 மணிக்கு வீட்டில் இருந்து ஊர்வலத்தில் கலந்து கொள்வதற்காக புறப்பட்ட போது அவரை போலீசார் கைது செய்தனர். அவரை போலீசார் போலீஸ் நிலையத்துக்கு கொண்டு சென்றனர்.

கெட்டா மாநில இந்து உரிமைக் கட்சி தலைவர் ராமு ராமசாமி, பினாங்கு தலைவர் ஆகியோரும் கைதானார்கள்.

அரசு உறுதி மொழி

சிறுபான்மை சமூகத்தை சேர்ந்த பலரும் மலேசிய இந்திய காங்கிரஸ் கட்சியும் இநத புத்தகம் தமிழர்களின் மனதை புண்படுத்தி இருப்பதாகவும், தமிழர்களை இழிவு படுத்தும் சொற்களும் இந்த புத்தகத்தில் இடம் பெற்று இருப்பதாக கூறி உள்ளனர்.

இந்த புத்தகத்தில் இடம் பெற்று உள்ள ஆட்சேபகரமான சொற்களை நீக்கிய பிறகு தான் பாடப்புத்தகமாக வைக்கப்படும் என்று அரசாங்கம் உறுதி அளித்து உள்ளது. அதன் பிறகுதான் இந்த ஊர்வலத்துக்கு ஏற்பாடு செய்யப்பட்டு உள்ளது.

தினதந்தி!