மெனோபாஸை எதிர்கொள்வது எப்படி

மெனோபாஸ் என்பது ஹார்மோன் எல்லாம் மெல்ல மெல்ல அடங்கி, தீட்டு நிற்கும் பருவம். ஆண்களுக்கும் இந்த மெனோபாஸ் உண்டு என்றாலும் வெளியே தெரியாமல் இந்த மாற்றம் நிகழ்வதால், பெண்கள் போல மிகச் சரியாக இன்ன வயதில்தான் வரும் என்று திட்டவட்டமாக சொல்ல முடியாது. பெண்களுக்கு இது உடல்வாகு, வசிக்கும் நாடு போன்றவற்றைப் பொறுத்து மாறும். நம்மூரில் 40 வயதில் ஆரம்பித்துக் கொண்டிருந்தது.

ஆனால் இப்போது மனிதர்களின் வாழ்நாளே அதிகமாகிக் கொண்டு வருவதால் இந்த மெனோபாஸ் தள்ளியே வருகிறது.

குறைந்த பட்சம் தொடர்ந்து ஒரு வருடம் வரை மாத விலக்கு நின்றால் மெனோபாஸாக எடுத்துக் கொள்ளலாம். மெனோபாஸ் வருவதற்கு சில வருடங்கள் முன்பிருந்தே ஒரேயடியாக சில மாதங்கள் இடைவெளி விட்டு மிகக் குறைவாக தீட்டுப்படுவது அல்லது மிகக் குறைந்த நாள் இடைவெளியில் மிக அதிகமாக வருவது போன்ற பிரச்னைகள் இருக்கும். இதெல்லாம் ஹார்மோன்கள் ஒரு ஒழுங்கில் இல்லாததால் ஏற்படுவதுதான்.


ஹார்மோன் குறைந்து போய் மெனோபாஸ் ஏற்படுவதால் ஒரு பெண்ணின் உடம்பில் ஏற்படும் மாற்றங்கள் எக்கச்சக்கம். இது போன்ற சமயத்தில் சினைப்பை சுருங்கிக் கொண்டு வருவதால், அதிலிருந்து சுரக்கக்கூடிய ஈஸ்ட்ரோஜென் ஹார்மோன் குறையும். சினைப்பையில் இருக்கும் சினைமுட்டைக் கூடுகள் குறைந்து போவதால் அவை வெடித்த பின் சுரக்கும் புரஜெஸ்ட்ரான் ஹார்மோனும் குறையும். இதனால் கை, கால் குடைச்சல், அசதி, திடீரென்று வியர்த்துக் கொட்டி, உடம்பு சில்லிட்டுப் போவதெல்லாம் நடக்கும். மாதவிலக்கு வந்து கொண்டிருந்தவரை தாக்காமல் இருந்த இதய நோய்களும் தாக்கலாம்.

அந்தரங்க உறுப்பில் வழவழப்பான திரவம் சுரப்பது குறைந்து அதன் ஈரத் தன்மை போய் தாம்பத்ய உறவில் நாட்டம் குறையலாம். குடும்ப சூழல்கள் காரணமாக டென்ஷன், கோபம், தான் புறக்கணிக்கப் படுகிறோம் என்கிற உணர்வுகள் ஏற்படலாம். மெனோபாஸ§க்கு பிறகு எலும்புகளை பலவீனமாக்கும் ஆபத்தான ஆஸ்டியோபொரோசிஸ் நோய் தாக்கலாம். லேசாக இடித்துக் கொண்டாலே எலும்புகள் முறியும் அபாயம் இதில் உண்டு.

இதெல்லாம் எல்லாப் பெண்களுக்குமே வரும் என்று சொல்ல முடியாது. வெயில் அதிகமில்லாத பகுதிகளில் வசிக்கும் பெண்களுக்கு அதிகம் வரலாம். வெயில் படும் இடங்களில் வசிப்பதும், பால், தயிர் போன்ற கால்சியம் அதிகமுள்ள உணவுகளை சேர்த்துக் கொள்வதும் பாதிப்புகளில் இருந்து காப்பாற்றும்.ஹார்மோன் குறைவால் உடல்ரீதியாக ஏற்படும் என மேற்சொன்ன சில பாதிப்புகளைத் தவிர்க்க ஹெச்.ஆர்.டி சிகிச்சை தரப்படுகிறது. ஈஸ்ட்ரோ ஜென் ஹார்மோனை மாத்திரையாகவோ அல்லது தோலின் துளை வழியாகச் செல்லுமாறு உடம்பில் ஒட்டிக் கொள்ளும்படியோ அல்லது அந்தரங்க உறுப்பில் போடப்படும் கிரீமாகவோ தருகிறார்கள்.

சிறுவயதிலேயே அறுவை சிகிச்சை மூலம் கருப்பை மற்றும் சினைப்பையை எடுத்துவிட்ட பெண்களுக்கு இந்த சிகிச்சை கட்டாயத் தேவை. கூடவே பாப் ஸ்மியர் மற்றும் மார்பகப் புற்றுநோய் டெஸ்ட், கருப்பை ஸ்கேன் போன்றவற்றை அடிக்கடி செய்ய வேண்டும்.மெனோபாஸ் முடிந்தபின் ஹார்மோன் சிகிச்சை எடுத்துக் கொள்ளாமலேயே கூட சிலருக்கு மாதவிலக்கு வரலாம். இதை போஸ்ட் மெனோபாஸ் ப்ளீடிங் என்று சொல்வோம். இதை உடனடியாக பரிசோதனை செய்வது அவசியம். எல்லாவற்றையும் மீறி, நீங்கள் உங்களுக்காக வாழ முடிகிற காலம் இது. பிடித்த விஷயங்களில் மனதைச் செலுத்தினால், மனச்சோர்வு, உடல் சோர்வு இரண்டையும் வெல்லலாம்.