குதிரை பறப்பது சாத்தியமா?

**சிவா** · **சிவா** Sun 6 Mar 2011 - 0:46

சேவகன் செய்த ஒரு குற்றத்திற்காக, அவனுக்கு மரண தண்டனை விதித்து தீர்ப்பளித்தார் ராஜா. அவன் செய்த குற்றத்திற்கு அது மிகப்பெரிய தண்டனை என்றே அனைவரும் கருதினர். சேவகன் எவ்வளவோ மன்றாடியும், அந்த ராஜா மனம் இரங்கவில்லை. கடைசியாக, "ஏதாவது சலுகை அளியுங்கள்'' என்று ராஜாவைப் பார்த்துக் கெஞ்சினான் அவன்.

"என்னுடைய பட்டத்துக் குதிரையை ஆகாயத்தில் பறக்கும்படி செய்தால், உனக்கு விதித்த மரண தண்டனையை ரத்து செய்கிறேன்'' என்று சேவகனின் தண்டனையைத் தளர்த்த ஒரு நிபந்தனை விதித்தார், ராஜா.

சிறிது நேரம் யோசித்த சேவகன், ராஜாவின் நிபந்தனைக்கு ஒப்புக் கொண்டான்.

"குதிரையைப் பறக்கச் செய்யும் பயிற்சி அளிப்பதற்கு எனக்கு ஆறு மாத காலம் அவகாசம் வேண்டும். அப்படிச் செய்யவில்லையென்றால் என்னுடைய மரண தண்டனையை நீங்கள் நிறைவேற்றலாம்'' என்று சொல்லிவிட்டு குதிரையோடு வீட்டுக்கு புறப்பட்டான்.

"குதிரை பறப்பது சாத்தியமா? ஏன் வீணாக நிபந்தனைக்கு ஒப்புக் கொண்டாய்? ஆறு மாதத்திற்கு பிறகு உனக்கு மரண தண்டனை நிச்சயம்'' என்றார்கள் அவனுடைய நண்பர்கள்.

"ஆறு மாதம் என்பது நீண்ட காலம். அதற்குள் பட்டத்துக் குதிரையே இறந்து போனாலும் போகலாம். எனக்கே கூட இயற்கையாக மரணம் நிகழலாம். ஒருவேளை ராஜாவே கூட இறந்து போக நேரிடலாம். ஆறு மாதத்திற்கு பிறகு என்ன நடக்கப் போகிறது என்பதை நினைத்து இப்போது ஏன் கவலைப்பட வேண்டும்?'' என்றான் சேவகன்.

இன்றைய பிரச்சினைக்கு தீர்வு கண்டால் போதும். நாளைக்கு என்ன நடக்கப் போகிறதோ என்று பயந்து, இன்று கிடைத்துள்ள நேரத்தை விரயம் செய்யக்கூடாது.