சந்திரனில் ஒரு கிலோ மீட்டர் நீள பதுங்கு குழியை `சந்திரயான் கண்டுபிடித்தது

சந்திரனில் ஒரு கிலோ மீட்டர் நீள பதுங்கு குழியை `சந்திரயான் கண்டுபிடித்தது: விஞ்ஞானிகள் தங்கி இருந்து ஆராய்ச்சி நடத்தலாம்


புதுடெல்லி, பிப்.25- நிலாவில் விஞ்ஞானிகள் தங்கியிருந்து ஆராய்ச்சி செய்வதற்கு ஏற்றவகையில் 1 கி.மீ நீளமும் 6 மீட்டர் ஆழமும் கொண்ட குகை வடிவிலான மிகவும் பாதுகாப்பான பதுங்கு குழி இருப்பதை சந்திரயான் கண்டு பிடித்துள்ளது.

சந்திரயான்-1

நிலாவை ஆராய்ச்சி செய்வதற்காக இந்திய விண்வெளி ஆய்வு மையம் (இஸ்ரோ) சார்பாக சந்திரயான்-1 விண்கலம் அனுப்பப்பட்டது. அதில் மேற்பரப்பு வரைபட கேமரா, நிறப்பிரிகை இமேஜர் போன்ற கருவிகள் இருந்தன. அந்த கருவிகள் அனைத்தும் சந்திரனை முப்பரிமானத்தில் படம் பிடித்து ஏராளமான தகவல்களை `இஸ்ரோ' விஞ்ஞானிகளுக்கு அனுப்பின.

அந்த தகவல்களை இஸ்ரோ விஞ்ஞானிகள் ஆய்வு செய்து வருகின்றனர். வரைபட கேமரா அனுப்பிய படங்களை ஆமதாபாத்தில் உள்ள விண்வெளி தகவல்கள் ஆய்வு மையம் ஆய்வு செய்தது. விஞ்ஞானி ஏ.எஸ்.ஆர்யா தலைமையிலான குழுவினர் மேற்கொண்ட அந்த ஆராய்ச்சியில் ஒரு முக்கியமான தகவல் கிடைத்துள்ளது.

மனிதர்கள் தங்கலாம்

நிலாவின் மேற்பரப்பில் 1.2 கி.மீட்டர் நீளமுடைய மிகவும் பாதுகாப்பான பதுங்கு குழி இருப்பது தெரிய வந்துள்ளது. எந்தவித சேதமும் இல்லாமல் மிக நேர்த்தியாகவும் குகை வடிவிலும் உள்ள அந்த பதுங்கு குழியானது 6 மீட்டர் ஆழம் உடையது. நிலாவில் ஏற்படும் கதிரியக்கம் உள்ளிட்ட இயற்கை பருவ மாற்றங்களில் இருந்து பாதுகாப்பு அளிக்கும் வகையில் இருக்கிறது.

நிலாவில் அதிகபட்சமாக 130 டிகிரி செல்சியஸ் அளவுக்கும் குறைந்த பட்சமாக மைனஸ் 180 டிகிரி செல்சியஸ் அளவுக்கும் வெப்பநிலை இருப்பது வழக்கம். ஆனால், இந்த பதுங்கு குழியை பொருத்தவரை சராசரியாக மைனஸ் 20 டிகிரி செல்சியஸ் வெப்பநிலை நிலவுகிறது. மனிதர்கள் தங்குவதற்கு ஏற்ற வகையில் கட்டமைக்கப்பட்டுள்ளது. மேலும், ஏராளமான அறிவியல் ஆராய்ச்சி கருவிகளையும் அங்கு வைத்துக் கொள்ள முடியும்.

பாதுகாப்பானது

இது குறித்து விஞ்ஞானிகள் கூறுகையில், ``எதிர்காலத்தில் நிலாவில் மனிதர்கள் தங்கி இருந்து ஆராய்ச்சி செய்வதற்கு மிக முக்கியமான இடமாக இந்த குகை உள்ளது. அதிகபட்ச வெப்பநிலை, புழுதிப்புயல், ஆபத்தான கதிர் வீச்சுகள் போன்றவற்றில் இருந்து பாதுகாப்பான நிலையில் இருக்கிறது. கதிரியக்கத்தை உட்கிரகித்துக் கொள்ளும் வகையில் பதுங்கு குழி அமைந்துள்ளது'' என்றனர்.

சந்திரனில் ஒரு கிலோ மீட்டர் நீள பதுங்கு குழியை சந்திரயான் கண்டுபிடித்தது, ஆனால் இதுவரை சந்திராயனைத்தான் யாராலும் கண்டுபிடிக்க முடியவில்லை!

தெரிந்து கொள்ளவேண்டிய செய்தி
பகிர்வுக்கு நன்றி