லிபியா அதிபர் கடாபிக்கு ஐ.நா. பாதுகாப்பு கவுன்சில் எச்சரிக்கை

வன்முறையை முடிவுக்கு கொண்டு வர வேண்டும்: லிபியா அதிபர் கடாபிக்கு ஐ.நா. பாதுகாப்பு கவுன்சில் எச்சரிக்கை


நிïயார்க், பிப்.24- லிபியாவில் போராட்டக்காரர்கள் மீது ஏவி விடப்பட்டுள்ள வன்முறையை உடனடியாக நிறுத்துமாறு ஐ.நா. பாதுகாப்பு கவுன்சில் எச்சரித்துள்ளது.

இந்தியா உள்ளிட்ட நாடுகள்

லிபியாவில் கடந்த 42 ஆண்டுகளாக ஆட்சி செய்து வரும் அதிபர் முவம்மர் கடாபிக்கு எதிராக புரட்சி வெடித்துள்ளது. லிபியா முழுவதும் தெருக்களில் இறங்கி போராடும் மக்கள் மீது அடக்குமுறை கட்டவிழ்த்து விடப்பட்டு இருக்கிறது. சொந்த நாட்டு மக்கள்மீதே ராணுவம் தாக்குதல் நடத்துகிறது. விமானம் மூலமாக குண்டு வீசப்படுகின்றன.

ராணுவம் மற்றும் கடாபி ஆதரவாளர்கள் நடத்தும் தாக்குதலில் இதுவரை 300 பேர் பலியானதாக அதிகாரப்பூர்வமாக அறிவிக்கப்பட்டுள்ளது. அதில், பெரும்பாலானோர் அப்பாவி பொதுமக்கள். இந்த சூழ்நிலையில், லிபியா புரட்சி குறித்து ஐ.நா. பாதுகாப்பு கவுன்சில் கூட்டம் நேற்று முன்தினம் இரவு நடந்தது. தற்போது, தற்காலிக உறுப்பினராக உள்ள இந்தியா உட்பட 15 உறுப்பு நாடுகளின் பிரதிநிதிகள் அந்த கூட்டத்தில் பங்கேற்றனர்.

வன்முறைக்கு முடிவு

கூட்டத்துக்கு பிரேசில் நாட்டு ஐ.நா. பிரதிநிதி மரியா லுய்சா தலைமை தாங்கினார். மூடப்பட்ட அரங்குக்குள் நடந்த அந்த ஆலோசனை கூட்டத்தில், `போராட்டக்காரர்கள் மீது ஏவி விடப்பட்டுள்ள வன்முறையை லிபியா அரசு உடனடியாக நிறுத்த வேண்டும்' என எச்சரிக்கை விடுக்கப்பட்டது. இந்த தகவலை மரியா லுய்சா தெரிவித்தார்.

இது குறித்து அவர் கூறுகையில், அமைதியாக போராட்டம் நடத்துபவர்கள் மீது ராணுவ நடவடிக்கை எடுக்கப்படுவதற்கும் வன்முறை சம்பவங்களுக்கும் ஐ.நா. பாதுகாப்பு கவுன்சில் கூட்டத்தில் கண்டனம் தெரிவிக்கப்பட்டது. பலியான அப்பாவி மக்களுக்காக கூட்டத்தில் வருத்தம் தெரிவிக்கப்பட்டது. லிபியாவில் மனித உரிமை கண்காணிப்பாளர்கள் மற்றும் அமைப்புகளை உடனடியாக அனுமதிக்க வேண்டும் என வலியுறுத்தப்பட்டது'' என்றார்.

மனித உரிமை மீறல்

இதற்கிடையே, லிபியா அதிபர் கடாபியுடன் ஐ.நா. பொதுச் செயலாளர் பான் கீ மூன் தொலைபேசியில் தொடர்பு கொண்டு 40 நிமிடங்கள் பேசினார். அப்போது, லிபியாவில் மனித உரிமைகள் பாதுகாக்கப்பட வேண்டும் என்றும் போராட்டம் நடத்துபவர்கள் மீது தாக்குதல் நடத்துவதை ஏற்றுக் கொள்ள முடியாது என்றும் பான் கீ மூன் தெரிவித்தார்.

ஐ.நா. மனித உரிமை ஆணையரும் போர்க் குற்ற கோர்ட்டு முன்னாள் நீதிபதியுமான நவி பிள்ளை வெளியிட்ட அறிக்கையில், `லிபியாவில் போராட்டம் நடத்துபவர்கள் மீது எந்திர துப்பாக்கிகள், விமானங்கள் மூலமாக தாக்குதல் நடத்துவதாக தகவல்கள் வெளியாகி உள்ளன. அப்பாவி மக்கள் மீதான தாக்குதலை மனித உரிமைக்கு எதிரான குற்றமாகவே கருத முடியும். எனவே, மனித உரிமை குற்றங்களுக்கு லிபியா அரசு ஆளாக நேரிடும்'' என்றார்.

3 ஆயிரம் துருக்கியர்கள்

அதே நேரத்தில், லிபியாவில் வன்முறை பரவுவதால் பல்வேறு உலக நாடுகளும் தங்களுடைய நாட்டு மக்களை மீட்கும் முயற்சிகளை தொடங்கி உள்ளன. பெங்காசி துறைமுகத்தில் இருந்து படகுகள் மூலமாக 3 ஆயிரம் துருக்கியர்களை துருக்கி நாடு அழைத்துக் கொண்டுள்ளது. இதுபோல இங்கிலாந்து, கனடா, பிரான்சு, ஜெர்மனி, ஈரான், இத்தாலி, ஜப்பான் போன்ற நாடுகளும் தங்கள் நாட்டு மக்களை அழைத்து வர முடிவு செய்துள்ளன.

மேலும், வன்முறையை முடிவுக்கு கொண்டு வருமாறு சீனா, அமெரிக்கா ஆகிய நாடுகளும் லிபியாவுக்கு நெருக்கடி அளிக்க தொடங்கியுள்ளன.

தினதந்தி!