மலேசியாஇன்று: உத்துசான் ஏன் ஆழ்ந்த மௌனம் காக்கிறது?”

நேற்று நிகழ்ந்த சர்ச்சைக்குரிய மாட்டுத் தலை ஆர்ப்பாட்டம் மீது அம்னோவுக்குச் சொந்தமான மலாய் நாளேடான உத்துசான் மலேசியா ஏன் ஆழ்ந்த மௌனம் சாதிக்கிறது என்று மூத்த எதிர்க்கட்சித் தலைவர்களில் ஒருவரான லிம் கிட் சியாங் வினவியிருக்கிறார்.

“இஸ்லாத்திற்கு எதிராக அத்தகைய சமய உணர்வுகளை மதிக்காத, இழிவுபடுத்துகிற, குற்றங்கள் ஏதும் செய்யப்பட்டிருந்தால் உத்துசான் மலேசியா ஊரையே கலக்கியிருக்கும்”, என்று அவர் சொன்னார்.

“அது முதல் பக்கத்தில் இடம் பெற்றிருப்பதுடன் கடுமையாகவும் சாடப்பட்டிருக்கும். பெரும்பாலும் அந்தப் பத்திரிக்கையின் பாதி அதற்காக ஒதுக்கப்பட்டிருக்கும். ஏன் இந்த ஆழ்ந்த மௌனம்?”, என்று அவர் இன்று வெளியிட்ட அறிக்கையில் வினவினார்.

கடந்த காலத்தில் உத்துசான் மலேசியா இனவாத உணர்வுகளைக் கொண்ட கட்டுரைகளை வெளியிட்டதற்காக பல முறை உத்துசான் மலேசியா மீது கண்டனம் தெரிவிக்கப்பட்டுள்ளது.

தங்களது பகுதிக்கு இந்து கோவில் ஒன்று இடமாற்றம் செய்யப்படுவது குறித்து ஏமாற்றம் அடைந்த ஷா அலாம் செக்சன் 23 குடியிருப்பாளர்கள் நேற்று அந்த ஆர்ப்பாட்டத்தை நடத்தினர்.

இதனிடையே விசுவாசமுள்ள நல்லெண்ணம் கொண்ட நியாயப் போக்குடைய அனைத்து மலேசியர்களும் அந்த மாட்டுத் தலை பாவச் செயலை கூடின பட்சம் வலுவாகக் கண்டிக்க வேண்டும் என்றும் லிம் வலியுறுத்தினார்.

“பல சமயங்களைக் கொண்ட மற்ற சமூகங்களில் முக்கியமான சமயங்களில் ஒன்றுக்கு சமய உணர்வுகளை மதிக்காத, இழிவுபடுத்துகிற, குற்றங்கள் இழைக்கப்பட்டிருந்தால் அங்கு பெரும் குழப்பங்களும், கலவரங்களும், உயிரிழப்புக்களும் ஏற்பட்டிருக்கும்”, என்றும் அவர் சொன்னார்.

வருந்தத்தக்க அத்தகைய பாவச் செயல் நிகழ்ந்த போதிலும் அமைதி நிலவுவது இந்த நாட்டில் உயர்ந்த பட்சம் முதிர்ச்சியும் பரஸ்பரம் சகிப்புத் தன்மையும் நல்லெண்ணமும் சகவாழ்வு உணர்வும் நிலைத்திருப்பதைக் காட்டுவதாக அவர் மேலும் கூறினார்.

பல சமய சமூகம் ஒன்றில் ஒரு சமயத்திற்கு இழைக்கப்படும் பாவச்செயல் மற்ற சமயங்களுக்கும் நாடு முழுவதுக்கும் இழைக்கப்பட்டுள்ள பாவச் செயலாக கருதப்பட வேண்டும் என்றும் லிம் வலியுறுத்தினார்.

நாம் இந்த நாட்டை போற்றி நேசிக்க வேண்டுமானால் எல்லா அரசியல் கட்சிகளும் ஊடகங்களும் அரசாங்கச் சார்பற்ற அமைப்புக்களும் மலேசியர்களும் இணக்கத்தைக் காண்பது அவசியம் என்பதையும் அந்த சம்பவம் உணர்த்தியிருப்பதாகவும் அவர் கருதுகிறார்.