தடை செய்யப்பட்ட சல்மான் பட் புது அவதாரம்!!

கராச்சி, பிப். 20: கிரிக்கெட் சூதாட்டத்தில் ஈடுபட்டதால் சர்வதேச கிரிக்கெட் கவுன்சிலால் (ஐசிசி) 5 ஆண்டுகள் தடை விதிக்கப்பட்டுள்ள பாகிஸ்தான் வீரர் சல்மான் பட் உலகக் கோப்பை கிரிக்கெட்டை முன்னிட்டு "கிரிக்கெட் நிபுணர்' என்ற புதிய அவதாரம் எடுத்துள்ளார்.
பாகிஸ்தானில் உள்ள "சேனல் ஃபைவ்' உலகக் கோப்பை கிரிக்கெட் போட்டிகளை அலசி ஆராயும் தனது தொலைக்காட்சி நிகழ்ச்சியில் அவரை ஓரு கிரிக்கெட் நிபுணராகச் சேர்த்துக் கொண்டுள்ளது.
சல்மான் பட்டை கிரிக்கெட் நிபுணராக நிகழ்ச்சியில் பங்கேற்கச் செய்யும் முடிவு குறித்து ஐசிசி அதிருப்தியும், கவலையும் தெரிவித்துள்ளது.
இந்நிலையில் சல்மான் பட் நியமனம் தொடர்பாக "சேனல் ஃபைவ்' விளக்கமளித்துள்ளது. அதில் சல்மான் பட் பாகிஸ்தான் அணியின் முன்னாள் கேப்டன், கிரிக்கெட்டில் நிபுணத்துவம் வாய்ந்தவர்.
உலகக் கோப்பைப் போட்டி குறித்து நிபுணர்கள் மூலம் ரசிகர்களுக்கு விறுவிறுப்பான கலந்துரையாடல்களை அளிக்க திட்டமிட்டுள்ளோம், இதில் அவரைச் சேர்த்துள்ளதில் எவ்விதத் தவறும் இருப்பதாகத் தெரியவில்லை என்று தெரிவித்துள்ளது.
இந்த நியமனம் குறித்து பாகிஸ்தான் கிரிக்கெட் வாரியமும் அதிருப்தி தெரிவித்துள்ளது எனினும் அந்த சேனல் ஐசிசி-யுடனோ அல்லது பாகிஸ்தான் கிரிக்கெட் வாரியத்துடனோ எவ்விதத் தொடர்பிலும் இல்லை எனவே இது தொடர்பாக அதன் மீது எவ்வித நடவடிக்கையும் எடுக்க முடியாது என்று தெரிவித்துள்ளது.
சல்மான் பட் கருத்து: கிரிக்கெட்டுடன் எவ்விதத்திலாவது தொடர்பில் இருக்க வேண்டும் என்ற நோக்கத்தில்தான் இந்தப் பணியில் ஈடுபட்டுள்ளேன். எனது தடையை எதிர்த்து சர்வதேச நீதிமன்றத்தில் மேல்முறையீடு செய்யவும் எனக்கு வாய்ப்புகள் உள்ளன என்று சல்மான் பட் கூறியுள்ளார்.
இங்கிலாந்துக்கு எதிரான கிரிக்கெட் போட்டியின் போது "ஸ்பாட் பிக்ஸிங்' கிரிக்கெட் சூதாட்டத்தில் ஈடுபட்டதாக பாகிஸ்தான் வீரர்கள் சல்மான் பட், முகமது ஆசிப், முகமது ஆமீர் ஆகியோர் மீது குற்றச்சாட்டு எழுந்தது. இதனை விசாரித்த ஐசிசி இந்த வீரர்கள் சில ஆண்டுகளுக்கு கிரிக்கெட் விளையாடத் தடை விதித்தது.

தினமணி