கலைஞர் டிவி அலுவலகத்தில் சிபிஐ அதிரடி சோதனை

சென்னை, பிப்.18,2011
2ஜி ஸ்பெக்ட்ரம் முறைகேடு தொடர்பாக, சென்னையில் உள்ள கலைஞர் டிவி அலுவலகத்தில் சிபிஐ அதிகாரிகள் அதிரடி சோதனை நடத்தினர்.
கலைஞர் டிவி அலுவலகத்தில் நள்ளிரவு 12 மணிக்கு தொடங்கிய இந்த சோதனை காலை
வரை நீடித்தது. இந்தச் சோதனையில் 10 அதிகாரிகள் ஈடுபட்டதாக தெரிகிறது.
மேலும், கலைஞர் டிவி நிறுவனத்தின் தலைமை நிர்வாக அதிகாரி சரத்குமாரிடம் சுமார் 3 மணி நேரம் விசாரித்ததாக தகவல்கள் தெரிவிக்கின்றன.
இந்தச் சோதனையின்போது, பல்வேறு ஆவணங்களையும் சிபிஐ அதிகாரிகள் பறிமுதல் செய்ததாக தெரிகிறது.
முன்னதாக, 2ஜி ஸ்பெக்ட்ரம் ஒதுக்கீட்டை முறைகேடாகப் பெற்றதாக மும்பையைச்
சேர்ந்த ஸ்வான் நிறுவனத்தின் நிர்வாக இயக்குனர் பால்வா அண்மையில் சிபிஐ
அதிகாரிகளால் கைது செய்யப்பட்டார்.
இவரிடம் நடத்திய விசாரணையில், கலைஞர் டி.வி.க்கு ஸ்வான் நிறுவனம் ரூ.214 கோடி கொடுத்ததாகத் தெரியவந்தது.
அதேவேளையில், சினியூக் நிறுவனத்திடம் இருந்து கடனாகப் பெற்ற ரூ.200
கோடியை கலைஞர் தொலைக்காட்சி நிறுவனத்தினால் திருப்பித்தரப்பட்டுவிட்டது.
அந்தத் தொகைக்கான வட்டியாக ரூ.31 கோடி கொடுக்கப்பட்டது என்றும்,
அந்த பரிவர்த்தனை முழுவதும் வருமான வரித் துறைக்கு தெரியப்படுத்தப்
பட்டு, அதற்கான வரியும் முறையாக செலுத்தப்பட்டுள்ளது என்று கலைஞர் டிவி
நிறுவனத்தின் தலைமை நிர்வாக அதிகாரி சரத்குமார் இரண்டு முறை விளக்கம்
அளித்து அறிக்கை வெளியிட்டிருந்தது குறிப்பிடத்தக்கது.
கனிமொழியிடம் விசாரணை நடத்த முடிவு?
ஸ்வான் நிறுவனத்திடமிருந்து கலைஞர் டிவிக்கு பணம் கைமாறியது தொடர்பாக,
அதன் இயக்குநர் கனிமொழியிடமும் விசாரணை நடத்த சிபிஐ அதிகாரிகள்
திட்டமிட்டுள்ளதாகத் தெரிகிறது.
இது தொடர்பாக சில கேள்விகள் அடங்கிய பட்டியலை சில நாள்களுக்கு முன்பு
சிபிஐ அதிகாரிகள் கனிமொழிக்கு அனுப்பி வைத்திருப்பதாகவும் டெல்லி
வட்டாரங்கள் தெரிவிக்கின்றன.
அதேநேரத்தில், கலைஞர் டி.வி.யின் மற்றொரு இயக்குநரான தயாளு அம்மாளை
விசாரணைக்கு அழைக்கும் திட்டம் சிபிஐக்கு இல்லை என்றும் அந்த தகவல்
தெரிவிக்கிறது.

இதெல்லாம் திட்டமிட்டு நடத்தபடும் நாடகங்கள்