இனப் பதற்றத்தால் சீர்குலையும் அபாயத்தில் மலேசியா, விரிவுரையாளர் எச்சரிக்கை

இன அரசியலைக் கட்டுப்படுத்தி வைக்காவிட்டால் மலேசியாவில் இன உறவுகள் முற்றாக சீர்குலைந்துபோகும் அபாயம் உள்ளதென்று அரசியல் ஆய்வாளர் ஒருவர் எச்சரித்துள்ளார்.

மலேசிய அரசியல், கடுமையான இன, சமய கலவரங்கள் நடந்துள்ள நாடுகளின் அரசியல்போல் இருப்பதாக சிங்கப்பூர் நன்யாங் தொழில்நுட்பப் பல்கலைக்கழக விரிவுரியாளர் பாரிஷ் நோர் கூறினார்.

“சீர்குலைந்துபோன நாடுகளைப் பத்தாண்டுகளுக்குமேலாக ஆராய்ந்து வந்திருக்கிறேன்.பாகிஸ்தான், இந்தோனேசியா, வங்காள தேசம் போன்ற நாடுகள் சென்ற பாதையில்தான் நாமும் செல்வதாக நினைக்கிறேன்.

“எத்தனையோ இன, சமயக் கலகங்களைக் கண்டு விட்டேன். மலேசியாவும் அந்நிலையை நெருங்கிச் சென்று கொண்டிருக்கிறது”, என்றாரவர்.

இந்தோனேசியாவில் 1998-இல், சீனர்களுக்கு எதிராக கடுமையான தாக்குதல்கள் நடத்தப்பட்டன. வங்காள தேசத்திலும் பாகிஸ்தானிலும் சிறுபான்மை இந்துக்களுக்கு எதிராக சமய எதிர்ப்புகள் கிளம்பின.

பெர்டானா தலைமைத்துவ அறநிறுவனமும் தேசிய பேராசிரியர் மன்றமும் ஏற்பாடு செய்திருந்த பொதுநிர்வாகம் மீதான கருத்தரங்கில் இன்று பேசிய பாரிஷ், அரசியல்வாதிகள்தாம் இதற்குக் காரணம் என்றார்.

“அரசியல்வாதிகளின் நடத்தையால்தால் இப்படிப்பட்ட நிலைமை உருவாகிறது. ஒவ்வொரு அரசியல் கட்சியும் அதுஅதற்கெனவுள்ள இன வாக்கு வங்கிகளை நம்பியே செயல்படுகிறது. கெராக்கான்போல் இனச்சார்பற்ற கட்சிகள் அமைக்கும் முயற்சிகள் பலமுறை மேற்கொள்ளப்பட்டும் வெற்றி பெறவில்லை”, என்று சுமார் 80 பேர், பெரும்பாலும் கல்வியாளர்கள், அடங்கிய கூட்டத்தில் அவர் கூறினார்.

“இந்நிலையில் அரசியல்வாதிகளிடம் விவேகமாகவும் அறிவார்ந்த ரீதியிலும் நடந்துகொள்ள வேண்டும் என்று கூறுவது எப்படி?அதில் வாக்குகளை இழக்கும் அபாயம் இருக்கிறதே.”

பாரிஷின் கருத்துகளுடன் உடன்பட்ட இன்னொரு பங்கேற்பாளரான மெகாட் நஜ்முடின் மெகாட் ஹாஸ் (இடம்), இன அரசியலை ஒழிப்பதற்குள்ள ஒரே வழி சட்டப்படி அதைத் தடுப்பதுதான் என்றார்.

“1மலேசியா அமைய வேண்டும் என விரும்புகிறோம். ஆனால் அரசியலில் அதற்கு நேர்மாறாக நடந்துகொள்கிறோம்”, என்றார்.

அம்னோ ஒழுங்குவாரிய உறுப்பினருமான மெகாட் நஜ்முடின், இன உறவுகள் நலிந்து போனதற்குத் தாய்மொழிப் பள்ளிகளும் ஒரு காரணம் என்றார்.

“1மலேசியா பற்றிப் பேச வேண்டுமென்றால் இன அரசியலையும் தாய்மொழிப் பள்ளிகளையும் விட்டொழிக்க வேண்டும்.”

பிள்ளைகள் வெவ்வேறு மொழிகளில் கல்வி கற்று வளரும் சூழலில் தேசிய ஒற்றுமையை உருவாக்குவது சாத்தியமில்லை என்றாரவர்.

“ஐந்து வகை மொழிகளில் கல்வி கற்றுக்கொடுத்துக்கொண்டே கருத்தொற்றுமை கொண்ட ஒரு நாட்டை உருவாக்க முடியாது. வளர்ந்த நாடுகளிலும் இப்பிரச்னை உண்டு”, என்றவர் சொன்னார்.

மலேசியா இன்று

உலகம் முழுவதுமே ஒரு வித பதட்டத்தில் மாறி வருவதாக அவதானிக்கக் கிடைக்கின்றன. அதில் மலேசியாவும் தப்பவில்லை என்பது வேதனைக் குரியது.