50 தொகுதிகள், மனைவிக்கு துணை முதலமைச்சர் பதவி: விஜயகாந்த் பேரம்

by **ஸ்ரீஜா** Thu Feb 17, 2011 11:54 am

FILE
தமிழகத்தில் தற்போது அரசியல் களம் சூடுபிடித்துள்ளது. கூட்டணி குறித்து ஒவ்வொரு கட்சிகளும் முடிவு செய்துவிட்ட நிலையில் தே.மு.தி.க. தலைவர் விஜயகாந்த் மட்டும் இன்னும் யாருடன் கூட்டணி என்பது குறித்து சஸ்பென்ஸாக வைத்துள்ளார்.

இந்த சஸ்பென்ஸ் குறித்து அ.இ.அ.தி.மு.க வட்டாரங்களில் விசாரித்தபோது கிடைத்த தகவல்கள், அடேங்கப்பா ரகமாக இருக்கிறது. வரும் சட்டப்பேரவை தேர்தலில் அ.இ.அ.தி.மு.க. கட்சியுடன் கூட்டணி வைத்து கொள்வதற்காக தே.மு.தி.க. தலைவர் விஜயகாந்த் முடிவு எடுத்துவிட்டார் என்றாலும், தே.மு.தி.க.வுக்கு 50 இடம், துணை முதலமைச்சர் பதவி - அதுவும் அவரது மனைவி பிரேமலதாவுக்கு - வேண்டும் என்று கறாராக கூறிவிட்டாராம்.

இது தொடர்பாக அ.இ.அ.தி.மு.க.வுடன் பேசுவதற்காக தனது மனைவி பிரேமலதா, மைத்துனர் சுதீஷ், அவைத் தலைவர் பண்ருட்டி ராமச்சந்திரன் ஆகியோரை விஜயகாந்த் நியமித்துள்ளார்.

FILE
அவர்கள் அ.இ.அ.தி.மு.க குழுவுடன் தொடர்ந்து பேசி வருகின்றனர். ஆனால் 50 இடம், துணை முதலமைச்சர் பதவி என்பதில் பிடிவாதம் காட்டி வருவதாலேயே கூட்டணி குறித்த அதிகாரபூர்வ அறிவிப்பில் இழுபறி நீடித்து வருவதாக கூறுகிறது அ.இ.அ.தி.மு.க. வட்டாரம்.

விஜயகாந்தின் இந்த பிடிவாதத்தால் சிறிய கட்சிகளுடன் கூட்டணியை முதலில் முடிவு செய்து, தொகுதிகளை ஒதுக்கி வருகிறது அ.இ.அ.தி.மு.க. தற்போது மருத்துவர் கிருஷ்ணசாமியின் புதிய தமிழகம் கட்சிக்கு 2 தொகுதியும், செ.கு.தமிழரசனின் இந்திய குடியரசுகட்சிக்கு ஒரு தொகுதியும் ஒதுக்கியுள்ளார் ஜெயலலிதா.

நடிகர் கார்த்திக்கின் நாடாளு‌ம்மக்கள் கட்சி, மனித நேய மக்கள் கட்சி, அகில இந்திய மூவேந்தர் முன்னணிக் கழகம் ஆகிய கட்சிகள் இடையேயான தொகுதி உடன்பாடு வரும் 18ஆம் தேதி முடிவாகும் என்று கூறுகிறது அ.இ.அ.தி.மு.க வட்டாரம்

FILEதுணை முதலமைச்சர் பதவி இல்லாமல் தே.மு.தி.க.வுக்கு எத்தனை தொகுதிகள் என்பது குறித்து இன்னும் சில தினங்களில் இறுதி முடிவு எடுக்கப்பட உள்ளதாகவும், அதன் பிறகு கம்யூனிஸ்ட் கட்சிகள், ம.தி.மு.க. ஆகிய கட்சிகளுக்கான தொகுதிகளும் ஒதுக்கீடு செய்யப்பட்டு விடும்.

இதைத் தொடர்ந்து அ.இ.அ.தி.மு.க. கூட்டணியில் எந்தெந்த கட்சிகள் உள்ளன , அந்தக் கட்சிகளுக்கான தொகுதிகள் பற்றிய விவரங்களும் இன்னும் ஒரு வாரத்தில் இறுதி செய்யப்படலாம் என்றும் கூறுகிறது அந்த வட்டாரங்கள்.

விஜயகாந்தின் இழுபறியையும், மனைவிக்கு துணை முதலமை‌ச்சர் பதவி கேட்பதையும் பார்த்தால், அநேகமாக அவர் அ.இ.அ.தி.மு.க கூட்டணிக்குள் வரமாட்டார் என்றே கூறுகின்றனர் அரசியல் நோக்கர்கள்!
நன்றி வெப்துனியா .......

by D.SABARINATHAN Thu Feb 17, 2011 12:08 pm

தமிழ் நாட்டு தலைஎழுத்த பார்த்தீங்களா..............
தமிழ் நாட்டை காட்சிகள் பங்குபோட ஆரம்பித்துவிட்டார்கள். இது தொடர்ந்தால் தமிழ்நாட்டின் ஒவ்வொரு மாவட்டமும் ஒவ்வொரு கட்சிக்கு சொந்தமாகிவிடும்....