நடராஜர் கோவிலில் இன்று மகா அபிஷேகம்

by **சிவா** Wed Feb 16, 2011 10:30 pm

சிதம்பரம் : சிதம்பரம் நடராஜர் கோவில் தீட்சிதர்களுக்குள் ஏற்பட்ட கருத்து வேறுபாடு நீங்கி, அறிவித்தபடி இன்று மகா அபிஷேகம் நடக்கிறது. கடலூர் மாவட்டம் சிதம்பரம் நடராஜர் கோவிலில் நடராஜர், சிவகாமசுந்தரி அம்பாளுக்கு, ஆண்டுக்கு ஆறு முறை மகா அபிஷேகம் நடத்தப்படுகிறது. ஆனி திருமஞ்சனம், ஆருத்ரா தரிசன காலங்களில் இருமுறை ஆயிரங்கால் மண்டபத்திலும், நான்கு முறை நடராஜர் வீற்றிருக்கும் சபைக்கு முன்புறம் கனக சபையில் நடக்கிறது.

மாசி மாதத்தில் நடக்கும் மகா அபிஷேகம் இன்று (16ம் தேதி) நடப்பதாக பொது தீட்சிதர்களின் செயலர் உள்ளிட்டவர்கள் முடிவு செய்து அறிவித்தனர். இது வழக்கத்திற்கு மாறானது. பஞ்சாங்கப்படி 17ம் தேதி தான் நடத்த வேண்டும் என, தீட்சிதர்களின் மற்றொரு தரப்பினர் எதிர்ப்பு தெரிவித்தனர்.

இந்நிலையில், அவர்களுக்குள் ஏற்பட்ட கருத்து வேறுபாடு நீங்கி ஒருமித்த ஆதரவுடன் இன்று (16ம் தேதி) மகா அபிஷேகம் நடத்தப்படும் என, பொது தீட்சிதர்களின் செயலர் வைத்தியலிங்க தீட்சிதர் அறிவித்துள்ளார்.

அவர் கூறுகையில், "ஆண்டுக்கு ஆறு முறை நடத்தப்படும் மகா அபிஷேகத்தில் மூன்று நட்சத்திரத்தை கணக்கிட்டும், மூன்று வளர்பிறை சதுர்தசியிலும் நடத்தப்படுகிறது. 16ம் தேதி மாலையே சதுர்தசி பிறந்து விடுவதால், அன்று மாலை நடராஜர் கோவிலில் மகா அபிஷேகம் நடத்துவது தான் சரியானது' என்றார். மகா அபிஷேகத்தையொட்டி, காலை முதல் மாலை வரை கோவிலில் அதிருத்ர மகா ஜப எக்னம், வேள்வி ஆகியவை நடக்கிறது.