கனிமொழி எம்பி திடீர் கைது : சென்னையில் பரபரப்பு

சென்னை : தமிழக மீனவர்கள் மீதான இலங்கை கடற்படையின் தாக்கு‌தலைக் கண்டித்து, போராட்டத்தில் ஈடுபட்ட முதல்வர் கருணாநிதியின் மகளும், திமுக ராஜ்யசபா எம்பி யுமான கனிமொழி கைது செய்யப்பட்டார். இந்த திடீர் கைதால் சென்னையில் பரபரப்பு ஏற்பட்டது.

நாகப்பட்டினத்தைச் சேர்ந்த தமிழக மீனவர்கள் 106 பேரை இலங்கை கடற்படை கைது செய்து பிடித்து வைத்திருப்பது, மீனவர்களிடையே பெரும் கலக்கத்தை ஏற்படுத்தி உள்ளது. கடந்த 12ம் தேதி 18 படகுகளில் 100க்கும் மேற்பட்டோர், மீன்பிடிக்க கடலுக்கு சென்றனர். இவர்களில் சிலர் மட்டுமே கரை திரும்பினர். 106 பேர் கர‌ை திரும்பவில்லை. இந்நிலையில், கரை திரும்பாத 106 பேரும் இ‌லங்கை கடற்படையால் கைது செய்யப்பட்டுள்ளதாக அங்கிருந்து வந்த தகவல்கள் தெரிவித்தன. தமிழக மீனவர்கள் இலங்கை கடற்பகுதிக்குள் அத்துமீறி நுழைந்து மீன்பிடித்ததாகவும், அதனால் அவர்கள் கைது செய்யப்பட்டதாகவும் இலங்க‌ை கடற்படை தகவல்கள் தெரிவித்தன.

இதையடுத்து, நாகை , காரைக்கால் மற்றும் அதனை சுற்றியுள்ள பகுதிகளில் மீனவர்கள் வேலைநிறுத்தப் போராட்டத்தை துவக்கி உள்ளனர். இன்று, அவர்களின் பிரதிநிதிகள் முதல்வரை சந்தி்த்து, முறையிடவும் திட்டமிட்டுள்ளனர். கடற்படையின் அட்டூழியங்கள் ‌தொடர்கதையாகி வருவதை கண்டித்து, மாநிலம் முழுவதும் திமுகவினர் மறியல் உள்ளிட்ட போராட்டங்களை நடத்தினர். இதன்காரணமாக, பலர் கைது செய்யப்பட்டனர்.

கனிமொழி கைது : இதன் ஒருபகுதியாக, சென்னையில் உள்ள இலங்கை ஹை கமிஷனர் அலுவலகம் முன்பு திமுகவினர் போராட்டம் நடத்தினர். முதல்வர் கருணாநிதியின் மகளும், திமுக எம்பியுமான கன்மொழி,போராட்டத்திற்கு தலைமை தாங்கினார். லோக்சபா எம்பி டிகேஎஸ் இளங்கோவன் உள்ளிட்ட கட்சி முக்கிய பிரமுகர்கள், தொண்டர்கள் திரளாக கலந்துகொண்ட இந்த போராட்டத்தில், இலங்கை அரசிற்கு எதிராக கண்டன கோஷங்கள் எழுப்பப்பட்டன. போராட்டத்தின் உச்சகட்டமாக, இலங்கை ஹை கமிஷனர் அலுவலகத்தை முற்றுகையி‌ட முயன்றனர். இதையடுத்து, அங்கு பாதுகாப்பிற்கு நி்ன்ற போலீசார் கனிமொழி உள்ளிட்டோரை கைது செய்தனர். இதனால், அங்கு பெரும்பரபரப்பு நிலவியது.

கைது செய்து ‌போலீஸ் வேனில் ஏற்றிய போது நிருபர்களுக்கு அளித்த பேட்டியில், தமிழக மீனவர்கள் மீதான தாக்குதலை உடனே இலங்கை கடற்படை நிறுத்த வேண்டும். கைது செய்யப்பட்ட தமிழக மீனவர்கள் உடனே விடு‌தலை செய்யப்பட வேண்டும், அதுவரை தொடர்ந்து போராடுவோம் என்று கூறினார்.

264 பேர் கைது : திருநெல்வேலி ரயில்வே ஸ்டேசன் முன்பு போராட்டத்தில் ஈடுபட்ட 200க்கும் மேற்பட்ட திமுகவினர் கைது செய்யப்பட்டனர். அதேபோல் நாகப்பட்டினத்தில் எம்பி விஜயன் உள்ளிட்ட 100க்கும் மேற்பட்டோர் கைது செய்யப்பட்டனர்.