மிலாது நபியை முன்னிட்டு தலைவர்கள் வாழ்த்து

**சிவா** · **சிவா** Wed Feb 16, 2011 3:55 pm

சென்னை, பிப்.16- இன்று மிலாது நபியை முன்னிட்டு பல்வேறு கட்சித் தலைவர்கள் வாழ்த்து தெரிவித்துள்ளனர்.

ஜெயலலிதா வாழ்த்து

அ.தி.மு.க. பொதுச் செயலாளர் ஜெயலலிதா கூறியிருப்பதாவது:-

முகமது நபி பிறந்த நாளினை பெருமகிழ்வுடன் கொண்டாடும் இஸ்லாமியப் பெருமக்கள் அனைவருக்கும் எனது இதயம் கனிந்த "மீலாதுன் நபி'' நல்வாழ்த்துகளைத் தெரிவித்துக்கொள்கிறேன்.

இந்த நன்னாளில் நபிகள் நாயகத்தின் போதனைகளான அமைதி, சமாதானம், சகோதரத்துவம் ஆகியவை மீண்டும் ஏற்படவும், தமிழக மக்கள் அனைவரும் இன்புற்று வாழ்வதற்கான சூழ்நிலை உருவாகவும் உழைப்போம் என உறுதிகொள்வோம். இறைநபி பிறந்த நாளைக் கொண்டாடி இன்புறும் இஸ்லாமிய சகோதர, சகோதரிகள் அனைவருக்கும் மீலாதுன் நபி வாழ்த்துகளை மீண்டும் ஒரு முறை உரித்தாக்கிக்கொள்வதில் மிக்க மகிழ்ச்சி அடைகிறேன்.

இவ்வாறு ஜெயலலிதா கூறியுள்ளார்.

கே.வி.தங்கபாலு

தமிழக காங்கிரஸ் தலைவர் கே.வி.தங்கபாலு, ``நபிகள் நாயகம் பிறந்த நாளான மிலாது நபி இஸ்லாமிய பெருமக்களால் மகிழ்ச்சியோடு கொண்டாடப்படுகிறது. அவர் வகுத்தளித்த நெறியினையும், போதனைகளையும் ஏற்று நாட்டில் வன்முறை, தீவிரவாதம் ஒழிந்து, மத நல்லிணக்கம் மிளிர்ந்து, ஒற்றுமை, ஒருமைப்பாடு சிறந்து, அனைவர் வாழ்விலும் இனிமை பெருகிட உறுதியேற்போம். அனைத்து இஸ்லாமியர்களுக்கு நெஞ்சார்ந்த நல்வாழ்த்துகள்'' என்று கூறியுள்ளார்.

டாக்டர் ராமதாஸ்

பா.ம.க. நிறுவனர் டாக்டர் ராமதாஸ் கூறியிருப்பதாவது:-

தொல்லை கொடுப்போரையும் மன்னிக்கும் தன்மை கொண்ட நபிகள் நாயகம் பிறந்தநாளாகிய `மிலாது நபி' நன்னாளை கொண்டாடும் இஸ்லாமிய சகோதரர்கள் அனைவருக்கும் உளமார்ந்த நல்வாழ்த்துகளை தெரிவித்துக்கொள்கிறேன். ஒருவர் எப்படி வாழவேண்டும் என்று நபிகள் நாயகம் போதித்தாரோ, அப்படியே வாழ்ந்து காட்டியவர்.

எத்தகைய இடைïறுகள் ஏற்படுத்தினாலும் அவற்றை அன்பால் எதிர்கொள்ள வேண்டும் என்று, போதித்தபடியே வாழ்ந்து வெற்றிகளை கண்டவர் நபிகள் நாயகம். அவரது பிறந்தநாளை கொண்டாடி மகிழும் இந்நாளில், அவர் வழியில் அனைவரையும் அன்புடன் அரவணைத்து மன்னிக்கும் அருங்குணத்தைப் பெற்று சமுதாயத்தில் அமைதியையும், சமாதானமும், சமய நல்லிணக்கமும் தழைக்க எல்லோரும் உறுதியேற்போம்.

இவ்வாறு டாக்டர் ராமதாஸ் கூறியுள்ளார்.

வைகோ

ம.தி.மு.க. பொதுச் செயலாளர் வைகோ கூறியிருப்பதாவது:-

ஹீரா மலைக்குகையில் திருவருளால் கிடைக்கப் பெற்ற இறைச்செய்தியை, மனிதகுலம் போற்றும் ஒரு மார்க்கமாக நிறுவி, கல்லடியும் சொல்லடியும் எதிர்கொண்டு, துன்பங்கள் நிறைந்த பயணத்தை நடத்தி, தங்களைவிட எண்ணிக்கையில் பன்மடங்கு அதிகம் உள்ள, ஆயுதம் ஏந்திய படைகளை எதிர்த்து, வீரச்சமர் புரிந்து வெற்றியும் கண்டு, இஸ்லாம் மார்க்கத்துக்கு மகுடம் சூட்டிய பெருமகனாரின் பிறந்தநாளைத்தான், இன்று உவகையுடன் இஸ்லாமிய உலகம் கொண்டாடுகிறது.

தமிழ்நாட்டில் அன்பையும், பரிவையும், விருந்தோம்பும் உன்னதப் பண்பையும் போற்றி வரும் இஸ்லாமியப் பெருமக்கள், மீலாது விழாவைச் சிறப்புடன் கொண்டாடி மகிழ, இனிய வாழ்த்துகளைத் தெரிவித்துக்கொள்கிறேன்.

இவ்வாறு வைகோ கூறியுள்ளார்.

தமிழக பாரதீய ஜனதா கட்சித் தலைவர் பொன்.ராதாகிருஷ்ணன், ``தமிழ்நாட்டில் உள்ள அனைத்து இஸ்லாமிய சகோதரர்களுக்கும் மிலாது நபி வாழ்த்துக்களை தெரிவித்துக்கொள்கிறேன்'' என்று கூறியுள்ளார்.

காதர்மொய்தீன்

இந்திய யூனியன் முஸ்லிம் லீக் தலைவர் காதர் மொய்தீன் கூறியிருப்பதாவது:-

நபிகள் நாயகம் முகம்மது எல்லோருடனும் இணக்கமாகவும், பிணக்கு நீக்கியும் வாழும் முறையை கற்பித்தார். இன்றைக்கு இந்த தூய மானிட நேய நெறியைத் தவறாகப் புரிந்துள்ள நிலையை உலகம் முழுவதிலும் பார்க்க முடிகிறது. சரியான நெறியாகிய இஸ்லாமிய நெறியை உலகம் முழுவதிலும் உள்ள மக்கள் மிகவும் சரியாகப் புரிவதற்கு பணியாற்றுவது தான் இன்றைய முஸ்லிம்களின் கடமையாகும். நபிகளாரின் வழியே பின்பற்றி நடப்போம்; அதை உலகிற்கு சொல்வோம்; உள்ளங்களை வெல்வோம்.

இவ்வாறு காதர் மொய்தீன் கூறியுள்ளார்.

அகில இந்திய ஹஜ் கமிட்டி துணைத்தலைவர் `பிரசிடென்ட்' அபூ பக்கர், புதிய நிதி கட்சி நிறுவனர் தலைவர் ஏ.சி.சண்முகம், அகில இந்திய மூவேந்தர் முன்னணி கழக தலைவர் டாக்டர் சேதுராமன், தமிழ் மாநில முஸ்லிம் லீக் தலைவர் ஷேக்தாவூத், முஸ்லிம் உரிமை பாதுகாப்பு கழக பொதுச் செயலாளர் இடிமுரசு இஸ்மாயில் உள்பட பலர் வாழ்த்து தெரிவித்துள்ளனர்.