ஊட்டச்சத்து ஊத்தப்பம்

by **சிவா** Wed Feb 16, 2011 3:04 pm

உடல் உற்சாகமாக ஓடி ஆடி செயல்படுவதற்கு ஏற்ற பல ஊட்டச்சத்துகள் நிறைந்தது ஊத்தப்பம். காய்களை தனியே சாப்பிட அடம் பிடிக்கும் குழந்தைகளையும், காய்களை சாப்பிடத் தூண்டி இழுக்கும் வகையில் இருக்கும் பல வண்ண காய்கறி நிறைந்தது ஊத்தப்பம். உடலுக்கு அதிக சக்தியைக் கொடுக்கும் கார்போஹைட்ரேட் சத்து நிறைந்த அரிசி, சிறிதளவே உபயோகித்தாலும் நிறைந்த அளவு நன்மை தரும் புரதச்சத்து நிறைந்த உளுத்தம் பருப்பு, நார்ச்சத்து மிக்க இஞ்சி விழுது, வெங்காயம், ஆரோக்கியத்தின் சுரங்கங்களாக விளங்கும் பச்சைக் காய்கள், மிதமான கொழுப்பு சத்து நிறைந்த எண்ணை, நெய் இத்தனையும் சேர்த்து செய்யப்படும் ஊத்தப்பம் ஊட்டச்சத்து நிறைந்தது என்பது உண்மைதானே!

இட்லி மாவு தயாராக இருந்தால் மிக மிக சுலபமாக ஊத்தப்பத்தைச் செய்து உண்ணலாம் என்பது போனஸ் தகவல்.

வாருங்கள் இம்முறை ஊட்டச்சத்து ஊத்தப்பம் செய்வோம்.

தேவையான பொருட்கள்

இட்லிமாவு - 1 கப்
வெங்காயம் - 2
இஞ்சி விழுது - 1/2 டீஸ்பூன்
பச்சை மிளகாய் - 2
பீன்ஸ், கேரட், கோஸ், காலிபிளவர்
(பொடியாக அரிந்தது) - 1 கப்
பச்சைப்பட்டாணி - 50 கிராம்
எண்ணை - 4 டேபிள் ஸ்பூன்
கடுகு - 1/4 டீஸ்பூன்
உடைத்த உளுத்தம் பருப்பு - 1/2 டீஸ்பூன்
உப்பு - 1 டீஸ்பூன்

ஊத்தப்பம் செய்ய...

எண்ணை - 4 டேபிள் ஸ்பூன்
இட்லி மிளகாய்ப் பொடி - 4 டேபிள் ஸ்பூன்

செய்முறை

* ஒரு வாணலியில் எண்ணை ஊற்றி கடுகு வெடிக்கவிட்டு, உடைத்த உளுத்தம் பருப்பு போட்டு அது சிவந்து வரும் வரை வறுக்கவும்.

* பிறகு பொடிப் பொடியாக அரிந்த வெங்காயம், இஞ்சி விழுது, பச்சை மிளகாய் சேர்த்து நன்கு வதக்கவும்.

* இப்போது தோலுரித்த பச்சைப் பட்டாணி, அரிந்த காய்கள், உப்பு சேர்த்து நன்கு வதக்கவும்.

* தோசைக் கல் அல்லது நான் ஸ்டிக் தவாவை நன்கு சுடவைத்து அதில் எண்ணை ஊற்றி கெட்டியான இட்லி மாவை ஊத்தப்பம்போல் ஊற்றவும்.

* அதன்மேல் வதக்கிய காய்கறி கலவை மற்றும் இட்லி மிளகாய்ப் பொடி பரவலாகப் பரப்பி, அதை சுற்றிலும் எண்ணை ஊற்றி ஒரு மூடி போட்டு மூடி வைத்து அடுப்பை மெல்லிய தீயில் எரியவிடவும்.

* மாவு வெந்ததும் காய்கறி ஊத்தப்பத்தை மெல்லத் திருப்பிவிட்டு சுற்றிலும் எண்ணை ஊற்றி வேக வைத்து இறக்கவும்.

* உயர்ந்த ஊட்டச்சத்து நிறைந்த சூடான ஊத்தப்பம் தயார்.

சுவைக்கான குறிப்பு

* சிறிய குழந்தைகளுக்கு பச்சை மிளகாய், இஞ்சி விழுது சேர்க்காமல் நெய்யில் ஊட்டச்சத்து ஊத்தப்பத்தை செய்து கொடுக்கலாம்.

கீதா பாலகிருஷ்ணன்