காதல் பற்றி சில வரிகள்.....!

காதல் புனிதமானது. அதனால்தான் `காதலர் தினம்' உலகத் திருவிழாவாகி இருக்கிறது. நேசிக்கும் நெஞ்சங்கள் அன்பைப் பரிமாறிக் கொள்வதே இத்திருவிழா. அதனால் காதலர் தினத்தை இளைஞர்களின் விழாவாக மட்டுமே பார்க்கக்கூடாது.

காதலர் தினம் வந்த கதை மட்டுமல்ல காதல் சார்ந்த ஒவ்வொரு செய்தியும் சுவையானது. சுகமானது. வாலன்டைனை அறியாத வாலிபம் இருந்தாலும், காதலை அறியாமல் வாழ்ந்தவர்கள் இருக்க முடியாது.

***

காதலின் வரலாற்றை அறிய முடியாது. ஆனால் காதலர்தினம் கடந்த நூற்றாண்டில்தான் உலகம் முழுக்க பிரசித்தி பெற்றது. காதலர் தினத்தின் நாயகன் வாலன்டைன் வாழ்ந்தது மூன்றாம் நூற்றாண்டில். ரோமப் பேரரசன் இரண்டாம் கிளாடியஸ், போர் வீரர்களுக்கு திருமணம் கூடாது என்று உத்தரவிட்டிருந்தான். அமைச்சரான வாலன்டைன் அந்த உத்தரவை மீறி போர்வீரர்களின் காதலுக்கும், திருமணத்திற்கும் உதவினார். இதனால் அவரை அரசன் தூக்கிலிட்டான். வாலன்டைன் தன்காதலிக்கு கடைசியாக எழுதிய கடிதத்தில் `உன்னுடைய வாலன்டைனிடமிருந்து' என்று குறிப்பிட்டார். அந்த வாசகம்தான் காதலர்களின் வேதச் சொல்லாக பின்பற்றப்படுகிறது.

***

காதலர்கள் அதிகமாக வழங்கிக் கொள்ளும் பரிசு எது என்றால் `முத்தம்' என்பீர்கள். உண்மை அது அல்ல. காலத்திற்கேற்ப பரிசுப் பொருட்கள் மாறி வருகிறது. அதில் புகழ்பெற்ற ஒரு பரிசுப் பொருள் `லாக்கெட்'. கழுத்துச் சங்கிலியுடன் இணைந்த சிறு குப்பி பெட்டியில் காதலின் நினைவாக புகைப்படம், தலைமுடி, சிறு பொருட்களை வைத்து பரிசாக வழங்குவதுதான் `லாக்கெட்'. இது இப்போது பழைய பேஷனாகிவிட்டாலும் 1679-ம் ஆண்டில் இருந்து கடந்த சில ஆண்டுகளுக்கு முன்புவரை நீண்டகாலமாக காதலின் பெருமையைச் சொல்லும் சிறந்த பரிசுப் பொருளாக விளங்கியது இந்த லாக்கெட்தான்.

***

காதல் என்றால் ஆணும், பெண்ணும் செய்வது என்ற நினைப்பு பரவலாக இருக்கிறது. இருபாலினத்தவர் அல்லாமல் ஒருவருக்கொருவர் நேசித்தால் அதுவும் காதல்தான். உடல்உறவு அற்ற அந்த புனிதமான காதலுக்கு பெயர் பிளேடோனிக்.

தத்துவஞானி சாக்ரடீஸ், தன் சீடர்களிடம் இணையற்ற அன்பு வைத்திருந்தார். தனித்துவம் மிக்க அந்த அன்பை உணர்ந்த சீடரான பிளேட்டோ, `மேன்மைமிகு காதல் உடலுறவால் அழியும். இந்த அன்பு அதைவிடப் புனிதமானது' என்று விளக்கம் அளித்தார். அதனால் உறவற்ற நேசம் `பிளேடோனிக்' எனப்படுகிறது.

***

காதலர் தினத்தன்று காதல் சொல்லப் போகிறவர்கள் `பிங்' நிற உடை அணியலாம். ஆரஞ்சு நிற உடை காதலில் இருப்பவர்களுக்குரியது, இருவரும் காதலித்தால் வெண்மை நிற ஆடையையும், நிச்சயிக்கப்பட்டிருப்பவர்கள் சிவப்பு நிற உடையையும் அணியலாம்.

பச்சை நிற ஆடை அணிபவர்கள் காதலை விரும்புவதாகவும், நீல நிற உடையினர் காதலிக்கப்படுவதை எதிர்பார்ப்பதாகவும், கறுப்பு நிறம் காதலில் விருப்பம் இன்மையையும், மஞ்சள் நிறம் காதல் தோல்வியையும் காட்டுவதாக கருதுகிறார்கள்.

***

இளைய தலைமுறையினர் காதலை வெளிப்படுத்தும் விதமாக பல வண்ண உடைகளை அணிகிறார்கள். எப்போதுமே குறிப்புகளால் உணர்த்தும் பெண்கள் முகவசீகரத்திற்காக வைக்கும் மச்சம் போன்ற `பிïட்டி மார்க்' மூலம் காதலை வெளிப்படுத்துகிறார்கள். இது வெளிநாடுகளில் பின்பற்றப்படும் முறை.

வாய்க்கு அருகில் வைக்கும் மச்சக்குறி `காதலுக்கு தயார்' என்பதையும், வலது கன்னத்தில் குறியிட்டால் திருமணமானவர் என்றும், இடது கன்னத்தில் குறி இருந்தால் நிச்சயிக்கப்பட்டவர் என்றும், கண்ணிற்கு அருகில் குறியிட்டிருந்தால் `காதலுக்கு சம்மதம்` என்றும் பொருள் கொள்கிறார்கள்.

***

எம்மொழி இலக்கியங்களிலும் காதலைக் காணலாம். தமிழ் இலக்கியங்களில் காணப்படும் தமிழர் காதல் சிறப்புக்குரியது. காதல் எது, காமம் எது என்பதன் விளக்கம், பிரிவின் துயர், ஏக்கம் பரப்பும் பசலை நோய், தூதாக யாரை அனுப்பலாம், யாரை அனுப்பக்கூடாது என்பன போன்றவை பிற மொழி இலக்கியங்களில் சொல்லப்படாதவையாகும்.

தான்வளர்த்த புன்னையை தங்கையென்று எண்ணி அதன் முன்பும் காதல் கொள்ள நாணுவது, `காதலன் வந்து சென்றானா?' என்பதை தோட்டத்துச் செடி கொடிகளிடம் பேசி அறிவது போன்ற பண்பு மிகுந்த காதலை புறநானூறு, தொல்காப்பிய இலக்கியங்களில் காணலாம்.

***