இண்டர்லோக்: திருத்தங்கள் செய்வதற்காக நியமிக்கப்பட்ட குழுவின் பணி இன்று தொடங்குகிறது

சர்ச்சைக்குள்ளான இண்டர்லோக் மலாய் இலக்கிய பாடநூலில் காணப்படும் உணர்ச்சிகரமானப் பகுதிகளை நீக்குவதற்காக அரசாங்கத்தால் அமைக்கப்பட்டுள்ள நிபுணர்கள் குழு அதன் பணியை இன்று தொடங்குகிறது.

அக்குழுவின் முதல் கூட்டம் இன்று புத்ராஜெயாவிலுள்ள கல்வி அமைச்சில் நடைபெறுகிறது. அக்குழுவின் பணிகள் குறித்து அதன் உறுப்பினர்களுக்கு இன்று விளக்கம் அளிக்கப்படும்.

இக்குழுவின் தலைவராக நியமிக்கப்பட்டிருக்கும் பேராசிரியர் டாக்டர் சம்சூல் அம்ரி பஹாருடின், செய்யப்பட வேண்டிய திருத்தங்கள் தீர்மானிக்கப்பட்டு அவற்றை அரசாங்கத்தின் ஒப்புதலுக்கு அனுப்புவதற்கு முன்பு இக்குழு பல சந்திப்புக்களை நடத்தும் என்று கூறினார்.

“இக்குழு எவருக்கும் எதிரான எண்ணங்களைக் கொண்டிராது. திறந்த மனதுடன் அனைவரின் கருத்துகளும் கேட்கப்படும்”, என்று சம்சூல் கூறினார்.

மிகவும் காரசாரமாக விவாதிக்கப்பட்டு வரும் இண்டர்லோக் நாவலில் திருத்தங்கள் செய்வதற்காக நியமிக்கப்பட்டுள்ள குழுவில் மஇகா, காபெனா, தேவான் பஹசா டான் புஸ்தகா மற்றும் கல்வி அமைச்சின் பிரதிநிதிகள் இடம் பெற்றுள்ளனர்.

இந்நூல் ஆசிரியரின் சார்பில் அவரது துணைவியார் பங்கேற்பார்.

“நாவல் என்றால் என்ன என்று முதலில் வரையறுக்கப்படுவது முக்கியமாகும். இதரப் பணிகள் அங்கிருந்து தொடரும்”, என்று சம்சூல் மேலும் கூறினார்.

திருத்தங்களைப் பார்க்காமல் பேசுவதற்கில்லை

இண்டர்லோக் மீட்டுக்கொள்ளப்பட வேண்டும் மஇகாவின் தலைவர் ஜி. பழனிவேல் அரசாங்கத்தைக் கேட்டுக்கொண்டிருந்தார். ஆனால், பிரதமர் நஜிப் மற்றும் கல்வி அமைச்சர் முகைதின் யாசின் ஆகியோருடன் நடத்தப்பட்ட சந்திப்பிற்குப் பின்னர் இண்டர்லோக் மீட்டுக்கொள்ளப்படாது, ஆனால் திருத்தங்கள் செய்யப்படும் என்று அறிவிக்கப்பட்டது.

அந்த அறிவிப்பைத் தொடர்ந்து நியமிக்கப்பட்ட குழு இன்று கூடுகிறது.

அக்குழுவில் மஇகாவின் சார்பில் நியமிக்கப்பட்டுள்ள உறுப்பினர்களின் பெயர்கள் அறிவிக்கப்படவில்லை.

இண்டர்லோக் நாவலுக்கு செய்யப்படும் திருத்தங்களைப் பார்ப்பதற்கு முன்பு கருத்து எதுவும் கூற இயலாது என்று ஜி.பழனிவேல் கூறினார்.

“திருத்தம் செய்யப்பட்ட பதிப்பைப் படித்த பின்னர் மட்டுமே கருத்து கூறுவேன்”, என்றாவர்.

மலேசியாஇன்று!