மஞ்சள் நிற சட்டையைக் கழற்றாத எச்ஆர்பி உறுப்பினர்களுக்கு பிணை கிடையாது

**சிவா** · **சிவா** Mon 14 Feb 2011 - 15:25

சிரம்பானில் நேற்று கைது செய்யப்பட்ட மனித உரிமைக் கட்சி(எச்ஆர்பி) உறுப்பினர்கள் 22 பேர், ஓர் இரவு முழுக்க லாக்-அப்பில் இருந்த பின்னர் இன்னும்கூட விடுவிக்கப்படவில்லை.

நாடு முழுக்க கைது செய்யப்பட்ட சக உறுப்பினர்கள் விடுவிக்கப்பட்ட பின்னரும்கூட சிரம்பானில் உள்ள இவர்கள் விடுதலை செய்யப்படவில்லை என்பதுடன் அவர்கள் அணிந்திருந்த மஞ்சள் நிற சட்டைகளை அகற்ற மறுத்ததால் மேலும் ஏழு நாள்கள் காவலில் வைக்கப்படலாம் என்றும் மிரட்டப்பட்டிருக்கிறார்கள்.

சட்டைகளை அகற்ற மறுத்தார்கள் என்பதால் அந்த 22 பேரையும் பிணையில் விட மறுத்து இரவுமுழுக்க லாக்-அப்பில் அடைத்து வைத்தார்கள்.

“பிணையில் விடுவிக்குமுன்னர் காவலில் வைக்கப்பட்டவர்களிடம் அவர்கள் அணிந்திருந்த மஞ்சள் நிறச் சட்டையைக் கழற்றி (போலீசிடம்) ஒப்படைக்கும்படி கூறப்பட்டிருக்கிறது. அவர்கள் மறுத்திருக்கிறார்கள். அது பற்றி இப்போது பேசி வருகிறோம்”, என்று சிலாங்கூர் எச்ஆர்பி தலைவர் செல்வம் கூறினார்.

செல்வமும் மற்றவர்களும் தங்கள் நெகிரி செம்பிலான் சகாக்களைப்-அதன் தலைவர் உள்பட- பிணையில் விடுவிப்பதற்கு முயன்று வருகிறார்கள்.

நேற்று இண்டர்லோக் நாவலுக்கு எதிர்ப்புத் தெரிவிக்க, எச்ஆர்பி நாடு முழுமையும் வாகன ஊர்வலம் நடத்தியபோது அதற்கு எதிராக போலீஸ் நடவடிக்கை மேற்கொண்டு பல இடங்களில் பலரைக் கைது செய்தது.

வாகனங்களில் கூட்டமாக சென்று போக்குவரத்துக்கு இடையூறு செய்ததால் அவர்கள் கைது செய்யப்பட்டார்கள் என்று போலீஸ் கூறியது.

நேற்றிரவு சிரம்பானில் தடுத்து வைக்கப்பட்ட அந்த 22 பேரும் உண்ணாவிரதம் இருந்ததாகவும் செல்வம் கூறினார்.

மலேசியாஇன்று