மாரியம்மன் கோவிலுக்கு சீர் வரிசை ஊர்வலம்

**சிவா** · **சிவா** Mon 14 Feb 2011 - 15:39

சேலம்: சேலத்தில் மாரியம்மன் கோவில் மஹா கும்பாபிஷேகத்தையொட்டி ஒட்டகம், யானை, குதிரைகள் அணி வகுக்க, பக்தர்கள் ஊர்வலமாக எடுத்து வந்த சீர்வரிசை அம்மனுக்கு சாத்துபடி செய்யப்பட்டது.சேலம் அஸ்தம்பட்டியில் பச்சை உடையார் தெரு, கம்பர் தெருவில் பிரசித்தி பெற்ற பிடாரியம்மன், மாரியம்மன் கோவில் உள்ளது. இந்த கோவிலில், 16ம் தேதி மஹா கும்பாபிஷேகம் நடக்கிறது.கும்பாபிஷேகத்தையொட்டி, பிடாரியம்மன், மாரியம்மன் ஆகியோருக்கு தாய் வீடான சின்னதிருப்பதி வெங்கடேசபெருமாளிடம் இருந்து சீர்வரிசை பெற்று வரும் நிகழ்ச்சி நேற்று நடந்தது. ஏராமான பக்தர்கள் கலந்து கொண்டு, சீர்வரிசை பொருட்களை ஊர்வலமாக எடுத்து வந்தனர். யானை, ஒட்டகம், குதிரைகள் அணி வகுப்புடன், மேள, தாளம் முழங்க முக்கிய வீதிகளில் சீர்வரிசை ஊர்வலமாக வந்து கோவிலை அடைந்தது.

கோவிலில், பிடாரியம்மன், மாரியம்மன் ஸ்வாமிகளுக்கு சீர்வரிசை பொருட்களை சாத்துபடி செய்து வழிபாடு நடந்தது.இன்று காலை 7 மணியளவில் கணபதி வழிபாடு அனுக்ஞை, கணபதி ஹோமம், நவகிரஹ ஹோமம், தனபூஜை செய்து தீபாராதனை நடக்கிறது. மாலை 6 மணிக்கு கும்பஸ்தாபனம், கும்பங்கள் யாகசாலை பிரவேசமும், இரவு 8.30 மணியளவில் முதல்கால யாகபூஜையுடன் மூலிகை ஹோமம், பூர்ணாஹுதி, தீபாராதனை நடக்கிறது. 15ம் தேதி காலை 8.30 மணிக்கு இரண்டாம் காலயாக பூஜையும், மாலை 6 மணிக்கு மூன்றாம் கால யாகவேள்வியும் தொடங்குகிறது. வரும் 16ம் தேதி அதிகாலை 4.15 மணிக்கு நான்காம் கால யாகவேள்வி நடக்கிறது. காலை 6.20 மணிக்கு விமான கும்பாபிஷேகமும், 7 மணிக்கு மூலாலய கும்பாபிஷேகமும் நடக்கிறது.