துப்பாக்கி நாயகன் அபினவ்

கடந்த 2008-ம் ஆண்டு சீனாவின் தலைநகர் பெய்ஜிங்கில் நடைபெற்ற ஒலிம்பிக் போட்டியில் இந்தியாவுக்கு முதல் தங்கப்பதக்கத்தைப் பெற்றுத் தந்தவர், அபினவ் பிந்த்ரா. அதற்கு முன்னர் 1980-ம் ஆண்டு ரஷ்யாவின் தலைநகரான மாஸ்கோவில் நடைபெற்ற ஒலிம்பிக் போட்டியில் வாங்கிய தங்கம் தான் இந்தியா கடைசியாகப் பெற்றது. 28 ஆண்டு களாக தொடர்ந்து கொண்டிருந்த இந்தியாவின் தங்கப்பதக்க தாகத்தைத் தீர்த்து வைத்தவர் என்ற பெருமை இவரையே சேரும்.

உத்தரகாண்ட் மாநிலத்தில் உள்ள டேராடூனில் பிறந்தவர், அபினவ். இவரின் தந்தை ஏ.எஸ். பிந்த்ரா, சண்டிகரில் மிகப்பெரிய தொழிலதிபர். சிறுவயதிலேயே துப்பாக்கி சுடுவதில் அதிக ஆர்வத்துடன் இருந்தார் அபினவ். இவருடைய ஆர்வத்தைப் பார்த்த தந்தை, தன்னுடைய மகன் துப்பாக்கி சுடுதலில் சாதிக்க வேண்டும் என்பதற்காக நகருக்கு வெளியில் தனியாக பயிற்சிக்களம் அமைத்துக் கொடுத்தார். அத்துடன் ஜெர்மனிக்கு அனுப்பி, 6 மாதங்களுக்கு அங்கே பயிற்சி பெறச் செய்தார். அபினவுக்கு வேண்டிய எல்லா வசதிகளையும் செய்து கொடுத்து, இன்று ஒலிம்பிக்கில் தங்கம் வெல்ல காரணமாக அமைந்தவர், அவருடைய தந்தை தான்.

அபினவுக்குள் இருக்கும் திறமையை முதன்முதலில் வெளிக்கொண்டு வந்தவர், ஜே.எஸ். தில்லான். இவர் தான் அபினவ்வின் முதல் குரு.

12 வயதில் ’ரோபர்' மாவட்ட துப்பாக்கி சுடுதல் போட்டியில் முதல் முறையாக வெற்றி பெற்ற அபினவ், தன்னுடைய திறமைகளையும் வளர்த்துக் கொள்ள ஆரம்பித்தார். 1996-ம் ஆண்டு பஞ்சாப் மாநில துப்பாக்கி சுடுதல் `சாம்பியன்ஷிப்' போட்டியில், ஜுனியர் மற்றும் சீனியர் பிரிவுகளில் 6 தங்கப்பதக்கங்களை கைப்பற்றினார்.


அதே ஆண்டு சண்டிகரில் நடைபெற்ற மாநில அளவிலான போட்டிகளிலும் 6 தங்கப் பதக்கங்கள் வென்றார். அப்போது அவருடைய வயது 13 தான். இளம் வயதிலேயே 12 தங்கப்பதக்கங்களை வென்று ஜுனியர் உலக சாதனை படைத்தவர், அபினவ். ஆனால், இவை சர்வதேசப் போட்டிகளாக இல்லாததால், பல நிறுவனங்கள் இவருடைய சாதனை களை ஏற்றுக்கொள்ள மறுத்து விட்டன. தனது திறமை மீது அபார நம்பிக்கை கொண்ட அபினவ், சர்வதேச அளவில் சாதிக்க உறுதி பூண்டார்.

1997-ம் ஆண்டு தேசிய துப்பாக்கி சுடுதலில் தங்கத்தைக் கைப்பற்றினார். 1998-ம் ஆண்டு தேசிய அளவிலான ஜுனியர் மற்றும் சீனியர் பிரிவுகளில் முதலிடம் பெற்று, தன்னுடைய சாதனையை தானே புதுப்பித்துக் கொண்டார். 1999-ம் ஆண்டு நடைபெற்ற தெற்காசிய விளையாட்டுப் போட்டியின் ஜுனியர் பிரிவில் தங்கம் வென்றார்.

சிட்னியில் 2000-ம் ஆண்டு நடந்த ஒலிம்பிக் போட்டியில் முதன்முதலாகக் கலந்து கொண்டார். ஆனால், அவரால் சாதிக்க முடியவில்லை. 2002-ம் ஆண்டு மான்செஸ்டரில் நடந்த காமன்வெல்த் துப்பாக்கி சுடுதல் போட்டியில் `ஏர்ரைபிள்' பிரிவில் தனிநபர் தங்கமும், அணிப் பிரிவில் வெள்ளியும் கைப்பற்றி அசத்தினார். 2004-ம் ஆண்டு ஏதென்ஸ் நகரில் நடந்த ஒலிம்பிக் போட்டியில் 7-வது இடம்பிடித்தார். 2006-ம் ஆண்டு நடைபெற்ற உலக சாம்பியன் துப்பாக்கி சுடும் போட்டியில் முதலிடம் பெற்று, தங்கம் வென்ற முதல் இந்திய வீரர் என்ற பெருமையையும் பெற்றார்.

பல்வேறு சாதனைகளைப் பெற்றிருந்தாலும், ஒலிம்பிக்கில் வென்ற தங்கம்தான் அவருடைய சிறந்த சாதனையாக கருதப்படுகிறது. 10 மீட்டர் `ஏர்ரைபிள்' பிரிவில் துல்லியமாக இலக்கைத் தாக்கியதால், தங்கம் இவருக்குச் சொந்த மானது. அபினவின் விளையாட்டுச் சாதனையைப் பாராட்டும் வகையில் மத்திய அரசு அவருக்கு ’அர்ஜூனா' விருதும், `ராஜிவ்காந்தி கேல்ரத்னா' விருதும் வழங்கி கவுரவித்துள்ளது.