பாக்., பாடகர் உள்பட 3 பேர் டில்லியில் கைது ; லட்சக்கணக்கில் வெளிநாட்டு கரன்சியுடன் வந்தனர்

புதுடில்லி: லட்சக்கணக்கில் அமெரிக்க கரன்சி மற்றும் டிராப்டுகள் சகிதம் துபாய்க்கு சென்ற பாகிஸ்தான் பிரபல பாடகரை டில்லியில் வருமாண நுண்ணறிவு பிரிவு அதிகாரிகள் கைது செய்தனர். கைது செய்யப்பட்ட பாடகரை விடுவிக்க பாக்.., தூதரகம் உதவியுடன் துரித நடவடிக்கை எடுக்க பாக்., அமைச்சர் முனைந்து செயல்பட்டு வருகிறார்.

துபாய் செல்ல தனது இசைக்குழுவினருடன் பாகிஸ்தான் பாடகர் ராகத்பதக் அலிகான் டில்லி வந்து கொண்டிருந்தார். இவர் டில்லி வந்து சேர்ந்ததும் வருமானவரி நுண்ணறிவு பிரிவு அதிகாரிகள் விமானநிலையத்தில் அதிரடி சோதனை நடத்தினர். இதில் இவரிடம் 1. லட்சத்து 24 ஆயிரம் மதிப்புள்ள அமெரிக்க டாலர் பணம் ( இந்திய மதிப்பில் சுமார் ரூ.56 லட்சத்திற்கும் மேல் ) , மற்றும் செக்குகள், டிமாண்ட் டிராப்டுகள் இருந்தன.

கணக்கில் காட்டப்படாத இந்த பணம் விவரம் குறித்து பாடகர் முறையான தகவல் அளிக்கவில்லை. இதனையடுத்து பாடகரும் இவருடன் இருந்த உதவியாளர் மற்றும் மானேஜர் ஆகிய 3 பேரை கைது செய்தனர். இவர்களிடம் தொடர்ந்து விசாரணை நடத்தப்பட்டு வருகிறது.

இவரை விடுவிக்க பாகிஸ்தான் வெளியுறவு செயலர் பாக்., மற்றும் இந்திய தூதரக அதிகாரிகளுடன் தொடர்ந்து தொடர்பு கொண்டு விசாரித்து வருகிறார். இவரை மதிப்புடன் நடத்துவதோடு விரைவில் விடுவிக்க உரிய நடவடிக்கை எடுக்க கேட்டுக்கொண்டுள்ளார். இத்துடன் இந்த விவகாரத்தை உன்னிப்பாக பாகிஸ்தான் கவனித்து வருகிறது.

ஏற்கனவே கைது செய்யப்பட வேண்டியவர்: பாடகர் ராகத்பதக் அலிகான் கடந்த சில ஆண்டுகளுக்கு முன்னர் டில்லியில் இசை நிகழ்ச்சியை நடத்துவதாக பணம் பெற்று வராமல் எத்தனித்து விட்டார்.

இது தொடர்பாக ஏற்கனவே புகார் நிலுவையில் இருந்தது குறிப்பிடத்தக்கது.ஆனால் அவர் பாகிஸ்தானில் இருந்து விட்டபடியால் அவரை கைது செய்யப்பட முடியவில்லை.

ராகத் பதக் இந்த ஆண்டுக்கான பிலிம்பேர் அவார்டு பெற்றவர் என்பது குறிப்பிடத்தக்கது.

தினமலர்