மக்கள் தொகை கணக்கெடுப்புக்கு சென்ற ஆசிரியையிடம் நகை கொள்ளை

மக்கள் தொகை கணக்கெடுப்புக்கு சென்ற ஆசிரியையிடம் நகை கொள்ளை. ராயப்பேட்டை அடுக்குமாடி குடியிருப்பில் பரபரப்பு சம்பவம்

சென்னை ராயப்பேட்டையில் உள்ள அடுக்குமாடி குடியிருப்புக்கு, மக்கள் தொகை கணக்கெடுப்புக்கு சென்ற ஆசிரியையை தாக்கி நகை கொள்ளை அடிக்கப்பட்டது.

டீச்சர் கீதா

சென்னை உள்பட தமிழகம் முழுவதும் தற்போது மக்கள் தொகை கணக்கெடுக்கும் பணி நடந்து வருகிறது. ஆசிரியர்கள், சத்துணவு டீச்சர்கள் அதிக அளவில் இந்த பணியில் பயன்படுத்தப்படுகிறார்கள். நேற்று முன்தினம் பிற்பகல் 2.30 மணி அளவில் சென்னை ராயப்பேட்டை லாயிட்ஸ் ரோட்டில் லாயிட்ஸ் லேனில் உள்ள `ரகேஜாநெஸ்ட்` அடுக்குமாடி குடியிருப்பில் மக்கள் தொகை கணக்கெடுக்கும் பணி நடந்தது.

சத்துணவு ஆசிரியை கீதா(வயது 53) இந்த பணியில் தன்னந்தனியாக சென்று ஈடுபட்டார். அவர் சென்ற போது அந்த அடுக்குமாடி குடியிருப்பில் பெரும்பாலான வீடுகளில் ஆட்கள் தூங்கிக்கொண்டு இருந்தனர்.

டிரைவர் வேட ஆசாமி

அப்போது 35 வயது மதிக்கத்தக்க டிப்-டாப் ஆசாமி ஒருவன், தன்னை கார் டிரைவர் என்று அறிமுகப்படுத்திக் கொண்டான். அந்த குடியிருப்பில் டிரைவராக பணியாற்றி வருவதாகவும் தெரிவித்தான். தனது முதலாளி வீட்டில் ஆட்கள் தூங்காமல் இருக்கிறார்கள் என்றும், அந்த வீட்டில் முதலில் கணக்கெடுப்பு நடத்தலாம் என்றும், கீதாவை அந்த ஆசாமி அழைத்து சென்றான்.

மொட்டை மாடிக்கு அழைத்துச் சென்ற அந்த ஆசாமி, திடீரென்று கீதாவை தாக்கினான். அதில் வாயில் காயம் ஏற்பட்டு ரத்தம் கொட்டியது. இதில் கீதா நிலை குலைந்து மயக்கமாகி கீழே சாய்ந்து உட்கார்ந்து விட்டார்.

நகை கொள்ளை

கீதா அணிந்திருந்த நகைகளை கொள்ளை அடித்துக் கொண்டு அந்த ஆசாமி மின்னல் வேகத்தில் தப்பி ஓடி விட்டான். மயக்கமாகி கிடந்த கீதா, ஆம்புலன்ஸ் மூலம் அரசு பொது மருத்துவமனையில் சேர்க்கப்பட்டார். அந்த குடியிருப்பில் வசித்த ஸ்ரீதர் என்பவர், கீதாவை ஆஸ்பத்திரியில் சேர்க்க உதவினார். பின்னர் இந்த சம்பவம் குறித்து ராயப்பேட்டை போலீசில் புகார் கொடுக்கப்பட்டது.

ராயப்பேட்டை உதவி போலீஸ் கமிஷனர் ராஜேந்திரகுமார், இன்ஸ்பெக்டர் ஜீவானந்தம் ஆகியோர் நேரில் சென்று விசாரணை நடத்தினார்கள். இந்த சம்பவம் தொடர்பாக வழக்குப்பதிவு செய்யப்பட்டுள்ளது. சம்பவம் நடந்த அடுக்குமாடி குடியிருப்பில் காவலாளியாக உள்ள திருநாவுக்கரசு என்பவர் மதிய சாப்பாடு சாப்பிட சென்ற போது, இந்த சம்பவம் நடந்ததாக சொல்லப்படுகிறது. அவரை பிடித்தும் போலீசார் விசாரித்து வருகிறார்கள். நகை கொள்ளை அடித்த ஆசாமியை போலீசார் தேடி வருகிறார்கள்.

கேமரா இல்லை

சம்பவம் நடந்த அடுக்கு மாடி குடியிருப்பில் கண்காணிப்பு கேமராக்கள் பொருத்தப்படவில்லை என்று தெரிய வந்துள்ளது. அங்கு கண்காணிப்பு கேமரா பொருத்த நடவடிக்கை எடுக்க வேண்டும் என்று போலீசார் கேட்டுக் கொண்டுள்ளனர். மக்கள் தொகை கணக்கெடுப்பு பணியில் ஈடுபட்ட டீச்சரிடம் இந்த சம்பவம் நடந்துள்ளதால், சென்னை போலீஸ் வட்டாரத்தில் பெரும் பரபரப்பை ஏற்படுத்தி உள்ளது.

பாதிக்கப்பட்ட டீச்சர் கீதா சென்னை விருகம்பாக்கத்தில் வசித்து வருகிறார். சென்னையில் மைலாப்பூர், ராயப்பேட்டையில் சில பகுதிகள் மக்கள் தொகை கணக்கெடுக்க இவருக்காக ஒதுக்கப்பட்டுள்ளது குறிப்பிடத்தக்கது.