இலங்கை அப்பாவித் தமிழரைக் காப்பதில் நம்பிக்கை! 24 மணி நேரத்தில் அடுத்தடுத்த திருப்பங்கள்

புதுடில்லி: இலங்கையில் அப்பாவித் தமிழர்களைக் காப்பதில் பெரிய அளவு நம்பிக்கை ஏற்பட்டிருக்கிறது. இதை வெளிப்படுத்தும் வகையில், கடந்த 24 மணி நேரத்தில் அடுத்தடுத்த திருப்பங்கள் நிகழ்ந்தன.இலங்கை அப்பாவித் தமிழர்கள் துயர் துடைக்க, தமிழகத்தில் மனிதச் சங்கிலிப் போராட்டம் நடத்தியபின், "மத்திய அரசு இந்த விஷயத்தில் மேற்கொண்ட நடவடிக்கைளில் அவ்வளவு திருப்தி இல்லை' என்று முதல்வர் கருணாநிதி கூறியிருந்தார்.மேலும், எம்.பி.,க்கள் ராஜினாமா கெடு முடிவடையும் நேரத்தில், முதல்வர் கருணாநிதியுடன், ஐக்கிய முற்போக்கு கூட்டணித் தலைவர் சோனியா நேற்று தொலைபேசியில் தொடர்புகொண்டு பேசினார்.


தமிழர்கள் பாதுகாக்கப்படுவார்கள் : இலங்கைப் பிரச்னை குறித்தும், தற்போதுள்ள சூழ்நிலைகள் குறித்தும், மத்திய அரசு எடுத்துவரும் நடவடிக்கைகள் குறித்தும் முதல்வரிடம் அவர் விளக்கினார்.மேலும், இதுபற்றி விரிவாக பேச வெளியுறவு அமைச்சர் பிரணாப் முகர்ஜியை சென்னைக்கு உடனே அனுப்பி வைப்பதாகவும் சோனியா தெரிவித்தார். இலங்கைப் பிரச்னையில் மத்திய அரசு எடுத்துவரும் முயற்சிகளுக்காக தமிழக மக்களின் சார்பில் பிரதமருக்கும், சோனியாவுக்கும், பிரணாப் முகர்ஜிக்கும் நன்றி தெரிவிப்பதாக முதல்வர் கருணாநிதி மகிழ்ச்சி தெரிவித்தார்.இதற்கிடையே, இலங்கையில் போர் நடக்கும் வடபகுதியில் வாழும் தமிழர்கள் பாதுகாக்கப்படுவார்கள் என்று இலங்கை அதிபர் ராஜபக்சேயின் ஆலோசகரும், அவரது தம்பியுமான பாசில் ராஜபக்சே உறுதியளித்தார்.


அவசரமாக நேற்று வந்தார் பிரணாப் : நேற்று டில்லி வந்த பாசில் ராஜபக்சே வெளியுறவு அமைச்சர் பிரணாப் முகர்ஜியை சந்தித்து பேச்சுவார்த்தை நடத்தினார். அப்போது அவர், "இலங்கையில் புலிகளுடன் நடக்கும் போரால் அப்பகுதியில் வாழும் தமிழர்களுக்கு எவ்வித பாதிப்பும் இல்லாமல் அரசு பாதுகாக்கும்' என, உறுதியளித்தார்.பின்னர் வெளியுறவுச் செயலர் சிவசங்கர மேனனைச் சந்தித்த அவர் நிருபர்களிடம், " தமிழர்களை பாதுகாக்கும் விஷயத்தில் நாங்கள் அளித்த உறுதிமொழிகளை மீறமாட்டோம். அங்குள்ளவர்களுக்கு இந்திய அரசு தரும் மருந்து மற்றும் உணவுப் பொருட்களை வழங்குவதில் அக்கறை காட்டுவோம். மருத்துவ நிபுணர்களை இந்தியா அனுப்பினாலும், அதை ஏற்கத்தயார். மனிதாபிமான அடிப்படையில் செய்ய வேண்டிய அனைத்து விஷயங்களையும் இலங்கை அரசு செய்யும்' என்றார்.மேலும், வெளியுறவு அமைச்சர் பிரணாப் முகர்ஜி சென்னைக்கு அவசரமாக நேற்று வந்தார்.


முதல்வர் கருணாநிதியை அவரது இல்லத்தில் சந்தித்து, இலங்கை விஷயத்தில் மத்திய அரசு மேற்கொண்ட நடவடிக்கைகள் குறித்து விளக்கினார். இந்த சந்திப்பின் போது, வேறு பல முக்கிய விஷயங்களும் ஆலோசிக்கப்பட்டன. இந் நிலையில் தமிழக எம்.பி.,க்கள் ராஜினாமா விவகாரம் "கெடு' முடிய இருநாட்கள் இருக்கும் போது, நேற்று ஏற்பட்ட திருப்பங்கள், இப் பிரச்னையின் தீவிரத்தைக் குறைத்ததற்கான அறிகுறியாகத் தெரிகிறது.