லட்சக்கணக்கில் "கலர் டிவி" வழங்கும் போது கோர்ட்டுகளுக்கு நாற்காலி வழங்க முடியாதா?

லட்சக்கணக்கில் "டிவி"க்கள் வழங்கும் போது, கோர்ட்டுக்கு நாற்காலிகள் வழங்க அரசால் முடியவில்லையா? சுதந்திர தினம், அரசியல் கூட்டங்களுக்கு எல்லாம் குறைவான நாட்களில் பெரிய அளவில் மேடைகள் அமைக்க முடியும் போது, கோர்ட்டுக்கு ஏன் அடிப்படை வசதிகளை அளிக்க முடியாது?' என, சென்னை ஐகோர்ட் கேள்வி எழுப்பியுள்ளது.


சென்னை பாரிமுனையில் உள்ள ஜார்ஜ் டவுன் மாஜிஸ்திரேட் கோர்ட்டை, ஐகோர்ட் தலைமை நீதிபதி இக்பால் திடீரென நேற்று காலையில் பார்வையிட்டார். கோர்ட் ஹாலில் மேஜை, நாற்காலி வசதி, குடிநீர், கழிவறை வசதி, ரிமாண்ட் கைதிகளுக்கான அறை வசதிகளை ஆய்வு செய்தார். அடிப்படை வசதிகளில் உள்ள குறைகளைக் கண்டு அதிருப்தியடைந்தார். இந்தப் பிரச்னை குறித்து, தானாக முன்வந்து வழக்கை, ஐகோர்ட் விசாரணைக்கு எடுத்தது. தலைமை நீதிபதி இக்பால், நீதிபதிகள் ஜோதிமணி, சிவஞானம் அடங்கிய "பெஞ்ச்' இதை விசாரித்தது. அரசு தரப்பில் கூடுதல் அட்வகேட் ஜெனரல் வில்சன் ஆஜரானார். கோர்ட்டில் நடந்த வாதம்:


தலைமை நீதிபதி: கோர்ட்டுகளுக்கு தேவையான அடிப்படை வசதிகளை அளிக்குமாறு, 2009ம் ஆண்டு செப்டம்பரில் அரசிடம் வேண்டுகோள் வைக்கப்பட்டது. இன்று ஜார்ஜ் டவுன் கோர்ட்டுக்கு சென்று பார்த்தேன். அங்கு அடிப்படை வசதிகள் இல்லை. சென்னை நகரில் இருக்கும் கோர்ட்டுக்கு ஏன் இந்த வசதியை அளிக்கவில்லை? அனைத்து வசதிகளையும் அளிக்க எத்தனை நாட்கள் ஆகும்?


கூடுதல் அட்வகேட் ஜெனரல் வில்சன்: இதுகுறித்து அரசிடம் இருந்து விளக்கம் பெறுகிறேன். கோர்ட்டில் அடிப்படை வசதிகளை அளிக்க நிதி ஒதுக்கப்பட்டிருப்பதாக அறிகிறேன்.


நீதிபதி ஜோதிமணி: ஜார்ஜ் டவுன் கோர்ட்டுக்கு ஆயிரக்கணக்கான பேர் தினசரி வருகின்றனர். ஒரே ஒரு கழிப்பறை தான் அங்கு உள்ளது.


தலைமை நீதிபதி: கோர்ட் ஹால்களில் போதிய நாற்காலிகள் இல்லை. ரிமாண்ட் கைதிகளுக்கு அறை இல்லை. அவர்கள் போலீஸ் வேனில் உட்கார வைக்கப்பட்டுள்ளனர். கோர்ட் ஹால் சிறியதாக உள்ளது. கழிவறை அருகில் யாரும் செல்ல முடியாத நிலை உள்ளது. குறைந்தது 25 நாற்காலிகளைக் கூட வழங்க முடியாத நிலையில் தான், அரசு உள்ளது. ஆனால், லட்சக்கணக்கில் "டிவி'க்களை வழங்குகின்றனர்.


கூடுதல் அட்வகேட் ஜெனரல்: பொது பட்ஜெட்டில் 300 கோடி ரூபாய் ஒதுக்கீடு செய்யப்பட்டுள்ளது. எழும்பூரில் ஒருங்கிணைந்த கோர்ட் கட்டடம் கட்ட திட்டமிடப்பட்டது.


தலைமை நீதிபதி: நீங்கள் என்ன கருணை காட்டுகிறீர்களா? அது உங்கள் கடமை. நீதித்துறைக்கு ஒதுக்கீடு செய்யும் நிதியின் மொத்த சதவீதம் என்ன? 5 சதவீதம் கூட இருக்காது. தலைமைப் பொறியாளர் எங்கே? அவரை வரச் சொல்லுங்கள். (உடனே, தலைமைப் பொறியாளர் வரவழைக்கப்பட்டார்) நீங்கள் தான் கோர்ட்டை பராமரிக்க வேண்டும். ஜார்ஜ் டவுன் கோர்ட்டில் உள்ள வசதிகளை பார்த்தீர்களா?


நீதிபதி ஜோதிமணி: அங்கே நிலைமை மோசமாக உள்ளது. தண்ணீர் வசதி அளிக்க வேண்டும். கழிவறை வசதி அளிக்க வேண்டும்.


கூடுதல் அட்வகேட் ஜெனரல்: சிறிது அவகாசம் கொடுங்கள். தலைமை பெருநகர மாஜிஸ்திரேட், வக்கீல் சங்கத்துடன் பேசி, பிரச்னையை தீர்க்கிறோம்.


தலைமை நீதிபதி: எதற்காக அவகாசம் வேண்டும்? இரண்டு வாரங்களுக்குள், ஜார்ஜ் டவுன் கோர்ட்டை முன்மாதிரி கோர்ட் ஆக ஆக்குங்கள். 75 நாற்காலிகள், 25 மேஜைகள், தண்ணீர், கழிவறை வசதியை அளிக்க வேண்டும். அரசியல் கூட்டங்களுக்கும், சுதந்திர தினத்துக்கும் பெரிய அளவிலான மேடைகளை இரண்டு நாட்களில் உங்களால் அமைக்க முடிகிறது. ஏன் இதையும் செய்ய முடியாது? ஜார்ஜ் டவுன் கோர்ட்டில் இருந்து துவங்குங்கள். இவ்வாறு விவாதம் நடந்தது.


இதையடுத்து, "பெஞ்ச்' பிறப்பித்த உத்தரவு: மாவட்ட கோர்ட்டுகள், மாஜிஸ்திரேட் கோர்ட்டுகள், சென்னையில் உள்ள கோர்ட்டுகளுக்கு போதிய மரச்சாமான்களை வழங்க வேண்டும் என ஐகோர்ட் பதிவாளர், அரசுக்கு 2009ம் ஆண்டு செப்டம்பரில் கடிதம் எழுதியுள்ளார். இதற்கு அரசிடமிருந்து பதில் இல்லை. நான்கு முறை நினைவூட்டும் கடிதங்களும் அனுப்பப்பட்டன. நிதி ஒதுக்கீடு செய்யவில்லை. கூடுதல் அட்வகேட் ஜெனரல், தலைமை பெருநகர மாஜிஸ்திரேட், பொதுப்பணித் துறை தலைமைப் பொறியாளர், நாளை(இன்று) ஜார்ஜ் டவுன் கோர்ட்டுக்கு சென்று, அங்குள்ள தேவைகள் என்ன என்பதை பார்க்க வேண்டும். இரண்டு வாரங்களுக்குள் அனைத்து வசதிகளையும் வழங்குவதாக, அரசு தரப்பில் தலைமைப் பொறியாளர் உத்தரவாதம் அளித்து மனு தாக்கல் செய்ய வேண்டும். இந்த வழக்கு விசாரணை வரும் 14ம் தேதிக்கு தள்ளி வைக்கப்படுகிறது. இவ்வாறு "பெஞ்ச்' உத்தரவிட்டுள்ளது.

டிவி கொடுத்தால் ஓட்டு கிடைக்கும். கோர்ட்டுக்கு நாற்காலி கொடுத்தால் என்ன கிடைக்கும? எல்லாம் சரியாக இருந்தால் நீதிபதி விரைவில் தீர்ப்பு வழங்கிவிடுவார். தனக்கு தண்டனை கொடுக்கும் ஒரு நிறுவனத்திற்கு எதற்க்காக வசதி செய்து கொடுக்க வேண்டும்?
---- ஒரு அரசியல்வாதி